Abaefeso 6
6
Obuhulili nende obuheeli
1Inywe abaana, muhulilenje abeebuli beenywe muMwami; okhuba nilio elimukhoyeele. 2Heelesinjie so nende mawo oluyali; elo nilio lilako liambeli elili nende obusuubisie, 3mbu Okaasenje bulayi, noyindila khushialo.
4Neenyu abasamwana, murabahambia abaana beenywe oburima ta; ne mbu muboole nimubaruka nokhubachesiyia mumakhuwa kOmwami.
5Neenyu abasumba, mubahulilenje abo abali abaami beenywe mukomubili, noburii nende okhutechela, mushiilongoole eshiomumioyo, shinga abakholelanga Kristo. 6Buraba obukhalabani obwokhulolwa bulolwa butswa, shingana abeenya okhuchamisia abandu, tawe; habula shinga abasumba baKristo murekhwo emioyo okhukhola aka Nyasaye yeenya. 7Khalabanenje nobulumilifu, shinga abakholela Omwami, abandu butswa tawe; 8nimumanyile mbu lilayi liosi liosi elia omundu yesi akhola, alanyoola ario khandi omurungo kwOmwami, kata nali omusumba omuhohe kata omwibule.
9Neenyu, abaami, mubakholele murio, nimulekha tsisiomi; olwa mumanyile mbu oyo ouli Omwami wabwe khandi oweenywe ali mwikulu, khandi mbu khuye bubulaho obwahuli bwosi mubandu.
Ebimanulwa biosi biaNyasaye
10Elihelelesia ndielino, mbu mukufuhalile muMwami, nende mumaani kobunyalibwe. 11Mwifwale ebimanulwa biosi biaNyasaye, mbu munyale okhuyinga obubatsa bwaSetani. 12Okhuba amabwi keefwe shikali akokhulwana nemibili namabanga ta, habula khulwananga noburuchi, nende obunyali, nende abaruchi beshialo shino eshilimwo eshiilima, nende amahe keshiroho kobubii mukeshineekulu. 13Khulwako, bukule ebimanulwa biosi biaNyasaye, mbu munyale okhusimbiila khunyanga imbii, ne nimumalile kosi, mube nimushisinjiile murio. 14Kho musinjile nimwiboyile mubishienje bieenywe obwatieeli, nimwifwalile khubilifu eshitsengwa shiobulunjishi, 15nimwifwalile mubilenje bieenywe obwirecheshi khulwa injiili yomulembe. 16Ne halala nende ako kosi mubukule ingabo yobusuubili, eya munyala okhusimilia orubano rwosi rwomubii, orwakha omulilo. 17Bukule nende ikuutwa yobuhonia, nende olukanga lwaRoho, nilwo likhuwa liaNyasaye; 18halala nende okhusaba khwosi nokhusaaya; sabenje buli lwosi muRoho, nimuba meeso mukhwo mubulumilifu bwosi nokhusaaya khulwa abatakatifu bosi; 19khandi nende khulwanje, mbu enyalilwe okhurumbukha olwa enjinga omunwa, mbu enzwaninjie akamabiso keinjiili katong'ane, 20eyeneyo eya endi omurume wayo, kata nindabohwa neminyololo. Saayenje mbu emboole katong'ane neitswoni, shinga olwa ekhoyile okhuboola.
Amashiesio akahelelesia
21Mukhoyile okhumanya amakhuwa kanje, shinga olwa endi; Tikiko, omwana weefwe omuheelwa, ouli omukhalabani omwisiikwa muMwami, yakhamumanyie amakhuwa kosi. 22Ndamurumile khwinywe khulwa likhuwa lienelo, mbu mumanye akeefwe shinga olwa kali, khandi mbu amutinyisie emioyo chieenywe.
23Omulembe kube khubaana beefwe, nobuheeli halala nobusuubili, ebirula khuNyasaye ouli Samwana nende Omwami Yesu Kristo. 24Obukoosia bube halala ninabo bosi abamuheelanga Omwami weefwe Yesu Kristo mumela yoburabola ta.
Currently Selected:
Abaefeso 6: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
