Obubali 18
18
Akakasilibwa abakuhani nabaLawi
1Mana OMWAMI naboolela Haruni mbu Iwe nabaanabo nabashilibwa shieenywe mwesi muleetuukha eshiuku eshiakhanyooleshela mukahabundu ahatakatifu; khandi iwe nabaanabo mwesi muleetuukha eshiuku eshiakhanyooleshela mukobukuhani bweenywe. 2Khandi witse nabaana beenywe bosi, aboluyia lwaLawi, nilwo oluyia lwaso, bahambane ninawe nibakhukhalabanila; ne iwe nabaanabo mwesi mubeetsenjeho imbeli weliheema liOburumbusi. 3Balindenje aka obaleshela, nende aka baleshelwa khukeliheema liosi; habula mbu baleshenje okhusita ahambi khubimanulwa biahabundu ahatakatifu, kata khushimalilo, baleshe okhufwa, kata bo kata inywe. 4Bahambane ninawe, nibalinda aka baleshelungwa khukeliheema liokhwakaana, khulwa obukhalabani bwosi bweliheema; ne oundi yesi aleshe okhumusitakhwo ahambi. 5Mulindenje aka muleshelwa khukahabundu ahatakatifu, naka muleshelwa khukeshimalilo shiemisango; mbu oburima buleshenje okhubaho khandi khubaana baIsiraeli. 6Nasi, lola, embukuule abaana beenywe abaLawi okhurula mubaana baIsiraeli; babe eshihaanwa khwinywe, eshihaanilwa OMWAMI, okhukholanga obukhalabani bweliheema liokhwakaana. 7Nebutswa iwe nabaanabo mwesi, mukholenje akobukuhani bweenywe khukosi akali akeshimalilo, nende akali inyuma weinyubo ishinga. Mulakhalabananga. Emuheelesia obukuhani bube eshihaanwa shiobukhalabani; ne oundi yesi ousita ahambi, yeerwe bwirwa.
8OMWAMI nasunjila Haruni ari Nasi, lola, ndakhuheele ebitong'anga khutsisadaka tsianje nibio ebindu ebitakatifu biosi ebiabaana baIsiraeli; ndakhuheelesiye bibe omukabokwo, nokwabaanabo, bibe ebimukhoyeele tsindaalo tsiosi. 9Bino bibe ebibio khubindu ebili ebitakatifu muno, ebibiikhwa nibirasambwa ta; mbu buli sadaka yabwe, niyo buli musango kwabwe kweimele, nabuli musango kwabwe kwobwonooni, nabuli musango kwabwe kweshiuku, echia balandeerelanga bibe ebitakatifu muno khululwo khandi khuiwa abaanabo. 10Obiliile habundu undi ahali ahatakatifu muno; buli mundu weshisaatsa aliekhwo; bikhubeele ebitakatifu. 11Khandi bino nebibio, mbu ebihaanwa bietsisadaka tsiabwe, nibio emisango chiosi chiokhuchelwa chiabaana baIsiraeli, ekhuheelesiye iwe khandi khubaanabo abasiani nabakhaana bosi halala ninawe, bibe ebimukhoyeele tsindaalo tsiosi; buli mundu ouba omusiiyikhu munzuyo abiliitsenjekhwo. 12Ebilayi biamafura, nebilayi bieidivai, nebieimele, ebiambeli biebirongole biabo abamuhaanilanga OMWAMI, ekhuheelesiye. 13Ebiamo biosi ebiranjililanga okhwenga khubiosi ebili mushibala shiabwe, ebia baleerelanga OMWAMI, bibe ebibiobuli mundu ouba omusiiyikhu munzuyo aliitsenjelchwo. 14Buli shindu eshia engwisia okhuba eshiomusilo muIsiraeli shibe eshishio. 15Buli shindu eshiikula inda, khubiemibili biosi ebia bamuleerelanga OMWAMI khubiabandu nebiemiruko biombi, shibe eshishio, nebutswa abeekulanda babandu obanunule; khandi eshiibulwa shiambeli shiomuruko okwakhaba okwomusilo, oshinunule. 16Ne khumurungo kwobununuli bwabio obinunule nibiakhahela omwesi mulala, nocheia amapeesa kabe tsishekeli tsiraano; nochela khushekeli yahabundu ahatakatifu; ishekeli netsigera amakhumi kabili. 17Nebutswa eshiibulwa shiambeli shieing'ombe, kata eshiibulwa shiambeli shielikondi, kata eshiibulwa shiambeli shieimbusi orashinunula ta; ebio nebitakatifu; wohe amaiasile kabio khushimalilo, nosamba amasinya kabio kabe eshihaanwa eshikholelwa omulilo khulwa eshiuya eshilayi khUMWAMI. 18Ne inyama yabio yibe eyiyo; shinga itakata eyichelwa khandi shinga eshiatakho eshisaatsa, yibe eyiyo yirio. 19Natsio tsisadaka tsiebindu ebitakatifu ebia abaana baIsiraeli bahaanila OMWAMI, ekhuheelesiye, nende abaanabo abasiar i nabakhaana bosi halala ninawe, bibe ebimukhoyeele tsindaalo tsiosi; neindakano yomuunyu tsindaalo tsiosi imbeli WOMWAMI khwiwe khandi khubeetsukhulubo mwesi. 20OMWAMI namusunjila Haruni ari Iwe shiolabeetsanga nobulaame bwosi mushibala shiabwe, kata shiolaba nomukabo kwosi mubo ta. Nisie omukabokwo khandi obulaamebwo mubaana baIsiraeli.
21Ne khubaana baLawi, lola, embaheelesiye buli shitonye shielikhumi shiosi muIsiraeli shibe shiobulaame; nishio eshia bakalusilibwa khulwa obukhalabani obwa bakhalabananga, mbu obukhalabani bweliheema liokhwakaana. 22Nokhurula olwa leelo abaana baIsiraeli baleshenje okhusitila liheema liokhwakaana ahambi, baleshe okhwituukha obwonooni nibafwa. 23Ne abaLawi bakholenje obukhalabani bweliheema liokhwakaana, nibeetuukha eshikha shiabwe; nelikhuwa elilachilisibwa tsindaalo tsiosi munzibulo tsieenywe; khandi mubaana baIsiraeli shibalabeetsanga nobulaame bwosi ta. 24Okhuba eshitonye shielikhumi eshio shiabaana baIsiraeli, eshia bahaana shibe isadaka yOMWAMI, embaheelesiye abaLawi shibe obulaame; niko akachila nimbaboolela mbu Mubaana baIsiraeli, shibalabeetsanga nobulaame bwosi ta.
25OMWAMI naboolela Musa ari 26Iihandi osungane nabaLawi, nobaboolela mbu Buli olwa muroosinjia abaana baIsiraeli eshitonye shielikhumi tsana eshia ndamuheelesiye okhurula khubo shibe obulaame bweenywe, kho muhaanenje isdaka eyirula khushio khulwa OMWAMI, mbu eshitonye shielikhumi eshieshitonye shielikhumi. 27Ne isadaka yeenywe yilamubasilibwa shinga olwa yili imele eyokhulutse, kata shinga omwitsulu kweingulu yeidivai. 28Iiho murio muhaanilenje OMWAMI isadaka eyirula mubitonye bielikhumi bieenywe biosi ebia munyoolanga khubaana baIsiraeli; khandi mubieenebio muhaanile Haruni omulkuhani isadaka YOMWAMI. 29Okhurula mubihaanwa bieenywe biosi muhaanenje buli sadaka yOMWAMI khubishila obulayi khubio, nishio eshitonye eshitakatifu eshirulamwo. 30Niko akachila obaboolele ori Olwa nuba nimuhaanile ebishila obulayi khushitonye tsana, kho mana bibasilibwe abaLawi shinga amameeto kolutse, kata shinga amameeto ketsingulu tsieidivai. 31Muliilenjekhwo buli handu hosi, inywe nabomunzu tsieenywe; okhuba nibio amatani keenywe aka mukalusilibwa khulwa obukhalabani bweenywe mwiheema liokhwakaana. 32Ne shimuleetuukha obwonooni bwosi khulwabio ta, olwa muba nimuhaanile ebishila obulayi khubio, kata shimuloonoonia ebitakatifu biabaana baIsiraeli ta, mbu muleshe okhufwa.
Currently Selected:
Obubali 18: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
