Obubali 31
31
Eshikwoli KhubaMidiani, nende akokhusiiyzoa khwebiyaayo
1Mana OMWAMI naboolela Musa ari 2Malila abaana baIsiraeli eshikwoli khubaMidiani; mana olunyumakhwo olalonda abandubo. 3Musa nababoolela abandu ari Mumanule abasaatsa bandi khwinywe mbu batsie mwihe, batsie okhuseera Midiani, okhumala eshikwoli shiOMWAMI khuMidiani. 4Khubuli luyia mubukule abandu eshikhumila, khumbia tsiosi tsiaIsiraeli, mubarume mwihe. 5Kho nibarusibwa bario mubikhumila biaIsiraeli, eshikhumila khubuli luyia, mbu ebikhumila ekhumi nabibili, nibeemanuliile lihe. 6Mana Musa nabaruma mwihe, eshikhumila eshiokhubuli luyia, halala nende Finehasi waEleazari omukuhani, nebimanulwa biahabundu ahatakatifu netsitarumbeta tsioluhungu mumakhonoke. 7Nibaseera Midiani shinga OMWAMI olwa yamulaka Musa; nibeera abasaatsa bosi pe. 8Nibeera nende abaruchi baMidiani halala nabeerwa babwe bandi; mbabano, mbu Ewi, naRekemu, naZuri, naHuri, naReba, abaruchi baraano bosi baMidiani; nende Balaamu waBeori yesi, bamwira nolukanga. 9Abaana baIsiraeli nibahamba abakhasi baMidiani imbambe, halala nabaana babwe abatiiti, nibabukula tsing'ombe tsiabwe tsiosi, nebiayo biabwe biosi, nemiandu chiabwe chiosi, nibikwa ebioluyiitsi. 10Namataala kabwe kosi, habundu ewa bamenyanga, namaheema kabwe kosi, basamba nomulilo. 11Nibabukula ebiyaayo biosi, nebioluyiitsi biosi, khubandu nende khumiruko. 12Nibaleera abahambe abo, nebioluyiitsi, nebiyaayilwe, ewaMusa naEleazari omul uhani, newomukhung'aano kwabaana baIsiraeli, mukambi eyomumuhololookhwe KwaMoabu, ahambi nende Yorodani eYeriko.
13Kho Musa naEleazari omukuhani nabakhulundu bosi bomukhung'aano nibarula nibatsia okhubaakanila, elwanyi weikambi. 14Naye Musa yatiililwa abasinjilili bamahe oburima, nibo abaseesia bebikhumila nabaseesia bebikhumi, abarula mubukhalabani bwelihe. 15Musa nabareeba ari Kho muhonokosiye abakhasi bosi? 16Lole, bano nibo abachila abaana baIsiraeli nibakholela OMWAMI akobukhobani mwikhuwa liaPeori khulwa obuchesiyii bwaBalaamu; ne niko akachila oluumbe nilubaho mumukhung'aano kwOMWAMI. 17Kho bulaano mwire buli musiani mubaana abatiiti, khandi mwire buli mukhasi owamanya omusaatsa khulwa okhukona ninaye. 18Ne abakhaana, abarashiamanya omusaatsa khulwa okhukona ninaye ta, mwibiishile abeene nibali mwoyo. 19Neenyu, mukhome amaheema keenywe elwanyi weikambi tsindaalo musaafu; omundu yesi owirile omundu, kata outiililekhwo khuwirilwe, mwisiiye khunyanga yakhataru khandi khunyanga yomusaafu, inywe abeene nende abahambe beenywe. 20Musiiye nende buli ngubo yosi, nebindu biosi biaimaseelo, nebindu biosi ebiakholelwa obwoya bwetsimbusi, nebindu biosi biemisaala.
21Naye Eleazari omukuhaani nasunjila abasaatsa abo belihe, abatsia mukhulasana, ari Iiano niko akalachilisibwa mumalako aka OMWAMI yamulaka Musa, 22nebutswa ebieitsahaabu, neifeetsa, nomukasa, neshibia, neibaati, netsisasi, 23mbu biosi ebiranyala okhuyia mumulilo ta, mubibisie mumulilo, mana bibe ebisiiye; nebutswa bisiiyilwe khandi namanyaasi kobwonooneshi; ne ebiakhanyala okhuyia mumulilo, mubibisie mumatsi. 24Khandi mwosie tsingubo tsieenywe khunyanga yomusaafu, mana mube abasiiye; mana olunyumakhwo mwinjile mukambi.
Obukabuli bwebiyaayo
25Mana OMWAMI naboolela Musa ari 26Obale obunji bwebioluyiitsi ebiahambilwe, khubandu nende khumiruko, iwe omwene naEleazari omukuhani, nabemilisi bebilibwa biabwe; 27mana mukabule ebioluyiitsi ebitonye bibili; mbu hakari wabaseeri abatsia mubusoolo, nende abomukhung'aano kwosi. 28Muroosilie OMWAMI omurungo khubandu abo belihe abatsia mukhulasana, mbu shilala mubikhumi biraano, khubandu, nokhung'ombe, nokhusishili, nende khubiayo 29Okubukule khushitonye shiabwe, nokumuheelesia Eleazari omukuhani, khulwa isadaka yOMWAMI. 30Ne khushitonye eshili shiabaana baIsiraeli, obukule shilala eshiyinibwa mubuli makhumi karaano, khubandu, khung'ombe, khusishili, nende khubiayo, mbu khumiruko chiosi, nobaheelesia abaLawi, abalindanga eshimenyo shiOMWAMI eshia baleshelwa. 31Nabo Musa naEleazari omukuhani nibakhola shinga OMWAMI olwa yamulachilisia Musa.
32Ne ebitong'ile khubioluyiitsi ebia abandu abo belihe bayaaya, mbiebino; mbu amakondi ebikhumila ebikhumi bisasaba namakhumi musaafu nakaraano, 33netsing'ombe ebikhumila amakhumi musaafu nabibili, 34netsisishili ebikhumila amakhumi kasasaba nasnilala, 35nende abandu ebikhumila amakhumi kataru nabibili, bosi halala, abali abakhaana abarashiamanya omusaatsa khulwa okhukona ninaye ta. 36Ne eshitonye shiabio, eshiali omukabo kwabo abatsia mwihe, obunji bwabio mbwobuno; mbu amakondi ebikhumila ebikhumi bitaru namusaafu nebikhumi biraano. 37Ne omurungo kwOMWAMI khumakondi ako kwali ebikhumi bisasaba amakhumi musaafu nakaraano. 38Natsio tsing'ombe tsiali ebikhumila amakhumi kataru nabisasaba; ne khutsio omurungo kwOMWAMI kwali amakhumi musaafu natsibili. 39Natsio tsisishili tsiali ebikhumila amakhumi kataru nebikhumi biraano; ne khutsio omurungo kwOMWAMI kwali amakhumi kasasaba nandala. 40Nabo abandu bali ebikhumila ekhumi nabisasaba; ne khubo omurungo kwOMWAMI kwali abandu amakhumi kataru nababili. 41Kho omurungo okwo kwosi, nikwo isadaka yOMWAMI, Musa yamuheelesia Eleazari omukuhani, shinga OMWAMI olwa yamulaka Musa.
42Ne eshitonye shiabio eshiali shiabaana baIsiraeli, eshia Musa yakabula narusia khubandu abo abatsia mwihe 43ne eshitonye eshio shiabomukhung'aano shiali amakondi ebikhumila ebikhumi bitaru namakhumi kataru namusaafu nebikhumi biraano, 44netsing'ombe ebikhumila amakhumi kataru nabisasaba, 45netsisishili ebikhumila amakhumi kataru nebikhumi biraano, 46nende abandu ebikhumila ekhumi nabisasaba 47mushitonye eshio eshiali shiabaana baIsiraeli, Musa yabukula shilala eshiayinibwa mubuli makhumi karaano, khubandu nende khumiruko, nabaheelesia abaLawi, abalindanga eshimenyo shiOMWAMI eshia baleshelwa; shinga OMWAMI olwa yamulachilisia Musa.
48Nabo abasinjilili abali ikulu webikhumila bielihe, mbu abaseesia bebikhumila nabaseesia bebikhumi, bamusitila Musa ahambi, 49nibamusunjila Musa bari Ifwe abasumbabo khubalile obunji bwabasaatsa belihe abali mubulindi bwefwe, ne shibaleemilekhwo omundu kata mulala ta 50Ne khuleerile eshihaanwa shiOMWAMI, khubindu ebia buli mundu anyoolile, mbu ebimili bieitsahaabu, nemikotse, nemikasa, netsingaka tsieshibalikho, netsingaka etsiomushirwi, nebichechele, mbu khutiswe imbeli wOMWAMI. 51Nabo Musa naEleazari omukuhani nibabukula tsitsahaabu etsia baleera, tsiosi nitsili ebimili ebiiraanye. 52Ne tsitsahaabu tsiosi tsieisadaka eya bahaanila OMWAMI, eya abaseesia bebikhumila nabaseesia bebikhumi baleera, tsiali tsishekeli ebikhumila ekhumi nabisasaba nebikhumi musaafu namakhumi karaano. 53Okhuba abasaatsa belihe bali nibayaayile ebiyaayo, buli mundu khululwe. 54Nabo Musa naEleazari omukuhani nibabukula tsitsahaabu etsio etsia abaseesia bebikhumila nabebikhumi baleera, nibatsileera mwiheema liokhwakaana, tsibe eshiitsulilo shiabaana haIsiraeli imbeli wOMWAMI.
Currently Selected:
Obubali 31: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
