Obubali 13
13
Abaluuri ekhumi nababili nibarumwa eKanaani
(Okhuka. 1.19-33)
1OMWAMI naboolela Musa ari 2Ruma abandu batsie okhuluura mushiali shiaKanaani, eshia eheelesia abaana baIsiraeli. Murume omundu okhurula mubuli luyia lwabakuuka babwe; ne buli mundu abe omukhulundu mubo. 3Kho Musa nabaruma okhurula mushitsiimi shieParani, lilako liOMWAMI shinga olwa liali; ne bosi nabasaatsa abali abeemilisi babaana baIsiraeli. 4Ameera kabwe ngakano; mbu khuluyia lwaReubeni, Shamua waZakuri. 5Khuluyia lwaSimeoni, Shafati waHori. 6Khuluyia lwaYuda, Kalebu waYefune. 7Khuluyia lwaIsakhari, Igali waYusufu. 8Khuluyia lwaEfuraimu, Hoshea waNuni. 9Khuluyia lwaBenyamini, Paliti waRafu. 10Khuluyia lwaZabuloni, Gadieli waSodi. 11Khuluyia lwaYusufu, khuluyia lwaManase, Gadi waSusi. 12Khuluyia lwaDani, Amieli waGemali. 13Khuluyia lwaAsheri, Setsuri waMikaeli. 14Khuluyia lwaNafutali, Nabi waWofusi. 15Khuluyia lwaGadi, Geueli waMakhi. 16Kano niko ameera kabasaatsa abo aba Musa yaruma okhuluura eshialo. Ne Hoshea waNuni, Musa yamukulikha mbu Yoswa.
17Musa nabaruma okhuluura eshialo shiaKanaani, nababoolela ari Tikulushile khunjila yino, mwinjile muNegebu yilia, mutikulushe mubikulu, 18mulole eshialo shinga olwa shili; nende abandu abamenyangamwo, nibaba nibali abamaani nohomba abatamba amaani; nibaba nibali abatuutu nohomba abanji. 19Kata nende eshialo eshia bamenyamwo, nishiba nishili eshilayi nohomba eshibii; nende amataala aka bamenyamwo, nibaba nibamenya mutsikambi nohomba mutsingoba. 20Kata nende liloba liene, niliba nilili linulu nohomba lisaamuukhu; emisaala nichiba nichilimwo nohomba. Ne mwitinyie, muleerekhwo khubiamo bieshialo eshio. Ne tsindaalo etsio tsiali tsiebirongole bietsinzabibu.
21Kho nibatikulukha bario, nibaluura eshialo, okhurula khushitsiimi shiaZini okhuula khuRehobu, khubwinjililo bwaHamatsi. 22Nibatikulukha nibeenjila muNegebu, niboola eHeberoni; ne Ahimani naSheshai naTalumai abaana baAnaki bali nibaliyo. Nalio Heberoni iiali niliumbakhwa emiyika musaafu, Zoani elili muMisiri nilishili. 23Niboola khwibanda iiaEshekoli, nibaremayo olusaka olwali neshisakanya shilala shietsinzabibu, nibashichinga khumusekaseka hakari wabandu babili; khandi nibaleera khumakomamanga namakhuyu kosi. 24Habundu yaho halangwa mbu Libanda liaEshekoli, khulwa eshisakanya eshio eshia abaana baIsiraeli baremayo.
25Kho bakalukha okhurula mukhuluura eshialo tsindaalo olwa tsiali nitsihweele amakhumi kane. 26Niboola ewa Musa yali, naHaruni, nomukhung'aano kwosi kwabaana baIsiraeli, mushitsiimi shieParani, eKadeshi; nibabaleerela amakhuwa, khandi khubomukhung'aano kwosi; nibabamanyia ebiamo bieshialo tsana. 27Nibamuboolela bari Khwoola khushialo eshia wakhurumakhwo, ne shiitsuulemwo amabeele nende obuushi toto; ebiamo biashio mbiebino. 28Nebutswa abandu abamenyanga mushialo tsana nabamaani; amataala kabwe naketsingoba, namakhongo muno; khandi khwalola abaana baAnaki nibaliyo. 29AbaAmaleki bamenya mushialo shieNegebu; nabo abaHiti nabaYebusi nabaAmori bamenya mubikulu; abaKanaani bamenya hanyanza, nende khuYorodani.
30Naye Kalebu yaholelesia abandu imbeli waMusa, naboola ari Khutikulushe bulaano buno khushibukule; shichila okhuhula khunyala okhushihula. 31Nebutswa abasaatsa aba yatikulukha okhutsia ninabo baboola mbu Shikhwakhanyala okhuseera abandu abo ta; bakhushila amaani. 32Nibaleerela abaana baIsiraeli amakhuwa amabii khushialo eshia bali nibaluurile bari Eshialo eshia khwalambuula nikhuluuranga neshialo eshilia bulia abamenyangamwo; nabandu bosi aba khwalolamwo bali abasaatsa abakhongo muno. 33Khandi khwalolayo abaNefili, abaana baAnaki, abarula mubaNefili; nikhwilola abeene nikhuli shinga amateete butswa; ne nolwa khwabaloleshela ho.
Currently Selected:
Obubali 13: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
