Obubali 11
11
OMWAMI yabasubisia okhuheehwa inyama
1Ne abandu abo babuutsuluula khumabil aka balola, OMWAMI nahulila; ne olwa OMWAMI yahulila, oburimabwe bwakha; omulilo kwOMWAMI nikwakha hakari wabwe, nikusamba ebitonye ebiokhundulo weikambi. 2Abandu nibamuhaabila Musa; naye Musa nasaaya OMWAMI, omulilo nikuchaaka okhusima. 3Kho habundu tsana hakulikhwa eliira mbu Tabera; shichila omulilo kwOMWAMI kwasamba hakari wabwe.
4Ne abomukanda omukhongo klilia kwaband abali nibatsokatsokaane, abali hakari wabwe, beekombanga muno; kata abaana baIsiraeli bosi nibalila khandi, nibaboola mbu Shiakhuha inyama khwalia! 5Khwitsulilanga tsinyeeni etsia khwaliitsanga eMisiri harali obukusi ta; nobunuuka, namahondo, neliani, nebitunguu, neitania. 6Nebutswa bulaano amaani keefwe koomile; shibulaho eshindu shiosi eshia khuhengakhwo, habula imana yino yonyene.
7Ne imana tsana yeengana imwo yamabele keikhumba; okhufwana khwayo khwafwawana shinga ibetola. 8Abandu batsiitsanga nibachitoola, nibachisia khuluchina, nibachiswaka mubinu, nibachiteekha munyungu, nibachikasia emikaate; ne eshiuya shiayo shieengana emikaate echiakasilibwa amafura. 9Ne olwa eliime liaama khukambi mushilo, imana nayo yaamilanga halala ninalio.
10Ne Musa yahulila abandu nibalilanga mubetsinzu tsiabwe, buli mundu hamuliango weliheemalie; oburima bwOMWAMI nibwakha muno; Musa naye nasinyikha. 11Musa namusunjila OMWAMI ari Nishiina eshichilile niukholela omusumbawo obubii? Khandi nishiina eshichilile nindakoosibwa imbeliwo ta, niunduukha omusiiko kwabandu bano bosi? 12Nisie owahela abandu bano munda noho? Nohomba nisie owabeebula, akachila niwnboolela mbu Obachinje khushilifushio, shinga omulesi oumwola olwa achinga omwana oushinuuna, okhuula khushibala eshia weetsubila abakuuka babwe mbu wakhabaheelesia? 13Nasi ndakhanyoola heena inyama okhuheelesia abandu bano bosi? Okhuba bandililanga, bari Okhuheesie inyama khulie. 14Shinyala okhuchinga abandu bano bosi sienyene ta; basitohela muno. 15Noba niukholela orio, ekhusaaya mbu unzire bwangu, nimba ningoosibwa imbeliwo, mbu endeshe okhulola amatinyu kanie.
16Kho OMWAMI yaboolela Musa ari Ukhung'aasilie abasaatsa amakhumi musaafu abokhubakofu baIsiraeh, aba Omanyile mbu nabakofu babandu nabanyapara babwe; witse ninabo khwiheema liokhwakaana, basinjileho ninawe halala. 17Nasi nenzishe nisungana ninawe habwenaho; nembukule khuroho eyili mwiwe, ninjiinjisia mubo, nabo balachinganga ninawe obusiro obwo oleshe okhubuchinga wenyene ta. 18Boolela abandu mbu Mwiyahule khulwa inyanga yomukamba, kho namulie inyama; okhuba mulililenje OMWAMI nahulila, muri Niwina oulakhuheelesia inyama khulie? Shichila khwali bulayi eMisiri. Niko akachila OMWAMI alamuheelesia inyama; mana mulie. 19Shimulalia inyanga ndala, kata tsindaalo tsibili, kata tsindaalo tsiraano, kata tsindaalo ekhumi, kata tsindaalo amakhumi kabili tawe, 20habula omwesi omulamba, okhuula olwa yimurulila mumoolu, niyimusinya. Okhuba mwaloba OMWAMI ouli hakari weenywe, nimulila imbeliwe, muri Khwarula muMisiri mbushiina? 21Musa naboola ari Abandu aba endimwo bali ebikhumila ebikhumi bisasaba abachenda nebilenje; nawe oboolile mbu Ndalabaheelesia inyama, balie omwesi omulamba. 22Beetsa okhwirilwa ebiayo netsing'ombe amatuuli, kho beekure? Nohomba tsinyeeni tsiosi etsiomunyanza tsiitsa okhubakhung'aasilibwa, kho beekure, noho? 23OMWAMI nasunjila Musa ari Omukhono kwOMWAMI kwayeembichitiibwe noho? Bulaano witsa okhulola likhuwa lianje niliba niliitsa okhwikhola khwiwe, nohomba.
Abakolu barumbula amakhuwa muliira liOMWAMI
24Naye Musa narula, naboolela abandu amakhuwa kOMWAMI; nakhung'aasia abasaatsa amakhumi musaafu abokhubakofu babandu, nabaraho eneeheema tsimbeka tsiosi. 25Mana OMWAMI niyeeshela mwileesi, nasungana ninaye, nabukulakhwo khuroho eyali niyili muye, nachiinjisia mubakofu abo amakhumi musaafu; ne olwa roho yeenjila mubo, barumbula muliira liOMWAMI; nebutswa shibameeta okhukhola bario khandi ta.
26Nebutswa abasaatsa babili basikalayo mukambi; eliira liamulala ni Elidadi, neliira lioundi ni Medadi; ne roho yeenjila mubo; ne bosi bali khubeenabo abahandiikwa, nebutswa shibali nibatsiile eneehema ta; nabo nibarumbulila mukambi. 27Omusooliili undi niyeelukha naboolela Musa, nasunga mbu Elidadi naMedadi barumbulilanga muliira liOMWAMI mukambi. 28Naye Yoswa waNuni, omukhalabani waMusa, owali mulala khubalobolebe, yaboola mbu Omwami Musa, obakaanie. 29Musa namusunjila ari Khane otiiliilwe imbalikha khulwanje! Shiakhuha abandu bOMWAMI bosi baba abanabii, OMWAMI niyeenjisia rohowe mubo! 30Mana Musa nakalukha mukambi, halala nabakofu baIsiraeli.
OMWAMI yabaleerela tsisindu
31Mana omuyeka nikurula ewOMWAMI, nikuleera tsisindu okhurula enanyanza, nikutsilakasia enakambi, shinga oluchendo Iweinyanga khulubeka luno, noluchendo Iweinyanga khulubeka lulia, okhubotokhana ikambi yosi; nitsiibunjikha khushialo shiosi shinga khuburambi bwamakhono kabili. 32Nabo abandu nibarula eshiteere eshio tulu, khandi eshilo tulu, khandi mukamba eshiteere tulu, nibatoola tsisindu; owatoola tsinduutu yatoola tsindubi ekhumi; nibatsibakala, buli mundu etsitsie, enakambi tsimbeka tsiosi. 33Ne olwa inyama eyo yali niyishili mumeeno kabwe, nibarashiachinyanya ta, oburima bwOMWAMI bwashila abandu, OMWAMI nakhupa abandu nelinyasio likhongo muno. 34Khulwako habundu tsana nihakulikhwa eliira, mbu Kigirotsi-hataaba; shichila niho aha bayabila abandu abali nobwikombi. 35Abandu abo nibarula eKibirotsi-hataaba, nibatsia eHazerotsi; nibeekhala eHazerotsi.
Currently Selected:
Obubali 11: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
