Obubali 6
6
Amalako khukabaNaziri
1OMWAMI naboolela Musa ari 2Sungana nabaana baIsiraeli, nobaboolela mbu Olwa omundu, kata omusaatsa kata omukhasi, yeetsuba eshiitsubo nabulebe, mbu eshiitsubo shiomuNaziri, khulwa okhwiyahulila OMWAMI, 3kho yeeyahule khudivai namalwa kosi; aranywa idivai eyiraanyile kata amalwa akaraanyile, kata okhunywa khumatsi ketsinzabibu, kata okhuliakhwo khutsinzabibu tsimbisi kata tsinzabibu tsinyumu, ta. 4Tsindaalo tsiosi tsiobwiyahulibwe aleshenje okhuliakhwo khushindu shiosi eshirula khumutsabibu, kata tsimwo kata likhoba butswa ta.
5Mundaalo tsiosi tsieshiitsuboshie shiobwiyahuli, olumwo lwosi luleshenje okhubisibwa khumurwekwe ta; okhuula olwa tsindaalo tsilaba nitsiusiibwe etsia yeeyahulila OMWAMI, abe omutakatifu; aleshe liswi eliokhumurwekwe likhule, libe lirambi.
6Mundaalo tsiosi etsia yeeyahulila OMWAMI aleshenje okhusita ahambi kata khumulambo kwosi. 7Areera mwibilu khulwa samwana, kata khulwa nyina, kata khulwa omusiani wabwe, kata khulwa omukhaana wabwe, olwa bakhaba nibafwa, tawe; okhuba obwiyahulibwe obwa yeeyahulila Nyasaye buli khumurwekwe. 8Mundaalo tsiosi tsiobwiyahulibwe nomutakatifu wOMWAMI.
9Ne omundu naba nafwa meetsukhana ahambi ninaye, niyoonoonia ario omurwekwe okwahulwa, kho yeebeche omurwe khunyanga yokhusiiywakhwe; kubekwe khunyanga yomusaafu. 10Mana khunyanga yomunaane yeetse nende amahuusi kabili kata emisosole chibili chiamakuuku ewomukuhani, hamuliango weliheema liokhwakaana; 11kho omukuhani amale shilala shibe omusango kwobwonooni, neshindi nashio shibe omusango omusambe, namutisa ario; okhuba yoonoonile khulwa omufu. Kho yaahule omurwekwe inyanga yeneyo 12niyeeyahulila OMWAMI tsindaalo tsiobwiyahulibwe, niyeetsa nelikondi lieshimwamwane, kube omusango kweshiuku; ne tsindaalo etsiaranjilila tsilia tsibe butswa, shichila obwiyahulibwe bwoonoonekha.
13Kano niko amalako khukomuNaziri olwa tsindaalo tsiobwiyahulibwe tsiba nitsiusiibwe; mbu aleerwe khumuliango weliheema liokhwakaana; 14mana aleere eshihaanwashie khuMWAMI, mbu likondi lieshimwamwane elala elibula obulema, libe omusango kwokhusambwa, nende lisibini liomuyika mulala elibula obulema libe omusango kwobwonooni, nende limiiku elala elibula obulema libe omusango kwokhwishia, 15nende eshimwelo shiemikaate echibulamwo amamela, namaandasi kobusie obunyushe akatsokasiibwe amafura, nebisikuti ebibulamwo amamela ebibashilwekhwo amafura, nemisango chiabio chieimele, nemisango chiabio chiokhutsushila. 16Naye omukuhani abileere imbeli wOMWAMI, namala omusangokwe kwobwonooni nomusangokwe omusambe. 17Amale limiiku libe omusango kwebihaanwa biokhwishia khuMWAMI, halala neshimwelo shiemikaate echibulamwo amamela; khandi omukuhani amale nende omusango kweimele kwalio, nomusango kwokhutsushila kwalio. 18Mana omuNaziri yeebeche omurwekwe okwahulwa hamuliango weliheema liokhwakaana, nabukula liswi elo liomurwekwe okwahulwa, nalira mumulilo okuli hasi womusango kwebihaanwa biokhwishia. 19Omukuhani naye abukule eshiambeli shielimiiku nishiteeshilwe, neliandasi elala elibulamwo amamela eliomushimwelo, neshisikuti shilala eshibulamwo amamela, nabira khubikalo biomuNaziri, olwa aba namalile okhwibeka omurwekwe okwahulwa. 20Mana omukuhani abichele bibe omusango kwokhuchelwa imbeli wOMWAMI; kuno nomukabo omutakatifu kwomukuhani, halala neitakata eyichelwa neshiatakho shieisadaka; mana olunyuma lwa oko, omuNaziri oyo afuchiililwe okhunywa idivai.
21Kano niko amalako khukomuNaziri owitsuba eshiitsubo, nakeshihaanwa eshia ahaanila OMWAMI khulwa obwiyahulibwe, halala nebindi biosi ebia yakhanyala okhunyoola; eshiitsubo eshia yeetsuba shinga olwa shili, nolwa akhoyile okhukhola ario khulwa amalako khukobwiyahulibwe.
Isaala yabakuhani eyokhusaba ikhabi
22OMWAMI namuboolela Musa ari 23Boolela Haruni nabaanabe mbu Luno nilwo olwa mulabasabilanga abaana baIsiraeli ikhabi, mubasunjile muri;
24OMWAMI akhuheelesie ikhabi, nakhulindai;
25OMWAMI akhwashiekhwo obulafu bwomumonimwe, nakhukoosia obukoosia;
26OMWAMI akhuchinguulile tsimonitsie, nakhuheelesia omulembe.
27Nilwo olwa balareetsanga eliira lianje khubaana baIsiraeli; nasi ndalabaheelesia ikhabi.
Currently Selected:
Obubali 6: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
