Obubali 21
21
AbaKanaani baseera abalsiraeli
1Ne omuKanaani, omuruchi waAradi, owamenya muNegebu, yahulila shinga abaIsiraeli olwa bali nibeetsanga khunjila yaAtsarimu; naseera Isiraeli, nahamba abandi khubo imbambe. 2Naye Isiraeli niyeetsubila OMWAMI eshiitsubo, ari Noba niwakhahaana oluyia luno mumukhono kwanje, kho ndalamululila elala amatookho kabwe. 3OMWAMI nahulila omwoyo kwaIsiraeli, nahaana abaKanaani mumakhono kabwe; nabo nibabamululila elala, namatookho kabwe kosi. Ne eliira liahabundu tsana liali Horama.
Tsinzokha tsiobufwisi
4Nibachenda nibarula mulukulu lwaHori nibalonda khunjila eyitsia khuNyanza Inzakhanyu, okhubotokhana eshialo shiaEdomu; abandu nibasinyishila khunjila. 5Abandu nibabuutsuluulila Nyasaye, kata nende Musa, nibasunga bari Mbushiina nimukhutikulusiye okhurula eMisiri, mbu khufwile mushitsiimi? Okhuba omukaate kubulaho, khandi amatsi kabulaho; kata ebiliibwa bino ebibula obukhoonyi bikhusinyile. 6Mana OMWAMI naruma tsinzokha tsiobufwisi mubandu, natsio nitsiluma abandu; abandu abanji baIsiraeli nibafwa. 7Kho abandu nibamutsiila Musa nibasunga mbu Khwonoonile, shichila khumubuutsuluuliile OMWAMI, kata iwe wesi; osaaye OMWAMI, mbu akhurusiekhwo tsinzokha tsino. Mana Musa nasaayila abandu. 8OMWAMI namusunjila Musa ari Okhole inzokha yobufwisi, ochire khumusaala; mana kalaba mbu buli mundu oulumilwe, olwa achilola alaba omulamu. 9Kho Musa nakhola inzokha yomukasa, nachira khumusaala; nikaba mbu inzokha niyilumile omundu yesi, olwa yachihenga inzokha yomukasa eyo, yaba omulamu.
Ebikwo bietsinjendo tsiabalsiraeli muMoabu
10Abaana baIsiraeli nibachenda, nibakhupa ikambi eObotsi. 11Nibachenda nibarula eObotsi, nibakhupa ikambi eIye-abarimu, mushitsiimi eshihengana nende Moabu, eshihenga aha eliuba lifwindilanga. 12Nibarulayo nibachenda nibakhupa ikambi mwibanda lieZeredi. 13Nibarulayo nibachenda nibakhupa ikambi injelekha waArinoni, okuli mushitsiimi nikurula munzakho tsiabaAmori; okhuba Arinoni nikwo olwakho lwaMoabu, hakari waMoabu nende abaAmori. 14Niko akachila nikahandiikwa mushitabu shiAmahe kOMWAMI mbu
Wahebu muSufa,
namabanda kaArinoni
15nebikholomokho biamabanda akoola khushimenyo shiaAri nikayeeshela khulwakho lwaMoabu.
16Nibarula yaho nibatsia eBeeri; nilio liyabo tsana elia OMWAMI yasunjila Musa ari Khung'aasia abandu, nasi nembaheelesie amatsi.
17Mana Isiraeli nibeemba olwimbo luno, mbu Fututukha, iwe liyabo! Muliimbile!
18Liyabo elia abakhulundu bayaba,
elia abakhongo babandu bayabulula,
nende indabushi yobwami nemitunga chiabwe.
Nibarula mushitsiimi nibatsia eMatana; 19nibarula eMatana nibatsia eNahalieli; nibarula eNahalieli nibatsia eBamotsi; 20nibarula eBamotsi nibatsia mwibanda elili mundalo tsiaMoabu, ahambi khubutenje bwaPisiga, obuhenjile hasi mushitsiimi.
AbaIsiraeli bahula Sihoui
(Okhuka. 2.26-37)
21Mana Isiraeli naruma abarume ewaSihoni omuruchi wabaAmori, ari 22Ofuchiilile embirile mushialoshio; shikhuleebera okhwinjila mumukunda kwosi, kata mumukunda kwemitsabibu ta; shikhulanywa khumatsi akomumayabo ta. Khulabirila khumuhanda kwomuruchi, okhuula olwa khulaba nikhubiriile olwakholwo lwosi. 23Ne Sihoni shiyafuchiilila Isiraeli okhubirila mushialoshie ta; ne yakhung'aasia abandube bosi, narula okhuseera Isiraeli mushitsiimi, niyoola eYahaza; nakhupana nende Isiraeli. 24Aba Isiraeli nibabarootsa netsinganga, nibalia eshialo shiabwe okhurula khuArinoni okhuula khuYaboki, khushialo shiabaAmoni; okhuba eshialo shiabaAmoni shiali eshitinyu. 25Isiraeli nabukula amataala ako kosi; Isiraeli namenya mumataala kosi kabaAmori, muHeshiboni nomumataala kalio kosi. 26Okhuba Heshiboni liali litookho liaSihoni omuruchi wabaAmori, owali niyaseera oyo owalinji omuruchi waMoabu, niyabukula eshialoshie shiosi okhuula khuArinoni. 27Khulwako abareleesii betsinyimbo beembanga mbu
Mwitse eHeshiboni;
litookho liaSihoni liumbakhwe nilisinjisibwa.
28Okhuba omulilo kurulile muHeshiboni,
olumemu lurulile mwitookho liaSihoni;
luliile Ari liaMoabu,
nabaami bahabundu hachinguukhu haArinoni.
29Woowe, iwe Moabu!
Iwe oluyia lwaKhemoshi, ohweele!
Yahaaniile Sihoni omuruchi waAmori abaanabe abasiani babe ababoyaboyi,
khandi abaanabe abakhaana mububohe ewuwe.
30Khubalasile nebisele;
Heshiboni lisishile okhuula eDiboni;
khukwisiye hosi amakunda okhuula eNofa,
omulilo nikuula eMedeba.
Abalsiraeli bahula Ogu waBashani
(Okhuka. 3.1-11)
31Nolwa Isiraeli yamenya mushibala shiabaAmori. 32Naye Musa naruma abandu okhuluura eYazeri, nibabukula amataala kalio; nibeelusia abaAmori abali nibalimwo. 33Nibashiukhana nibatikulukha nibalonda khunjila yaBashani; naye Ogu omuruchi waBashani yarula okhubaseera, ye nende abandube bosi, okhuseerela eEderei. 34OMWAMI namusunjila Musa ari Oramuria ta; okhuba emuhaanile mumukhonokwo, halala nabandube bosi, nende eshialoshie; nawe olamukholela shinga olwa wakholela Sihoni omuruchi wabaAmori, owamenyanga eHeshiboni. 35Kho nibamurootsa, nabaanabe, nabandube bosi, okhuula olwa yatong'a yenyene; nibalia eshialoshie.
Currently Selected:
Obubali 21: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
