Obubali 14
14
Abandu bakholela OMWAMI induli
1Mana abomukhung'aano kwosi nibakhupa tsimbungu; abandu nibalila eshilo shieneshio. 2Abaana baIsiraeli bosi nibabuutsuluulila Musa nende Haruni; abomukhung'aano kwosi nibabasunjila bari Shilakhuha khulafwila mushibala shiaMisiri! Kata shiakhuha khwafwila mushitsiimi shino! 3Nishiina eshichila OMWAMI nakhuusia khushibala shino, khukwisibwe nolukanga? Abakhasi beefwe nabaana beefwe abatiiti balakwa shinga ebiyaayo; shibwakhaba bulayi nikhukalukha eMisiri?
4Nibasungana abeene khubeene, bari Chende khulobole omwimilisi weefwe, khukalushe eMisiri. 5Mana Musa naHaruni basikama nibabunamia obweni bwabwe imbeli welibukana liosi liomukhung'aano kwabaana baIsiraeli. 6Nabo Yoswa waNuni nende Kalebu waYefune, abali khubeenabo abali abaluuri mushialo eshio, nibarandula tsingubo tsiabwe, 7nibaboolela omukhung'aano kwosi kwabaana baIsiraeli bari Eshialo eshia khwalambuula nikhuluura, neshialo eshilayi okhushila. 8OMWAMI naba nakhusangaalila, alakhuusia nakhwinjisia mushialo eshio, nashikhuheelesia; neshialo eshiitsuulemwo amabeele nobuushi. 9Habula muramukholela OMWAMI induli, kata okhuria abandu beshialo shilia ta; okhuba bo nebiliibwa bieefwe; eshia beeshinga shibarusiibweho, ne OMWAMI ali nineefwe; murabaria ta. 10Nebutswa abomukhung'aano bosi baboola mbu balaswe namachina.
Mana oluyali Iw lwaloleshela abaaana baIsiraeli bosi mwiheema liokhwakaana. 11OMWAMI nasunjila Musa ari Abandu bano balandeka okhuula liina? Balakhaya okhusuubilila okhuula lina, kata olwa ekholeele ebilolelo ebinji hakari mubo? 12Ndalabakhuya noluumbe, nimbarusiakhwo obulaame, nikhukhola iwe obe lihanga elibashila obukhongo nende amaani.
13Musa nasunjila OMWAMI ari Mana abaMisiri balahulilakhwo; okhuba watikulusia abandu bano okhurula mubo namaaniko. 14Nabo balaboolela abamenyanga mushialo shino. Bo bahuliile shinga iwe, OMWAMI, olwa oli hakari wabandu bano; okhuba iwe, OMWAMI, ololekhanga mumoni khumoni; lileesilio nalio lisinjilanga ikulu wabwe; obeemililanga mwileesi eliingana isiilo mushiteere, khandi mumulilo okwingana isiilo mushilo. 15Kho noba niwira abandu bano shiomundu mulala, mana amahanga ako akahulilanga akeifumayo kalaboola kari 16Shichila OMWAMI yakhayilwe okhuusia abandu bano mushialo eshia yabeetsubila, niyeshichila yabeereele mushitsiimi. 17Kho bulaano ekhusaaya, obunyali bwOMWAMI bube obunji, shinga olwa waboola, mbu 18OMWAMI shiali omwangu okhutiilwa oburima ta; obuheelibwe oburalilu nobunji; aleshelanga obumayaanu nende obukhayi; shianyala okhuchweya okhumurakhwo eshiina omundu ouli neshikha ta; akalusinjia akobumayaanu bwabakuuka yabo khubaana, khulwibulo lwakhataru nende olwakhane. 19Ekhusaaya mbu oleshele abandu bano obumayaanu bwabwe, obunji bwobuheelibwo oburalilu shinga olwa buli, khandi shinga olwa waleshelanga abandu bano, okhurula eMisiri kata okhuula bulaano.
Obukuumi bwaNyasaye khuIsiraeli
(Okhuka. 1.34-40)
20OMWAMI nakalusia mbu Embalesheele, shinga olwa usaayile. 21Ne toto mwene, shinga olwa endi mwoyo, khandi shinga eshialo shiosi olwa shiliitsulamwo oluyali lwOMWAMI; 22okhuba abandu abo bosi abalola oluyali lwanje nebilolelo bianje ebia ndakholela muMisiri nomushitsiimi bandeema bario okhuula ekhumi, nibararechelesia omwoyo kwanje ta; 23kho toto mwene, shibalilolakhwo eshialo eshia ndeetsubila abakuuka babwe; kata abeenabo bosi abandekanga shibalishilolakhwo ta 24Habula omusumba wanje Kalebu, shichila yali nende roho yindi lukano muye, ne yanondelakhwo elala; ye ndilimwinjisia mushialo tsana eshia yeenjilamwo; khandi abeetsukhulube baliba abeene shio. 25Nebutswa bulaano abaAmaleki nabaKanaani bamenyanga mwibanda elo; kho mukamba mushiukhane mutsie mushitsiimi nimulonda khunjila eyitsia khuNyanza Inzakhanyu.
26OMWAMI nababoolela Musa naHaruni, ari 27Omukhung'aano kuno omubii balambuutsuluulilanga okhuula liina? Emalile okhuhulila okhubuutsuluula khwabaana baIsiraeli nibambuutsuluulilanga. 28Mubaboolele muri; OMWAMI asunga mbu Isie uno! Aka muboolilenje nimbulila, ndalamukholela mwesi endio. 29Emilambo chieenywe chilikwa mushitsiimi shino; ne bosi ababalwa khwinywe, obunji bweenywe bwosi shinga olwa bwali, okhurula khubemiyika amakhumi kabili nende abashilaho, abo bosi abambuutsuluuliile 30toto mwene shimuliinjila mushialo eshia ndachinguula omukhono ninditsuba mbu ndakhamumenyiamwo, kata mulala tawe; habula Kalebu waYefune naYoswa waNuni. 31Nebutswa abaana beenywe abatiiti aba mwaboola mbu bakhakwa shinga ebiyaayo, bo nibo aba ndiliinjisiamwo, ne balimanya eshialo tsana eshia mwaloba inywe. 32Habula inywe, emilambo chieeny ve chilikwa mushitsiimi shino. 33Abaana beenywe nabo balabeetsanga abatiimatiimi mushitsiimi emiyika amakhumi kane, nibeetuukha obureesiikwa bweenywe obuli shinga obuheyi, okhuula olwa emilambo chieenywe chiliba nichimululushiile mushitsiimi. 34Obunji bwetsindaalo shinga olwa buli etsia mwaluuranga mushialo eshio, mbu tsindaalo amakhumi kane, nolwa chilaba, omuyika Ichulwa buli nyanga nimwituukha obumayaanu bweenywe, emiyika amakhumi kane; ne mulamanya okhufukula khwanje. 35Isie OMWAMI emboolile; shindalachweya okhubakholela kano, abomukhung'aano kuno omubii kwosi, abakhung'aanile okhuyinga; mushitsiimi shino balamululushilamwo; ne nimwo omwa balafwila.
Okhufua khwabaluuri ekhumi abo ababii
36Nabandu abo aba Musa yaruma okhuluura eshialo, abakalukha nibachila abomukhung'aano kwosi nibamubuutsuluulila, nibaleerile amakhuwa amabii khukeshialo tsana, 37abandu abo abaleera amakhuwa amabii khukeshialo, bafwa khulwa oluumbe olwo imbeli wOMWAMI. 38Habula Yoswa waNuni naKalebu waYefune basikala mwoyo, khubandu abo abatsia okhuluura eshialo.
Abalsiraeli okhuhulwa nibali eHoroma
(Okhuka. 1.41-46)
39Kho Musa naboolela abaana baIsiraeli bosi amakhuwa ako; nabo abandu nibeekhuula muno. 40Nibahuuna mumabwibwi nibatikulukha khubutenje bwetsingulu, nibaboola mbu Lola, nifwe bano; khulatikulukha nikhutsia habundu tsana aha OMWAMI yakhusuubisia; okhuba khwoonoona. 41Naye Musa naboola mbu Nishiina eshichila nimusiila lilako liOMWAMI bulaano? Ako shikalakaasa ta. 42Muratikulukha tawe, okhuba OMWAMI shiali hakari weenywe ta; mwakhakhupwa hasi imbeli wabasuku beenywe. 43Shichila habwenaho abaAmaleki nabaKanaani bali imbeli weenywe; ne mulakwisibwa nolukanga; olwa mwakalukha inyuma nimuralondakhwo OMWAMI ta, kho OMWAMI shialaba nineenywe tawe. 44Nabo nibatsaalikha, nibatikulukha khubutenje bwetsingulu; nebutswa lisanduku lieindakano yOMWAMI shiliarula mukambi, kata Musa yesi ario, tawe. 45Mana abaAmaleki nibakholomokhayo, nabaKanaani abamenyanga mungulu etsio, nibabakhupa nibabarootsa, okhuula khuHworoma.
Currently Selected:
Obubali 14: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
