Abalawi 26
26
Tsikhabi etsiitsa khulwa obuhulili
1Mureekholela ebiabutswa ebiinamilungwa, kata okhusinjisia eshifwanani eshibaatse, kata isiilo yelichina lisongookhu; kata murarakhwo eshifwanani shiosi shielichina mushialo shieenywe okhushiinamila tawe; okhuba isie nisie OMWAMI Nyasaye weenywe. 2Mwitsulilenje tsisabato tsianje, nimuriitsanga habundu wanje ahatakatifu; isie nisie OMWAMI.
3Nimuba nimuchenda muka ndalachilisia, nimulinda amalako kanje nimukakhola, 4kho ndalahaananga ifula yeenywe yosi munduukho yayo, eshialo nashio shilahaananga imele yashio, nemisaala echiomumikunda okhwama ebiamo biachio. 5Mana lihuula liloola khwichesa lietsinzabibu, nelichesa okhuula khwiraaka; mulaliitsanga ebiliibwa bieenywe nimwikura, nimumenya mushialo shieenywe shisale. 6Nasi ndalahaana omulembe mushialo, neenyu mulakona bukona, kata nabulaho oumuriisia. Ndalaakamia tsisolo tsimbii mushialo, kata olukanga shilulabira mushialo shieenywe ta. 7Muleelusia abasuku beenywe, nabo balakwisibungwa imbeli weenywe khulwa olukanga. 8Baraano khwinywe baleelusia eshikhumi, khandi eshikhumi khwinywe balalonda ebikhumila ekhumi; abasuku beenywe balakwisibungwa imbeli weenywe khulwa olukanga. 9Ne ndalamuhenga luboni, nimunyalila okhwibulana, nimwinjiyia; khandi ndalatinyisia indakano yanje nineenywe. 10Mulaliitsanga imele eyabirila eyabiikhwa oluhoono, ne mularusia eyabirila okhwiyanjia imbia. 11Nasi ndalasinjisia eshimenyo shianje hakari weenywe; shimulasinya omwoyo kwanje ta. 12Ndalachendanga hakari weenywe, nimba Nyasaye weenywe, neenyu mulaba abandu banje. 13Nisie OMWAMI Nyasaye weenywe, owamurusia mushibala shiaMisiri, mbu muleshe okhuba abasumba babwe; ndakhalaka ebisekeyi bielikokolo lieenywe, nimusinjisia muchende nimukololooshe.
Amakuumo akeetja khulzva obukhayi.
14Ne nimuba nimukhaya okhumbulila, kata okhukhola akamalako kano kosi, 15khandi nimuba nimuloba aka ndalachilisia, obukhalachi bwanje nibumusinya omwoyo, kho nimurakhola akamalako kanje kosi ta, habula nimwonoonia indakano yanje; 16kho nasi ndalamukholela endi, mbu ndalaraho oburiisii bumuruche; mbu eshiheela, nomurengo, ebimala tsimoni nibichila obulamu nibuhweelelela; mularaaka imwo yeenywe butswa, okhuba abasuku beenywe balachilia. 17Ndalamuyinilia imoni okhumufukula, neenyu mularootswa imbeli wabasuku beenywe. Abamukiyanga balamuruka; khandi muleelukhanga kata omundu naramulondachilila ta. 18Ne nimuba nimushikhaya okhumbulila, kata khulwa amakhuwa ako kosi ta, kho ndalamukuuma khandi musaafu khulwa ebionoono bieenywe. 19Ndalafunaka obwikhulumamii bwobunyali bweenywe, ndalakhola likulu lieenywe likwe eshibia, neliloba lieenywe okhukwa omukasa; 20mulamalanga amaani keenywe khulwa butswa, okhuba eshialo shishilahaananga imele yashio, kata emisaala chieshialo okhwama ebiamo hiachio ta.
21Nimuba nimuchenda nimufukulanga, nimukhaya okhumbulila, kho ndalamutuukha amanyasio kandi okhuula musaafu, ebionoono bieenywe shinga olwa bili. 22Ndalaruma tsisolo tsinabulimo hakari weenywe, natsio tsilamunuula abaana beenywe, nitsisishia emiruko chieenywe, nitsitiitiyia obunji bweenywe; kata tsinjila tsieenywe tsilayumba.
23Ne nimuba nimureekalukhasia khulwa amakhuwa ako ta, ne nimushichenda nimufukulanga, 24kho nasi ndalachenda nimufukulanga; ndalamurootsa, isie omwene, okhuula musaafu khulwa ebionoono bieenywe. 25Ndalaleera olukanga khwinywe, olulamalila indakano eshikwoli; mulaba nimukhung'aanile mumataala keenywe, nasi ndalaruma oluumbe hakari weenywe; ne mulahaanwa mumakhono kabasuku. 26Olwa emba nifunaache omutiichilo kweenywe kwomukaate, abakhasi ekhumi balafumbuukhanga emikaate chieenywe mumayika malala, nibamuleerela emikaate chieenywe khandi nibachelile khuratili; mulaliitsanga nimureekura ta.
27Ne nimuba nimushikhaya okhumbulila, kata khulwa ako kosi ta, ne nimuchenda nimufukulanga, 28kho ndalachenda nimufukulanga nobululu; khandi ndalamukuuma okhuula musaafu khulwa ebionoono bieenywe. 29Mulalia inyama yemibili chiabaana beenywe abasiani, kata inyama yemibili chiabaana beenywe abakhaana mulachilia. 30Ndalamulula habundu weenywe hachinguukhu hosi, nirema ebimalilo bieenywe biamaleesi kelibuuliesi, nifuuba emilambo chieenywe khubirundu biemindu echia mwinamilanga; ne mulasinya omwoyo kwanje. 31Ndalakwisia amataala keenywe amakunda, nimulula habundu weenywe ahatakatifu hosi, kata shindalahulila eshiuya shieenywe eshilayi shiosi ta. 32Ndalakwisia eshialo likunda; abasuku beenywe abamenyangamwo balachenya. 33Neenyu, ndalamusalaasia mumahanga, ninzomola olukanga munyuma weenywe; eshialo shieenywe shilakwa obusasishi, namataala keenywe amakunda.
34Habwenaho eshialo shilasangaalila tsisabato tsiashio, tsindaalo tsiosi olwa shibeetsanga mubusasishi, inywe nimuli mushialo shiabasuku; mundaalo etsio eshialo shilahuluukha, nishisangalila tsisabato tsiashio. 35Olwa shiba nishishili mubusasishi shilahuluukhanga; ne nibwo obuhuluushi obwa shibulile musabato tsieenywe, olwa mwali nimwamenya khushio. 36Ne abo abakhaba nibasikaale khwinywe, ndalabaleerela obuyengukhu bwomwoyo ewa bali mubiali biabasuku babwe; kata okhusakasia khwelisaafu elichingwa nomuyeka khulabeelusia; baleelukha shinga owilikha olukanga; balakwa kata omundu yesi narabalondachilila ta. 37Baleesichiralanakhwo shinga abeebera olukanga, kata omundu yesi narabalondachililila ta; shimulabakhwo nobunyali olenwema Imbeli wabasuku oeenywe ta. 38Mulasishila hakari wamahanga; eshialo shiabasuku beenywe shilamumila. 39Abo abakhaba nibasikaale khwinywe balahweelelela khulwa obumayaanu bwabwe, mubialo biabasuku beenywe; khandi khulwa obumayaanu bwabakuuka babwe balahweelelela shinga bo.
40Baleeyama obumayaanu bwabwe, nobumayaanu bwabakuuka babwe, mubukhayi bwabwe obwa bakhaya, khandi mbu okhuba injenda yabwe yafukulanga; 41niko akachila siesi ndachenda nimbafukulanga, nimbaleera mushialo shiabasuku babwe; kho habwenaho emioyo chiabwe echibula eshishebo nichiba nobwongoli, nabo nibafuchiilila obukuumwi bwobumayaanu bwabwe; 42kho ndaleetsulila indakano yanje naYakobo; khandi nende indakano yanje naIsaka, na indakano yanje naAburahamu ndalatsiitsulila; ne ndaleetsulila eshialo eshio. 43Ne balalekha eshialo tsana; shilasangaalila tsisabato tsiashio, olwa shiba nishikona mubusasishi nibabulaho; nabo balafuchiilila obukuumwi bwobumayaanu bwabwe; shichila baloba obukhalachi bwanje, khandi aka ndalachilisia nikasinya emioyo chiabwe. 44Nebutswa olwa balaba nibali mushialo shiabasuku babwe, isie shindalabaloba, kata shibalasinya, mbu embatibilie elala kata okhwonoonia indakano yanje ninabo, ta; okhuba nisie OMWAMI Nyasaye wabwe. 45Ne khulwabwe ndaleetsulila indakano yabakuuka babwe aba ndarusia mushibala shiaMisiri amahanga nikalola, mbu embe Nyasaye wabwe; isie nisie OMWAMI.
46Kano niko akalachilisibwa nakobukhalachi namalako, aka OMWAMI yakhola hakari wuwe nende abaana baIsiraeli, mushikulu shiaSinai, mumunwa kwaMusa.
Currently Selected:
Abalawi 26: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
