Abalawi 27
27
Amalako khukemilukha chiobwahuli
1OMWAMI naboolela Musa ari 2Boolela abaana baIsiraeli mbu Omundu olwa aba niyeetsuba eshiitsubo shiabandu khuMWAMI, babe shinga iwe olwa ochela. 3Okhuchelakhwo khwomundu oweshisaatsa, okhurula khumuyikakwe kwamakhumi kabili okhuula khumuyika kwamakhumi kasasaba, khube tsishekeli amakhumi karaano tsieifeetsa, nochela khushekeli yahabundu ahatakatifu. 4Ne naba nali omundu weshikhasi, okhuchelakhwe khube tsishekeli amakhumi kataru. 5Naba nali omundu owokhurula emiyikachie chiraano okhuula khumiyika amakhumi kabili, okhuchelakhwo khube khuweshisaatsa tsishekeli amakhumi kabili, nokhuweshikhasi tsishekeli ekhumi. 6Naba nali omundu owokhurula khumwesikwe kwambeli okhuula khumiyika chiraano, okhuchelakhwo khube khuweshisaatsa tsishekeli tsiraano tsieifeetsa, nokhuweshikhasi okhuchelakhwo khube tsishekeli tsitaru tsieifeetsa. 7Ne naba nali omundu wemiyika amakhumi kasasaba nokhushilaho, naba nali oweshisaatsa, okhuchelakhwo khube tsishekeli ekhumi natsiraano, ne nali oweshikhasi tsishekeli ekhumi. 8Ne naba nali omumanani ouranyala eshia ochelile ta, kho asinjisibwe imbeli womukuhani, naye omukuhani arumbulekhwo omuchelokwe; obunyali bwa oyo owitsubile shinga olwa buli, nolwa omukuhani amurumbulile omuchelo.
9Ne nikuba nikuli omuruko ekwa abandu baleeranga kube eshihaanwa shiOMWAMi, kwosi okwa omundu ahaanila OMWAMI okweimbia eyo kube omutakatifu. 10Arakukalukhasia kata okhukukulaasia, mbu omulayi mushilenje shiomubii kata omubii mushilenje shiomulayi, ta; ne naba nakulaasia omuruko mushilenje shiomuruko kundi, kho okwene nende okundi kulia okwa kukulasiibwe chiosi chibe emitakatifu. 11Ne nikuba nikuli omuruko okuli omusilo, okwa baraleerelanga kube eshihaanwa shiOMWAMI ta, kho asinjisie omuruko tsana imbeli womukuhani; 12naye omukuhani akuchele, nikuba nikuli omulayi kata omubii; shinga iwe omukuhani olwa okuchelile, nolwa kuba kurio. 13Ne naba niyeenya okhukununula, ameetekhwo eshitonye shiakharaano khukhuchelakhwo.
14Kata olwa omundu aba niyaahula inzuye, yibe indakatifu khuMWAMI, kho omukuhani achichele, niyiba niyili indayi kata imbii; shinga omukuhani olwa achichela, nolwa yisinjila yirio. 15Ne oyo ouchiahula naba niyeenya okhununula inzuye, ameetekhwo eshitonye shiakharaano khumapeesa aka oba nochelilekhwo, mana yibe eyiye.
16Kata omundu naba niyeenya okhwahulila OMWAMI eshitonye shiomukunda okuli okukwe, okhuchelakhwo khube khukhuraakwa khwakwo shinga olwa khuli; mbu nikuraakwa ishayiri ihomeri ndala, kuchelwe tsishekeli amakhumi karaano tsieifeetsa. 17Naba niynahula omukundakwe okhurula khumuyika kwayubile, okhuchelakhwo khusinjile khurio. 18Ne naba niyaahula omukundakwe olunyuma lwayubile, omukuhani amubasilie amapeesa emiyika echishitong'a okhuula khumuyika kwayubile shinga olwa chili; mana okhuchelakhwo khulatiitiyibwa khurio. 19Ne oyo owahula omukunda tsana naba niyeenya okhukununula, ameetekhwo eshitonye shiakharaano khumapeesa aka oba nochelilekhwo, mana kulamutinyisilibwa. 20Ne naba nareenya okhununula omukundakwe ta, kata naba nakukusiye omundu undi, kho shikulanunulwa khandi ta. 21Habula omukunda tsana olwa kulekhuulwa muyubile, kube omutakatifu kwOMWAMI, shinga omukunda okwaahuliilwa elala; kulaba okwomukuhani. 22Ne naba niyaahulila OMWAMI omukunda okwa yakula, okurali okukwe okwa yalaamilwa ta, 23kho omukuhani amubasilie obukusi obwa ochelakhwo okhuula khumuyika kwayubile, naye akhuhe eshiokhuchelakhwo khunyanga yeneyo, shibe eshitakatifu shiOMWAMI. 24Mumuyika kwayubile omukunda kumukalushile oyo owakukusia, oyo ouli omwene omukunda tsana khulwa okhulaamilwa. 25Okhuchelakhwo khwosi khube khushekeli yahabundu ahatakatifu shinga olwa yili; mbu ishekeli yihele tsigera amakhumi kabili.
26Habula eshiibulwa shiambeli mumiruko, eshili eshiOMWAMI shichila neshiibulwa eshiambeli, omundu yesi arashiahula ta; kata nishiba ing'ombe kata likondi, neshiOMWAMI. 27Ne nikuba omuruko okuli kwomusilo, akununule okhuchelakhwo shinga olwa khuli, nameetakhwo eshitonye shiakharaano; kata nikuba nikuranunulwa ta, kho kukusibwe obukusi shinga obwa ochelile.
28Nebutswa eshindu eshiahuliilwe elala, eshia omundu yaahuliila OMWAMI elala eshiokhubia ali ninabio, kata omundu kata omuruko kata omukunda okwobulaamebwe, shishinyala okhukusibwa kata okhununulwa ta; buli shindu eshiahulilwa elala, neshitakatifu muno khuMWAMI. 29Omundu owahulilwa elala, owahulwa ario mubandu, aranunulwa ta; yeerwe bwirwa.
30Eshitonye shielikhumi eshiokhwiloba liosi, nishiba shieimele yeliloba kata eshiebiamo biemisaala, neshiOMWAMI; neshitakatifu shiOMWAMI. 31Omundu naba niyeenya okhununula eshindu shiosi shiokhushitonyeshie shielikhumi, ashimeetekhwo eshitonye shiakharaano shiashio. 32Ne eshitonye shielikhumi eshiokhung'ombe kata khubiayo, khubibiranga hasi weindabushi yomwayi, buli shieikhumi shibe eshitakatifu shiOMWAMI. 33Arahenjelesia okhumanya nishili eshilayi kata eshibii, kata okhushikulaasia, ta; ne naba nashikulaasia eshindi, kho eshiene nende eshindi shilia eshia shikulaasiibwe bibe ebitakatifu; shishinyala okhununulwa ta.
34Kano niko amalako aka OMWAMI yalachilisia Musa khulwa abaana baIsiraeli mushikulu shiaSinai.
Currently Selected:
Abalawi 27: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
