Obubali 4
4
Emilimo echia abaLawi balakwa
1OMWAMI naboolela Musa naHaruni ari 2Khaaba obunji bwabaana baKohatsi okhurula mubaana baLawi, munau tsiabwe khandi mubilibwa biabwe, 3okhurula khubemiyika amakhumi kataru nende abashilaho, okhuula khubemiyika amakhumi karaano, bosi abeenjila mubukhalabani obwo, okhukhola emilimo chiomwiheema liokhwakaana. 4Obukhalabani bwabaana baKohatsi mwiheema liokhwakaana, khubindu ebiaahulilwa elala, mbwobuno; 5mbu buli olwa ikambi yili okhurula, Haruni yeenjilemwo nende abaanabe, nibaakula ingubo ishinga yolwichi, nibafuunikha lisanduku lioburumbusi ninayo; 6mana barekhwo eshifuunikho shiamaseelo amanyushe, nibaalakhwo ingubo yeibuluu ikhaya, nibeenjisiamwo tsinyanzo tsialio. 7Mana baale ingubo yeibuluu khumeesa yomukaate kwokhubaho khwanje, nibarakhwo tsingaye, nemiikho, nebisanda, nemiendo chiayo echiokhutsushiilila; nakwo omukaate kwakhatsotso kube khuyo. 8Khubindu ebio baalekhwo ingubo inzakhanyu, nibafuunikhakhwo eshifuunikho shiamaseelo amanyushe, nibeenjisiamwo tsiyanzo tsiayo. 9Babukule ingubo yeibuluu, nibafuunikha eshichibi shietsitaha tsiobulafu, netsitaha tsiashio, namahana kashio, netsindaabo, nebichinjilo biamafura biosi ebia beekhoonyelanga nibashikhalabanila 10nibashiinjisia, halala nebimanulwa biashio biosi, mushifuunikho shiamaseelo amanyushe, nibashira khumusekaseka. 11Mana baale ingubo yeibuluu khushimalilo shieitsahaabu, nibafuunikhakhwo eshifuunikho shiamaseelo amanyushe, nibeenjisiamwo tsinyanzo tsiayo; 12nibabukula ebimanulwa biosi biobukhalabani, ebia beekhoonyelanga nibakhalabanila habundu ahatakatifu, nibabifuuma mungubo yeibuluu, nibafuunikhakhwo eshifuunikho shiamaseelo amanyushe, nibabira khumusekaseka. 13Bayinieho likoshe eliokhushimalilo, nibaalakhwo ingubo yeisambarau; 14nibara khuyo ebimanulwa biashio biosi, ebia beekhoonyelanga nibakhalabanila enashimalilo, mbu tsindaabo tsiomulilo, namakhango, nemiikho, netsingaye, ebimanulwa biosi bieshimalilo; nibaala khushio eshifuunikho shiamaseelo amanyushe, nibeenjisiamwo tsinyanzo tsiashio. 15Mana olwa Haruni nabaanabe baba nibamalile okhufuunikha habundu ahatakatifu nebimanulwa biosi biahabundu ahatakatifu, ikambi niyili okhurula, olunyumakhwo abaana baKohatsi beetse okhubichinga; nebutswa baleshe okhutiilakhwo khubindu ebitakatifu; bakhafwa. Ebindu ebio nibio ebia abaana baKohatsi bachinga khubieliheema liokhwakaana.
16Ne ebileshelwa Eleazari waHaruni omukuhani nibio amafura ketsitaha, namalesi kelibuuliesi keisuuswa, nomusango kweimele kwakhatsotso, namafura akokhutsushiililwa; nende obusinjilili bweshimenyo shiosi, nobwabiosi ebilimwo, nahabundu ahatakatifu, nende ebimanulwa biaho.
17OMWAMI naboolela Musa nende Haruni, ari 18Murasishia oluyia Iwetsinzu tsiabaKohatsi mubaLawi ta; 19ne mubakholele muri nanwa, babeetsenje mwoyo nibarafwa ta olwa basita ahambi khubindu ebio ebiahulilwa elala; mbu Haruni nabaanabe beenjilemwo, nibabara buli mundu khubukhalabanibwe nomusiikokwe; 20ne abeene shibaleenjilamwo okhulolakhwo ebindu ebitakatifu nahatuutu ta; bakhafwa.
21OMWAMI naboolela Musa ari 22Khaaba obunji bwabaana baGereshoni bosi, mubilibwa biabwe khandi munzu tsiabwe; 23okhurula khubemiyika amakhumi kataru nende abashilaho okhuula khubemiyika amakhumi karaano, obabale; bosi abeenjila okhukhalabana mubukhalabani obwo, okhukhola emilimo echiomwiheema liokhwakaana. 24Obukhalabani bwabetsinzu tsiabaGereshoni mbwobuno, mukhukhalabana nokhuchinga emisiiko; 25mbu bachinjenje tsingubo tsinzeleesia tsieshimenyo, neliheema liokhwakaana, neshifuunikho shialio, neshifuunikho shiamaseelo amanyushe eshibeetsanga hekulu khulio, nolwichi Iwomuliango kweliheema liokhwakaana; 26netsingubo tsinzeleesia tsiolwanyi, nolwichi Iwobwinjililo bweshilibwa shilwanyi oubotokhana eshimenyo neshimalilo shiemisango, nemikoye chiatsio, nebimanulwa biosi biobukhalabani bwatsio; balakhalabana nibakhola kosi akeenya okhutsikholelwa 27Obukhalabani bwosi bwabaana baGeresho bube shinga Haruni nabaanabe olwa balaka; mubiosi ebia bachinga nomukosi aka bakhola; mubalache ebia baleshelwa okhuchinga Shinf olwa bili. 28Buno nibwo obukhalabani bwabetsinzu tsiabaana baGereshoni mukeliheema liokhwakaana; ne aka baleshelwa kabe mumukhor kwaItsamari waHaruni omukuhani.
29Mana akabaana baMerari; obabale munzu tsiabwe khandi mubilibwa biabwe; 30okhurula khubemiyika amakhumi kataru nende abashilaho, okhuula khubemiyika amakhumi karaano, obabale, buli mundu owinjila mubukhalabani obwo, okhukhola emilimo chieliheema liokhwakaana. 31Bino nibio ebia baleshelwa okhuchinga, obukhalabani bwabwe bwosi mukeliheema liokhwakaana shinga olwa buli; mbu ebitiisi bieshimenyo netsisheti tsiabio, netsisiilo tsiabio, nebichibi biabio; 32netsisiilo tsiolwanyi olubotokhanaho, nebichibi biatsio, nebibambo biatsio, nemikoye chiatsio, nebimanulwa biatsio biosi, nebiobukhalabani bwatsio bwosi; ne olachilisie ebindu biene ebia baleshelwa okhuchinga, ameera kabio kosi. 33Buno nibwo obukhalabani bwabetsinzu tsiabaana baMerari, obukhalabani bwabwe bwosi mukeliheema liokhwakaana shinga olwa buli, nibuli mumukhono kwaItsamari waHaruni omukuhani.
34Kho Musa naHaruni nabakhulundu bomukhung'aano nibabala abaana babaKohatsi, munzu tsiabwe khandi mubilibwa biabwe, 35okhurula khubemiyika amakhumi kataru nende abashilaho, okhuula khubemiyika amakhumi karaano, buli mundu oweenjila mubukhalabani obwo, khulwa emilimo chieliheema liokhwakaana; 36nabo ababalwa khubomunzu tsiabwe bali ebikhumila bibili ebikhumi musaafu namakhumi karaano. 37Bano nibo ababalwa khubetsinzu tsiabaKohatsi, bosi abakhalabananga mwiheema liokhwakaana, aba Musa naHaruni babala, lilako liOMWAMI mumunwa kwaMusa shinga olwa liali.
38Nabo ababalwa abokhubaana baGereshoni, munzu tsiabwe khandi mubilibwa biabwe, 39okhurula khubemiyika amakhumi kataru nende abashilaho, okhuula khubemiyika amakhumi karaano, buli mundu oweenjila mubukhalabani obwo, khulwa emilimo chieliheema liokhwakaana, 40ababalwa khubo munzu tsiabwe khandi mubilibwa biabwe, bali ebikhumila bibili ebikhumi bisasaba namakhumi kataru. 41Bano nibo ababalwa khubetsinzu tsiabaana baGereshoni, bosi abakhalabananga mwiheema liokhwakaana, aba Musa naHaruni babala, lilako liOMWAMI shinga olwa liali.
42Nabo ababalwa khubetsinzu tsiabaana baMerari, munzu tsiabwe khandi mubilibwa biabwe, 43okhurula khubemiyika amakhumi kataru nende abashilaho, okhuula khubemiyika amakhumi karaano, buli mundu oweenjila mubukhalabani obwo, khulwa emilimo chieliheema liokhwakaana, 44ababalwa khubo munzu tsiabwe bali ebikhumila bitaru nebikhumi bibili. 45Bano nibo ababalwa khubetsinzu tsiabaana baMerari, aba Musa naHaruni babala, lilako liOMWAMI mumunwa kwaMusa shinga olwa liali.
46Bosi ababalwa khubaLawi, aba Musa naHaruni nabakhulundu baIsiraeli babala, munzu tsiabwe khandi mubilibwa biabwe, 47okhurula khubemiyika amakhumi kataru nende abashilaho, okhuula khubemiyika amakhumi karaano buli mundu oweenjila okhukhola emilimo chiobukhalabani, nemilimo chiokhuchinga emisiiko, mukeliheema liokhwakaana, 48ababalwa khubo bali ebikhumila munaane ebikhumi biraano namakhumi munaane. 49Lilako liOMWAMI mumunwa kwaMusa shinga olwa liali, nolwa bareebwa buli mundu khubukhalabanibwe nokhubuchinji bwemisiiko; yababala ario, shinga OMWAMI olwa yalaka Musa.
Currently Selected:
Obubali 4: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
