Obubali 35
35
Amataala kabalawi
1Mana OMWAMI nasungana nende Musa mumuhololookhwe kwaMoabu ahambi naYorodani eYeriko, namuboolela mbu 2Laka abaana baIsiraeli mbu khubulaame obuli obwabwe baheelesie abaLawi amataala akokhumenyamwo; khandi muheelesie abaLawi obwayilo obubotokhana amataala tsana. 3Amataala ako kabe akabwe okhumenyamwo; nabwo obwayilo bube bwemiruko chiabwe, nemiandu chiabwe, nebiayo biabwe biosi. 4Ne obwayilo bwamataala ako, obwa mulaheelesia abaLawi, burule khulukoba Iwelitaala nibutsiililila khuburambi bwamakhono eshikhumila tsimbeka tsiosi. 5Muchele elwanyi welitaala, khulwa olubeka Iwebukwe amakhono ebikhumila bibili, khulwa olubeka Iwesautsi amakhono ebikhumila bibili, khulwa olubeka lwamumbo amakhono ebikhumila bibili, khandi khulwa olubeka Iwenotsi amakhono ebikhumila bibili, litaala liene niliba hakari. Obwo bulababeela obwayilo bwamataala ako. 6Ne amataala aka mulaheelesia abaLawi kabe amataala kasasaba kobwilushilo, aka mulahaana khulwa omwiri yesi okhwilushilayo; khandi mulabaheelesia amataala kandi amakhumi kane nakabili. 7Amataala ako kosi aka mulaheelesia abaLawi kalaba amataala amakhumi kane namunaane; mulakahaana halala nobwayilo bwako. 8Ne khumakhuwa kamataala ako aka mulahaana, okhurula khukali akabaana baIsiraeli, aha kali amanji mubukule amanji; naha kali amatuutu mubukule amatuutu; buli mundu obulaamebwe obwa alaamilwa shinga olwa buli, nolwa alaheelesia abaLawi akokhumataalake.
Amataala kobwilushilo
(Okhuka. 19.1-13; Yos. 20.1-9)
9Mana OMWAMI naboolela Musa ari 10Osungane nabaana baIsiraeli nobaboolela mbu Olwa mulaambukha Yorodani nimwinjila mushialo ShiaKanaani, 11mulalobola amataala kandi kamubeele amataala keenywe kobwilushilo; mbu omwiri yesi ouba niyeetsukhana niyeera omundu Yeelushileyo. 12Amataala tsana kalamubeela obwilushilo, ewa mulatsiitsanga nimwilukha o numali weshikwoli, mbu omwiri oyo aleshe okhufwa okhuula olwa alasinjila imbeli womukhung'aano okhuyaasibwa. 13Amataala ako aka mulahaana kalamubeela amataala kasasaba kobwilushilo. 14Muhaane amataala kataru akali injelekha weYorodani, khandi muhaane amataala kataru akali mushialo shiaKanaani, kabe amataala kobwilushilo. 15Khubaana baIsiraeli, kata khumurende kata omumenyibwa ouba mubo, amataala ako kasasaba kalababeela obwilushilo; mbu omundu yesi ouba niyeetsukhaane niyeera omundu yeelushileyo.
16Nebutswa naba namuupile neshikholelo shieshibia shiosi, mana nafwa, kho nomwiri; ne omwiri, yeerwe bwirwa. 17Kata naba namuupile nelichina elia abeere ninalio mumukhono, eliakhanyala okhuchila omundu afwe, kho nomwiri; ne omwiri, yeerwe bwirwa. 18Kata naba namuupile neshimanulwa shieshisala eshia abeele ninashio mumukhono, eshiakhanyala okhuchila omundu afwe, mana nafwa, kho nomwiri; ne omwiri, yeerwe bwirwa. 19Omumali weshikwoli shiamabanga omwene yeere omwiri oyo; olwa aba nabukaana ninaye, amwire. 20Ne naba namufumira khulwa obukiyi; kata naba namulasa neshindu shiosi namukonesheele, mana nafwa; 21kata namuupa nomukhono khulwa obusuku, mana nafwa; kho oyo oumuupile, yeerwe bwirwa; nomwiri; omumali weshikwoli shiamabanga yeere omwiri oyo; olwa aba nabukaana ninaye, amwire.
22Nebutswa naba namufumira meetsukhana, harali obusuku bwosi ta; kata namulasa neshindu shiosi, ne naramukonesheele ta; 23kata naba nelichina liosi eliakhanyala okhuchila omundu afwe, nalimufuubila oburamulola ta, mana nafwa, ne naralinji omusukuwe ta, kata narakhaabanga okhumukholela libii ta; 24kho omukhung'aano kulayaasia hakari womwiri nende omumali weshikwoli shiamabanga, obukhalachi buno bwosi shinga olwa buli. 25Nakwo omukhung'aano kulahonia omwiri oyo mumukhono kwomumali weshikwoli shiamabanga; khandi omukhung'aano kulamukalusia mwitaala liobwilushilobwe ewa yali niyeelushiile; naye alamenyangamwo okhuula khukhufwa khwomukuhani omukhulundu, oyo owatsushiililwa amafura amatakatifu. 26Nebutswa omwiri oyo naba natsia olundi nabira khulwakho Iwelitaala liobwilushilobwe, ewa yeelushila, 27mana omumali weshikwoli shiamabanga namunyoola nali elwanyi wolwakho Iwelitaala liobwilushilobwe, naye omumali weshikwoli shiamabanga namwira omwiri oyo; kho shialaba neshiina shiamabanga ta. 28Shichila ulia yali nakhoyile okhutong'a mwitaala liobwilushilobwe okhuula khukhufwa khwomukuhani omukhulundu; nebutswa olunyuma wokhufwa khwomukuhani omukhulundu omwiri oyo akalushe mushialo eshili eshishie.
Amalako khukobuloli nende khubwinunuli
29Ne amakhuwa kano kalamubeela obukhalachi obulachilisibwa munzibulo tsieenywe tsiosi, mubimenyo bieenywe biosi. 30Owira omundu yesi, omwiri oyo yeerwe khuminwa chiabaloli; ne omuloli mulala shialanyala okhurumbula amakhuwa khumundu yesi wachila nafwa ta. 31Khandi murabukule eshinunulo shiosi khulwn obulamu bwomwiri owa eshiina shiokhufwa shifwiliile ta; habula yeerwe bwirwa. 32Kata murabukule eshinunulo shiosi khulwoyo owiluushe natsia mwitaala liobwilushilobwe ta, mbu akalushe okhumenya mushialo, okhuula olwa omukuhani omukhulundu alaba nafwile. 33Muroonoonia murio eshialo omwa muli ta; okhuba amabanga koonooninjia eshialo; ne eshialo shishinyala okhutisilwa amabanga akeebeenibwamwo ta, habula namabanga ka oyo owakeebeenia. 34Kata oroonoonia eshialo eshia mumenyangamwo ta, eshia nasi emenyanga hakari washio; okhuba isie OMWAMI emenyanga hakari wabaana baIsiraeli.
Currently Selected:
Obubali 35: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
