Abafilipi 1
1
Lishiesio
1Eyirula khuPaulo nende Timotseyo, abasumba baKristo Yesu; yule khubatakatifu bosi muKristo Yesu abali eFilipi halala nabaaskofu nende abadikoni bayo. 2Obukoosia bube khwinywe, nende omulembe ebirula khuNyasaye Seefwe nende Omwami Yesu Kristo.
Aka Paulo yasaayila abaKristayo beFilipi
3Emuupila Nyasaye wanje orio buli olwa emwitsulilangakhwo lwosi; 4buli lwosi olwa emusaayilanga mwesi, esaayanga nokhwikhoya 5khulwa obusanjilani bweenywe mumilimo chieinjiili okhurula khunyanga yambeli okhuula olwa leelo. 6Likhuwa lino endimanyile bulayi, mbu owasimikha emilimo emilayi mwinywe alachimaliilisinjia okhuula khunduukho yaYesu Kristo. 7Kakhoyeele mbu emupaarenjekhwo mwesi endi nanwa, okhuba omwoyo kwanje kuli khwinywe; shichila kata mububohe bwanje kata mukhuterela injiili nokhuchitinyisia, musanjilananga ninasi khubukoosia. 8Okhuba Nyasaye nomuloli wanje, shinga amahoofu olwa kandiitsanga khwinywe mwesi mubuheeli bwaKristo Yesu. 9Khandi kano niko aka esaayanga, mbu obuheeli bweenywe bwimeete nibushilaana mubumanyi nobwahukhasii bwosi, 10mbu mufuchiilile ako akashila obulayi; khandi mbu mubeetsenje abeeleleshe ababula eshikha khulwa induukho yaKristo; 11nimwitsulamwo ebiamo biobulunji shi, ebiitsanga khulwa Yesu Kristo, mbu Nyasaye aheebwe oluyali niyeetsoomibwa.
Khwisie, okhuba mwoyo niKristo
12Nebutswa, baana beefwe, enzenya mbu mumanye shinga amakhuwa kanje olwa kamalile okhukwa akanyala okhutsitsachisia injiili. 13MuKristo, ebibohelo bianje biamanyishiile abasikari bosi baPraitorio kata nende abandi bosi; 14ne obunji bwabaana beefwe muMwami nibanyoolile obwisiichi khulwa ebibohelo bianje, bameeteeshe itswoni okhurumbula likhuwa liaNyasaye oburaria ta. 15Nitoto, baliho abeelwatsanga aka Kristo khulwa imbalikha nobusoolo; ne abandi khulwa obulayi bwomumwoyo; 16abeenabo bakhola khulwa obuheeli, nibamanya mbu ndareelwaho khulwa okhuterela injiili; 17ne abambeli balia barumbula Kristo khulwa obuyingani, nibarali nobwatoto ta, nibapaara okhundeerela amasila mububohe bwanje. 18Kho nishiina khandi? Kano konyene, mbu munjila tsiosi, kata mubukaatii kata mubwatoto akaKristo karumbulungwa; ne khulwako esangaala.
Ne toto mwene, ndalasangaalanga, 19shichila emanyile mbu kano kalamala kangwile obuhonia bwanje, khulwa okhusaaya khweenywe halala nende obutinyisii bwaRoho waYesu Kristo. 20Ne nolwa esuubilanga ninaaya; mbu endeshe okhuhambibwa tsisoni mwikhuwa liosi; ne mbu embe neitswoni muno, mana shinga olwa kali tsindaalo tsiosi, kata bulaano kabe kario, mbu Kristo aheelwe oluyali mumubili kwanje, kata nikhuli khulwa obulamu, kata khulwa okhufwa. 21Shichila khwisie, okhuba mwoyo niKristo; ne okhufwa neinganga khwisie. 22Ne nikali mbu okhuba mwoyo mumubili khulimwo inganga yemilimo chianje, eshia ndakhalobola shinyala okhumanya ta. 23Ne erambilwe elia ndakhakhola mu ako ako kabili; shichila ndikomba okhwinyokha, embeyo ewa Kristo ali; okhuba okhwenokhwo khushila obulayi; 24nebutswa okhumenya mumubili nikhwo okhwenyekha khulweenywe. 25Ne okhuba esuubilanga endio toto, emanyile mbu ndalamenya endio; toto, ndalamenya halala nineenyu mwesi, mbu mutsitsachisibwe nimusangaasibwa mubusuubili. 26Mana okhwiyitsiala khweenywe khulwanje khushilaane muKristo Yesu, khulwa okhubaho khwanje halala nineenyu khandi.
27Nebutswa injenda yeenywe yibeetsenje eyikwaniile injiili yaKristo; mbu kata nimba ninzitsa okhumukoonya, kata nimbulaho, embulilenje khukeenywe, mbu musimbiilanga muroho ndala, nimulwanila obusuubili bweinjiili nomwoyo mulala, 28nimurariisibwa nabo abamuyinga ta. Okhwenokhwo khulaba khubo eshilolelo shiobukori, habula eshiobuhonia bweenywe, eshirula khuNyasaye omwene. 29Okhuba eshia mwaheebwa inywe khulwa Kristo shikhuli okhumusuubilila khwonyene ta, habula nende okhusaalila khululwe. 30Shichila muli mubulwani bwenobwo obwa mwandola nindimwo, ne kata bulaano mumbulilangakhwo mbu endimwo endio.
Currently Selected:
Abafilipi 1: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
