Obubali 22
22
Balaki yarumana Balaarmu
1Abaana baIsiraeli nibachenda, nibakhupa ikambi mumuhololookhwe kwaMoabu injelekha waYorodani eYeriko. 2Naye Balaki waZipori yalola kosi aka Isiraeli yali nakholeele abaAmori. 3Ne Moabu yaria abandu abo muno shichila bali abanji; ne Moabu nafwa omwoyo khulwa abaana baIsiraeli. 4Kho Moabu nasunjila abakofu baMidiani ari Omukanda kuno kulakhomba biosi ebikhubotokhaane kubimale, shinga ing'ombe olwa yikhomba obunyasi obwomubwayilo. Ne Balaki waZipori yali omuruchi waMoabu mundaalo etsio. 5Naye narumila Balaamu waBeori abarume, ePetsori, ahambi nOmwalo okwo, mushialo shiabaana baAmau namulanga, ari Lola, luliho oluyia lwabandu olurulile muMisiri; lola, bamaamile khushialo shiosi, nibamenya ahahengaane ninasi. 6Khulwako ekhusaaya mbu witse bulaano, unaamile abandu bano eshilaamo shiobubii; okhuba bayombile amaani. Mana haundi khulanyala okhubahula, khubeelusie mushialo; okhuba emanyile mbu owa osabila ikhabi aheebwa ikhabi, ne owa olaama eshilaamo shiobubii, aba mushilaamo shiobubii ario.
7Mana abakofu baMoabu nabakofu baMidiani nibarulaho nibali nende emirungo chiobulakusi mumakhono; nibatsiila Balaamu, nibamuboolela amakhuwa kaBalaki. 8Naye nabakalusia ari Mulakona hano, ne nemukalusie likhuwa shinga OMWAMI olwa nayamboolele. Kho abakhulundu baMoabu nibakonaho ewaBalaamu. 9Ne OMWAMI namwitsila Balaamu nareeba mbu Nabandu shiina bano aba oli nibabo? 10Balaamu namukalusia Nyasaye ari Balaki waZipori, omuruchi waMoabu, arumile abandu ababoola mbu 11Lola, oluyia lwabandu olurulile muMisiri lumaamile khushialo shiosi; kho bulaano witse undachile eshilaka munwa abandu bano; haundi ndalanyala okhubaseera nimbeelusia. 12Mana Nyasaye namusunjila Balaamu ari Oratsia ninabo ta; oralaama abandu abo eshilaamo shiobubii ta; shichila nabeikhabi. 13Iiho Balaamu yahachila okhubuukha, nasunjila abakhuundu baBalaki ari Kalushe mushialo shieenywe; okhuba OMWAMI yangaaniye oburatsia nineenywe ta. 14Abakhulundu baMoabu nibarula, nibatsia ewaBalaki, nibaboola bari Balaamu alobile okhwitsa nineefwe.
15Mana Balaki yaruma abakhulundu bandi khandi, ababashila obunji khandi oluyali. 16Nabo niboola ewaBalaamu, nibamusunjila mbu Balaki waZipori aboola ari Ekhusaaya, orafuchiilila likhuwa liosi likhuyinjile oburoola ewa endi ta. 17Okhuba ndalakhwemekha muluyali olukhongo muno; kata elia umboolela liosi ndalakhola; khulwako ekhusaaya mbu witse undachile abandu bano eshilaka munwa. 18Naye Balaamu nakalusia nasunjila abasumba baBalaki ari Kata Balaki niyakhamba inzuye niyiitsuule tsifeetsa nende tsitsahaabu, shindakhanyala okhubira likhuwa liOMWAMI Nyasaye wanje, okhukhola akashilaho kata akaleema tawe. 19Khulwako emusaaya mbu neenyu mwesi mukone hano, emanye aka OMWAMI alameeta okhumboolela. 20Ne OMWAMI namwitsila Balaamu mushilo, namusunjila ari Abandu abo nibaba nibeetsile okhukhulanga, rula otsie ninabo; nebutswa likhuwa liene elia nekhuboolele, nilio lionyene elia olakhola.
Malaika, nende isishili yaBalaamu
21Kho nibushieele Balaamu yabuukha, niyaala eshiokhwikhalakhwo khusishiliye, natsia nabakhulundu baMoabu. 22Ne oburima bwaNyasaye bwakha khulwa okhutsiakhwe; naye malaika w nasinjila khunjila okhumwikalila. Ne yali nachendanga nali khusishiliye, nali nende abasumbabe babili. 23Nayo isishili niyilola malaika w nasinjiile khunjila, natsomoole olukangalwe nalutiilile mumukhono; isishili niyiibera okhurula khunjila niyinjila mumukunda; naye Balaamu nakhupa isishili, okhuchikalusia khunjila. 24Mana malaika w nasinjila khunjila inyelele eyali hakari wemikunda chiemitsabibu, omushingachi nikuli elubeka eyi, khandi omushingachi kundi elubeka eyi. 25Nayo isishili niyilola malaika w, niyiihachilisia khumushingachi, niyiseenelesilia eshilenje shiaBalaamu khumushingachi; naye nachikhupa khandi. 26Iiho malaika w natsiililila hambeli, nasinjila habundu hatiiyikhu aha obwiyango bwabula okhukotola okhutsia khumukhono o nusaatsa kata khumukhono omukhasi ta. 27Isishili niyilola malaika w, niyikona bukona, Balaamu nali khuyo; ne oburima bwaBalaamu nibwakha, nakhupa isishili nomutiichilokwe. 28Mana OMWAMI niyeekula omunwa kweisishili, nayo niyisunjila Balaamu mbu Nasi ekhukholeele shiina, eshichila niukhupa khandi khataru orio? 29Balzamu nakalusia nssunjia isishili ari Shichila umbayilakhwo; shiamba olukanga lwaba mumukhono kwanje; khane ndakhakhwira. 30Isishili niyisunjila Balazmu yili Nasi shindi isishiliyo, eya wachendelanga tsindaalo tsiosi tsiobulamubwo okhuula okva leelo? Ndayinyanga okhukhukholela endio noho? Naye ari Ta. 31Mana OMWAMI namulabia Balaamu tsimoni, naye nalola malaika w nasinjiile khunjila, natsomoole olukangalwe nalutiilile mumukhono; nabunamia omurwe, nasikama niyeenama hasi. 32Malaika w namureeba ari Nishiina eshichilile nokhupa isishiliyo khandi khataru orio? Lola, erulile ninzitsa okhukhwikalila, shichila injilayo neikhayikhanu imbeli wanje. 33Nayo isishili yinduutsi, niyiibera imbeli wanje khataru yirio; khane niyirakheeberile okhurulakhwo, khane okhwira ndakhakhwirile, nayo ndakhachihonokosiye yibe mwoyo. 34Kho Balaamu nasunjila malaika w ari Enzonoonile; okhuba shimanyilenje shinga olwa osinjiile khunjila okhunzikalila ta. Kho bulaano, nikaba nikarakhuchamisia ta, ndalafunya ewa erulile. 35Naye malaika w naboolela Balaamu ari Otsie nabandu bano; nebutswa likhuwa liene elia nekhuboolele, nilio lionyene elia olaboola. Kho Balaamu natsiililila halala nabakhulundu baBalaki.
Balaamu naBalaki
36Ne olwa Balaki yahulila mbu Balaamu witsile, yarula natsia okhumwakaanila okhuula khwitookho liaMoabu, elili khulwakho lwaArinoni, khushihesi shiolwakho. 37Balaki namusunjila Balaamu ari Shindarumile abandu okhukhulanga? Ne mbushiina noranzitsila ta? Shindi isie owakhanyala okhukhwemekha muluyali? 38Balaamu nakalusia, nasunjila Balaki ari Lola, enzitsile; ne bulaano endikhwo nobunyali bwosi bwosi okhukhuboolela likhuwa noho? Lisungo liene elia Nyasaye alara mumunwa kwanje, nilio elia ndalaboola. 39Mana Balaamu natsia nende Balaki, niboola eKiriatsi-huzotsi. 40Naye Balaki namala emisango chietsing'ombe namakondi, naruma ewaBalaamu nende abakhulundu aba yali ninabo.
41Mana mutsuli Balaki nabukula Balaamu namutikulusia namuyila eBamotsi-Baali; nokhurula yaho yalola abandu abokhundulo abali ahambikhwo.
Currently Selected:
Obubali 22: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
