Obubali 9
9
Omulukha kwaPasaka
1OMWAMI naboolela Musa mushitsiimi shieSinai, mumwesi kwambeli okwomumuyika kwakhabili okwalonda khukhurula khwabwe mushialo shiaMisiri; ari 2Abaana baIsiraeli bakhole ipasaka munduukho yayo. 3Omwesi kuno nikuli ekhumi nakhane, khubwile, muchikhole munduukho yayo; muchikhole shinga akalachilisibwa khuyo nende akakhalakwa khuyo kosi olwa kali. 4Naye Musa naboolela abaana balsiraeli mbu bakhole ipasaka; 5nibachikhola ipasaka tsana mumwesi kwambeli, khunyanga yekhumi nakhane mumwesi, khubwile, mushitsiimi shieSinai; kosi aka OMWAMI yamulaka Musa shinga olwa kali, nolwa abaana baIsiraeli bakhola bario. 6Ne baliho abasaatsa bandi abali mwibilu khulwa omulambo kwomundu, nibaranyala okhukhola ipasaka khunyanga yeneyo ta; nabo niboola imbeli waMusa naHaruni khunyanga yeneyo; 7abasaatsa tsana nibamureeba bari Ifwe khuli mwibilu khulwa omulambo kwomundu; ne khwikalilwa mbushiina, oburaleera eshihaanwa shiOMWAMI munduukho yashio halala nabaana baIsiraeli ta? 8Naye Musa nabasunjila ari Linde mbeli, embulile aka OMWAMI yeetsa okhulaka khukeenywe.
9OMWAMI naboolela Musa ari 10Boolela abaana baIsiraeli mbu Omundu yesi khwinywe, kata owokhunzibulo tsieenywe, naba nali mwibilu khulwa obukaali bwomulambo, kata naba khuluchendo Iwehale, kata kario akholele OMWAMI ipasaka 11bachikhole mumwesi kwakhabili, khunyanga yekhumi nakhane, khubwile; bachilie halala nemikaate echibulamwo amamela nende eliani lilulu; 12baralekhakhwo eshitonye shiosi shitong'e okhuula mukamba, kata okhufunaka likumba liayo ta; akalachilisibwa khupasaka kosi shinga olwa kali, nolwa balachikhola bario. 13Nebutswa omundu yesi ouba nali omusiiye narali khuluchendo ta, ne nachweya okhukhoia ipasaka, omwenoyo yaakamibwe okhurula mubandu babwe; okhuba shiyaleerile eshihaanwa shiOMWAMI munduukho yashio, kho omundu oyo aleetuukha obwonoonibwe. 14Kata omurende naba namenya mwinywe, niyeenya okhumukholela OMWAMI ipasaka, akalachilisibwa khupasaka nakakhalakwa khupasaka kosi shinga olwa kali, akholenje ario; mubeetsenje nelilako elala kata khulwa omurende kata khulwa omwibule.
Lileesi liafuunikha eshimenyo
(Okhuru. 40.35-38)
15Khunyanga olwa eshimenyo shiasinjisibwa, lileesi tsana liafuunikha eshimenyo, nilio liheema lioburumbusi; ne nibwilile, liali nililikhwo khushimenyo nililolekha shinga omulilo, okhuula olwa bwashia. 16Ne nolwa kali kario tsindaalo tsiosi; mbu lileesi liashifuunikhanga, nililolekha shinga omulilo mushilo. 17Ne buli olwa lileesi liarusibungwakhwo kekulu weliheema, kho olunyumakhwo abaana baIsiraeli babuusia oluchendo; ne habundu ewa lileesi lieekhala, habwenaho abaana baIsiraeli bakhomanga ikambi yabwe. 18Khwilako liOMWAMI abaana baIsiraeli bachendanga, khandi khwilako liOMWAMI bakhomanga ikambi; ne olwa lileesi lieekhala khushimenyo, bamenyayo mukambi yabwe. 19Kata olwa lileesi liashinda khushimenyo tsindaalo tsinyinji, abaana baIsiraeli balinda aka balachilisibwa nOMWAMI, nibarabuusia oluchendo ta. 20Kata olundi lileesi liabeetsanga khwiheema tsindaalo tsinduutu; mana lilako liOMWAMI shinga olwa liali, bamenyanga mukambi yabwe; ne lilako liOMWAMI shinga olwa liali, bachendanga. 21Ne olundi lileesi lialiho okhurula khubwile okhuula olwa bwashia; ne olwa lileesi liarusibwaho mumabwibwi, babuusinjia oluchendo; Ikata nilibayo eshiteere nende eshilo, olwa lileesi liarusibwaho babuusinjia oluchendo. 22Kata nitsialinji tsindaalo tsibili, kata nikuba omwesi, kata omuyika, olwa lileesi liali nilishishindile khushimenyo, niliikhaale khushio, abaana baIsiraeli bamenyanga mukambi yabwe, nibarabuusiakhwo oluchendo ta; ne olwa liarusibwakhwo, babuusinjiakhwo oluchendo. 23Khwilako liOMWAMI bakhupanga ikambi, khandi khwilako liOMWAMI babuusinjia tsinjendo; balindanga aka balachilisibwa nOMWAMI, khwilako liOMWAMI mumunwa kwaMusa.
Currently Selected:
Obubali 9: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
