Tsinjelo 19
19
1Omumanani ouchendanga mushiilongooleshie nomulayi okhushila ouli omurambatsanu mumunwakwe nali omuyingwa.
2Khandi, shibuli obulayi omundu okhubula obumanyi ta;
ne oyo ouehenda nayuyukhana, akoranga.
3Obuyingwa bwomundu bwonooninjia injilaye;
ne omwoyokwe kurunyilanga OMWAMI.
4Obuyinda bumeetanga abeetsa abanji;
ne omumanani, omwitsawe amulekhanga.
5Omuloli omubeeyi shialachweya okhukuumwa ta;
ne ouhuutsanga obubeeyi shialahona tawe.
6Abanji balasaaya omundu omuhaani abahenje oluboni,
ne buli mundu nomwitsa wa oyo ouhaananga ebihaanwa.
7Abeekho bosi bomumanani bamukiyanga;
ne abeetsabe shibashilanga muno okhumwihaanyakhwo!
Abalondiakhwo amakhuwa, ne khane bamalile okhutsia.
8Ounyoolanga oburechelefu, yeeheelanga omwene;
ne oulindanga obumanyilisii alanyoola obulayi.
9Omuloli omubeeyi shialachweya okhukuumwa ta;
ne oyo ouhuutsanga obubeeyi alatiba.
10Okhumenya eshiami shikhukwaniile omuyingwa,
nokhushila muno shilikhoyeele omusumba wabandu okhuruka abakhulundu tawe.
11Oburechelefu bwomundu buchilanga abule okhuhambwa oburima bwangu,
ne noluyalilwe okhumaayia likosa.
12Oburima bwomurichi buli shinga okhubulula khweitalanyi;
ne obukoosiabwe buli shinga eliime khubunyasi.
13Omwana omuyingwa abeetsanga amasila khusamwana;
ne amayinje komukhasi womundu karoonyelelanga obushia.
14Inzu nende obuyinda nobulaame oburulanga khubasamwana;
ne omukhasi omwitembelesi arulanga khuMWAMI.
15Obukara buleeranga tsindoolo tsinyinji;
ne omutofu, inzala yilamuluma.
16Oulindanga lilako, yeelindanga omwene;
ne oleka likhuwa alafwa.
17Oumukholelanga omumanani eshisa ahosinjia OMWAMI,
naye OMWAMI alamurunga khubukholibwe.
18Kuuma omwanawo, olwa obunaayi bushiliho;
ne orara omwoyo okhumumalilana ta.
19Omundu woburima obunji aleetuukha akabwo omwene,
shichila noba nomuhoma, kho nomuhonie khandi.
20Hulila obwibaali, notiila obuchesiyibwi,
kho obe omuchesi olunyuma.
21Omundu akasinjia amakhuwa amanji mumwoyokwe,
ne tsiyemi tsiOMWAMI nitsio etsilasinjila.
22Akeenywe mumundu neshisa;
ne omumanani ashila omubeeyi.
23Okhuria OMWAMI khuchoomanga enabulamu;
nouli ninakhwo alamenya niyeekuure;
obubii shibulamukoonya tawe.
24Omukara yeenanga omukhonokwe mulutaabo,
ne kata okhukuyila khumunwa khandi, shiyeenya ta.
25Khupa omukokonyi, ne oubula amachesi nayeeche okhwitembelesia;
ne oloshele owokhumanyilisia, naye alatiila khushisina shiobumanyi.
26Oufwolanga samwana, niyeelusia nyina,
nomwana oufwimbinjia omurwe naleera tsisoni.
27Mwana wanje, lekha okhuhulila obuchesiyii,
mana oshiama butswa okhurula khumakhuwa kobumanyi.
28Omuloli omumayaanu afwolanga obukhalachi;
ne omunwa kwomutamaanu kumilanga obubii.
29Obukhalachi burechesheelwe abakokonyi ne tsikhoba amabeka kabayingwa.
Currently Selected:
Tsinjelo 19: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
