Obubali 30
30
Amalako khukebiitsubo biabakhasi
1Mana Musa nasungana nabeemilisi betsimbia tsiabaana baIsiraeli, nababoolela mbu Kano niko aka OMWAMI alachilisiye; 2mbu olwa omundu yeetsubila OMWAMI eshiitsubo, kata niyeetsuba okhwibohela omusingo, aleshe okhwonoonia likhuwalie; akhole kosi shinga olwa kali aka aboolile nomunwakwe. 3Kata olwa omundu weshikhasi yeetsubila OMWAMI eshiitsubo, kata niyeebohela omusingo, ne nali munzu yasamwana, nashili omukhaana; 4naye samwana nahulila akeshiitsuboshie, nakomusingo okwa yeeboheele, ne samwana namuholeelela; kho ebiitsubobie biosi bisinjile, khandi emisingo echia yeebohela chiosi chisinjile. 5Nebutswa samwana naba namufukula khunyanga olwa ahulilakhwo, kho ebiitsubobie biosi, kata emisingo chiosi echia yeeboheele, shichilasinjilakhwo ta; ne OMWAMI alamuleshela, shichila samwana yamufukula.
6Ne naba niyatsia khumusaatsa olwa ebiitsubobie bili khuye, kata amakhuwa amakhaya aka yaboola nomunwakwe, niyeeboha ninako, 7naye omusaatsawe nahulilakhwo, namuholeelela khunyanga olwa ahulilakhwo; kho ebiitsubobie bisinjile, nemisingo echia yeeboheele chiosi chisinjile. 8Nebutswa omusaatsawe naba namufukula khunyanga olwa ahulila, kho yeera ario eshiitsuboshie eshili khuye, namakhuwa amakhaya aka yaboola nomunwakwe niyeeboha ninako; ne OMWAMI alamuleshela. 9Nebutswa eshiitsubo shiomukhasi omulekhwa, kata eshia oyo owakabukhasibwa nomusaatsawe, kata eshindu shiosi eshia yeeboheele, bisinjile khuye. 10Ne naba niyeetsuba olwa yali nali munzu yomusaatsawe, kata okhwibohela omusingo neshiitsubo, 11omusaatsawe niyahulilakhwo, ne namuholeelela naramufukula ta; kho ebiitsubobie biosi bisinjile, khandi emisingo echia yeeboheele chiosi chisinjile. 12Habula omusaatsawe naba niyabiira nabikhola ebiabutswa khunyanga olwa yabihulilakhwo, kho ako kosi aka yaboola nomunwakwe khukebiitsubobie, kata khumusingo okwa yayeesinjile, shibilasinjila ta; omusaatsawe yabiira; ne OMWAMI alamuleshela. 13Buli shiitsubo, kata buli musingo okwa yeebohela okhwisandia omwene, omusaatsawe anyala okhushisinjisia, kata omusaatsawe anyala okhushiira. 14Nebutswa omusaatsawe naba namuholeelee-langa elala khatsotso, kho aba nasinjisiye ebiitsubobie biosi, kata emisingochie chiosi, ebili khuye; abisinjisiye, okhuba yamuholeelela khunyanga olwa yabihuliililakhwo. 15Nebutswa naba nabiira nabikhola ebiabutswa olunyumakhwo, niyamala okhubihulilakhwo khale, kho yeetuushe obumayaanu bwomukhasiwe.
16Kano niko akalachilisibwa, aka OMWAMI yamulaka Musa, hakari womusaatsa nomukhasiwe, khandi hakari wasamwana nomukhaanawe, olwa ashili omukhaana munzu yasamwana.
Currently Selected:
Obubali 30: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
