Tsinjelo 14
14
1Buli mukhasi omuchesi yoombakhanga inzuye;
ne omusilu achisambulanga namakonoke omwene.
2Ouchendanga mubukololofubwe ariitsanga OMWAMI;
ne owoburambatsanu munjilatsie amulekanga.
3Mumunwa kwomuyingwa mulimwo olusaka lweisunga;
nabachesi, eminwa chiabwe chilabalinda.
4Aha tsing'ombe tsibula, imele yibulangaho;
ne tsingufu tsieing'ombe tsileeranga okhwama okhunji.
5Omuloli omwisiikwa shia abeeha ta;
ne omuloli omukaatii ahuutsanga obubeeyi.
6Omukokonyi arunanga obuchesi, narabunyoola ta;
ne obumanyi nobwangu khu oyo ouli nokhumanyilisia.
7Rula imbeli womundu omuyingwa,
okhuba shiolalola obumanyi mumunwakwe tawe.
8Obuchesi bwomwitembelesii nokhumanyilisia injilaye;
ne obusilu bwabayingwa nobukaatii.
9Nyasaye afwola omubii,
ne akoosinjia abakololofu.
10Omwoyo kumanyile obululu bwakwo okwene;
ne omucheni shiyeetsokanga mubusangaali bwakwo okwene;
11Inzu yomutamaanu yilakwisibwa;
ne liheema liomukololofu lilayuma.
12Yiliho injila eyilolekha khumundu mbu neinunji,
ne obumaliilishi bwayo netsinjila tsiokhufwa.
13Kata mukhutsekha, omwoyo kubeetsanga neshibeela,
nobumaliilishi bwobusangaafu bubeetsanga amasila.
14Omundu oukalukha inyuma mumwoyo aleetsula netsinjilatsie omwene;
ne omundu omulayi yesi ario, nebikhole bibie.
15Ouhuma amachesi asuubilanga buli likhuwa;
ne omwitembelesi ahenjelesinjia bulayi shinga olwa atsia.
16Omuchesi ariitsanga, mana yeehaanya obubii;
ne omuyingwa akhola bukhola, khandi atsaalikhanga.
17Ouhambwa oburima bwangu akhola obusilu;
ne omundu omurechelefu yeesimilisia.
18Abahuma amachesi baliitsanga obulaame bwobusilu,
ne abeetembelesi bafwalungwakhwo olusimbi lwobumanyi.
19Ababii neenamilanga abalayi;
nabatamaanu habilibwa biabalunjishi.
20Omumanani akiyungwa kata nowashie omwene;
ne abamuheelanga omuyinda nabanji.
21Oufwolanya owashie yoonoonanga;
ne oukholelanga omumanani akeshisa noweikhabi.
22Shibashiamanga abarechekhanga amabii?
Ne tsimbabasi nende akatoto bilaba khubo abarechekhanga amalayi.
23Mubufulukhani bwosi mulimwo inganga;
ne obubooli bwomunwa butswa buchoomanga khubutakha bwonyene.
24Olusimbi lwabachesi noburechelefu bwabwe;
ne oluchisa lwabayingwa nobusilu butswa.
25Omuloli watoto ahoninjia abandu;
ne ouhuutsanga obubeeyi aleeranga obukaatii.
26Mukhuria OMWAMI mulimwo obwisiichi obwamaani;
nabaanabe balaba nobwilushilo.
27Okhuria OMWAMI neisebele yobulamu,
mbu omundu yeehaanye khumareko kokhufwa.
28Oluyali Iwomuruchi luli mubunji bwabandube;
ne okhubula abandu nikhwo okhwonoonekha khwomukhulundu.
29Ourali omwangu okhutiilwa oburima ta nowokhumanyilisia okhunji;
ne owomwoyo kwokhurimukha achinguulanga obuyingwa.
30Omwoyo omulenjeelu nobulamu bwomubili,
ne imbalikha nokhubola khwamakumba.
31Oumiinanga omumanani aseyanga Omulonjiwe;
ne oubeelanga abatakha tsimbabasi, amuheelesinjia oluyali.
32Omutamaanu asindikhungwa hasi mukhukholakhwe okhubii;
ne omulunjishi ali shisale mushiilongooleshie.
33Obuchesi bumenyanga mumwoyo kwa oyo ouli nokhumanyilisia,
ne mumwoyo kwomuyingwa bubula obwikhalo.
34Obulunji buchinguulanga lihanga;
ne obwonooni netsisoni khuluyia lwosi.
35Omuruchi akoosinjia omukholi oukholanga akoburechelefu,
ne oburimabwe bulaba khu oyo oukholanga aketsisoni.
Currently Selected:
Tsinjelo 14: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
