Obubali 12
12
Miriamu naHaruni bafukula Musa
1Miriamu naHaruni bamoonya Musa khulwa amakhuwa komukhaana omuKushi owa yali niyateeshia; okhuba yali niyateeshia omukhaana omuKushi. 2Nibasunga bari NiMusa yenyene owa OMWAMI yasungana ninaye? Shiyasungana nineefwe fwesi? OMWAMI naye nahulila. 3Nomusaatsa oyo Musa yali omuholo muno, okhushila abandu bosi abali mushialo. 4Kho OMWAMI yaboolela Musa naHaruni naMiriamu meetsukhana, ari Rule inywe bataru, mutsie ebuneeheema liokhwakaana. Abo bataru nibarula. 5OMWAMI niyeeshela mwileesi eliingana isiilo, nasinjila hamuliango weliheema, nalanga Haruni naMiriamu; nibasitaho bombi. 6Nasunga mbu Bulaano muhulile amakhuwa kanje; naba nalimwo omunabii mwinywe, emumanyishila mwibisulo, nisungana ninaye mwilooro. 7Omusumba wanje Musa shiali ario ta; niye omwisiikwa munzu yanje yosi. 8Ye, esungananga ninaye omunwa khumunwa, ebulafu, ne muminehe ta; kata likondo liOMWAMI, alilolanga; kho mubeele murie nimuraria okhumoonya omusumba wanje Musa ta?
9Oburima bwOMWAMI nibubaashila; mana natsia. 10Lileesi elo nilirulaho aha libeele ikulu weliheema; mana lola, Miriamu naba owobuchele, omulafu shinga itsaluchi; Haruni nahenga Miriamu, ne lola, yali owobuchele. 11Haruni namusunlila Musa ari E omwami wanje, orakhukuuma khulwa eshionoono shino ta, okhuba khukholile akobusilu, khandi khwonoonile. 12Ekhusaaya mbu aleshe okhuba shiomufu, owa inyama yomubilikwe yiba niyibolile ikhulubeka olwa arula munda yanyina, ta. 13Musa namuhaabila OMWAMI, ari E Nyasaye, omuhonie, ekhussaya. 14OMWAMI nasunjila Musa ari Khane samwana niyakhamufuutsiile mumoni, khane shiyakhafwimbilwe omurwe tsindaalo musaafu? Yeekalilwe elwanyi weikambi tsindaalo musaafu; mana olunyuma lwatsio yeenjisibwe khandi. 15Kho Miriamu yeekalilwa elwanyi weikambi tsindaalo musaafu; abandu nibarabuusia oluchendo ta okhuula olwa Miriamu yali niyeenjisiibwe. 16Mana olunyumakhwo abandu nibarula eHazerotsi nibatsia nibakhupa ikambi mushitsiimi shieParani.
Currently Selected:
Obubali 12: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
