Obubali 28
28
Akebihaanwa biakhatsotso
(Okhuru. 29.38-46)
1Mana OMWAMI naboolela Musa ari 2Olache abaana baIsirzeli nobasunjila mbu Eshihaanwa shianje, ebiliibwa bianje biebihaanwa bianje ebikholelwa omulilo, ebieshiuya eshilayi khwisie, mwitsulilenje okhubimbeelesia munduukho tsiabio. 3Obaboolele mbu Shiro nishio eshihaanwa eshikholelwa omulilo eshia olahaanilanga OMWAMI; mbu amakondi keshimwamwane akabula obulema, kabili inyanga buli nyanga, kabe omusango omusambe kwakhatsotso. 4Likendi lieshimwamwane elala omalenje musenya, ne likondi lieshimwamwane elindi omalenje mungoloobe, 5halala nende eshitonye shielikhumi shia efa yobusie obunyushe khulwa omusango kweimele, obutsokasiibwemwo amafura amaswache eshitonye shiakhane shia hini. 6Nikwo omusango omusambe kwakhatsotso, okwalachilisibwa mushikulu shiaSinai khulwa eshiuya eshilayi, eshihaanwa eshikholelwa omulilo khuMWAMI. 7Ne omusango kwokhutsushilwa kwalio kube eshitonye shiakhane shia hini khwikondi elala. Habundu ahatakatifu yaho, otsushiilile OMWAMI omusango kwokhutsushilwa kwamalwa. 8Nalio likondi lieshimwamwane lindi, omalenje mungoloobe; omusango kweimele okweisenya shinga olwa kuli, nende omusango kwokhutsushilwa kwalio, nolwa olalimala; eshihaanwa eshikholelwa omulilo, eshieshiuya eshilayi khuMWAMI.
Ebihaanwa bieisabato nende ebiomwesi
9Ne khunyanga yasabato kabe amakondi keshimwamwane kabili akabula obulema, halala nebitonye bibili bia efa yobusie obunyushe khulwa omusango kweimele, obutsokasiibwemwo amafura, nomusango kwokhutsushilwa kwako; 10okwo nikwo omusango omusambe kwabuli nyanga yasabato, halala nende omusango omusambe kwakhatsotso, nomusango kwokhutsushilwa kwakwo.
11Ne khukhuchaaka khwemiesi chieenywe mumalile OMWAMI omusango omusambe; mbu tsihuunwa tsibili, nelimiiku elala, namakondi keshimwamwane musaafu akabula obulema; 12nebitonye bitaru bielikhumi bia efa ebiobusie obunyushe khulwa omusango kweimele, obutsokasiibwemwo amafura, khulwa buli huunwa; nebitonye bibili bielikhumi biobusie obunyushe khulwa omusango kweimele, obutsokasiibwemwo amafura, khulwa limiiku elo elala; 13khandi eshitonye shindi shilala shielikhumi shiobusie obunyushe obutsokasiibwemwo amafura khulwa omusango kweimele kwabuli likondi; khulwa omusango omusambe kweshiuya eshilayi; eshihaanwa eshikholelwa omulilo khuMWAMI. 14Ne emisango chiokhutsushilwa chiabio chibe eshitonye shia hini yeidivai khulwa ihuunwa, neshitonye shiokhutaru shia hini khulwa limiiku, neshitonye shiakhane shia hini khulwa likondi lieshimwamwane; okwo nikwo omusango omusambe kwabuli mwesi okhumala emiesi chiomuyika. 15Khandi ikhole ndala khulwa omusango kwobwonooni khuMWAMI; yo yimalwe, halala nende omusango omusambe kwakhatsotso, nomusango kwokhutsushilwa kwayo.
Ebihaanwa bietsinduukho tsiamasabo
16Ne mumwesi kwambeli, nikuli ekhumi nakhane, neipasaka yOMWAMI. 17Mana omwesi okwo nikuli ekhumi nakharaano, lisabo libeho; omukaate okubulamwo amamela kuliibungwe tsindaalo musaafu. 18Khunyanga yambeli mubeetsenje nomukhung'aano omutakatifu; murakholakhwo omulimo kwosi okwobukhalabani ta; 19ne muhaane eshihaanwa eshikholelwa omulilo, omusango omusambe khuMWAMI; mbu tsihuunwa tsibili, nelimiiku elala, namakondi akeshimwamwane musaafu; mukoonye bileshe okhuba nobulema bwosi; 20nemisango chiabio chieimele, nichio obusie obunyushe obutsokasiibwemwo amafura; muhaane ebitonye bitaru bielikhumi khulwa ihuunwa, khandi ebitonye bibili bielikhumi khulwa limiiku elo; 21khandi ohaane eshitonye shindi shielikhumi khulwa buli likondi khumakondi keshimwamwane ako musaafu; 22neikhole ndala khulwa omusango kwobwonooni, eyeshitiso. 23Mumale ebio, halala nende omusango omusambe okwomusenya, okubeetsanga omusango omusambe kwakhatsotso. 24Ne nilwo olwa mulamalanga, inyanga buli nyanga, tsindaalo musaafu, ebiliibwa bieshihaanwa eshikholelwa omulilo, eshieshiuya eshilayi khuMWAMI; ebio bimalwe, halala nende omusango omusambe kwakhatsotso, nomusango kwokhutsushilwa kwabio. 25Mana khunyanga yomusaafu mube nomukhung'aano omutakatifu; murakholakhwo omulimo kwosi okwobukhalabani ta.
26Khandi khunyanga yebirongole ebiomwichesa, olwa muleerela OMWAMI omusango kweimele imbia mwisabo liamahonga, mube nomukhung'aano omutakatifu; murakholakhwo omulimo kwosi okwobukhalabani ta, 27ne muleere omusango omusambe kube eshiuya eshilayi khuMWAMI; mbu tsihuunwa tsibili, nelimiiku elala, namakondi keshimwamwane musaafu; 28nemisango chiabio chieimele, mbu obusie obunyushe obutsokasiibwemwo amafura, ebitonye bitaru bielikhumi khulwa buli huunwa, nebitonye bibili bielikhumi khulwa limiiku elala, 29neshitonye shindi shielikhumi khulwa buli likondi khumakondi keshimwamwane ako musaafu; 30khandi ikhole ndala yeshitiso. 31Halala nomusango omusambe kwakhatsotso, nomusango kweimele kwakwo, mubimalenje ebio, nemisango chiabio chiokhutsushilwa, mukoonye bileshe okhuba nobulema bwosi.
Currently Selected:
Obubali 28: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
