Abalawi 23
23
Tsinduukho tsiamasabo
(Obub. 28.16—29.40)
1OMWAMI naboolela Musa ari 2Boolela baana baIsiraeli mbu Tsinduukho tsiamasabo kOMWAMI, etsia mulatangasia mbu nemikhung'aano emitakatifu, nitsio tsinduukho tsianje tsiamasabo, nzietsino; 3emilimo chikholungwe tsindaalo tsisasaba; ne inyanga yomusaafu neisabato yomuhongo khwinywe, mbu omukhung'aano omutakatifu; murakhola omulimo kwosi kwosi ta; niyo isabato yOMWAMI mubimenyo bieenywe biosi. 4Tsino nitsio tsinduukho tsiamasabo kOMWAMI, nitsio emikhung'aano emitakatifu, echia mulatangasia munduukho tsiachio. 5Mumwesi kwambeli, khunyanga yekhumi nakhane eyomumwesi, khubwile, niyo ipasaka yOMWAMI. 6Mana khunyanga yekhumi nakharaano eyomumwesi kwenokwo, nilio lisabo liemikaate echibulamwo amamela khuMWAMI; tsindaalo musaafu mu laliitsanga emikaate echlbulamwo amamel. 7Khunyanga yambeli mube nomukhung'aano omutakatifu; murakholakhwo omulimo kwosi kwobukhalabani ta. 8Habula muleere eshihaanwa eshikholelwa omulilo khuMWAMI tsindaalo musaafu; khunyanga yomusaafu nomukhung'aano omutakatifu; murakholakhwo omulimo kwosi kwobukhalabani ta.
9Khandi OMWAMI naboolela Musa ari 10Boolela abaana baIsiraeli mbu Olwa mulaba nimwinjiile mushialo eshia emuheelesia, nimuchesa lichesa liashio, kho muleerele omukuhani eshinywa shiebirongole bielichesa lieenywe. 11Naye achele eshinywa tsana imbeli wOMWAMI, mbu mufuchiililwe; khunyanga eyilonda khusabato omukuhani ashichele. 12Ne khunyanga eyo eya muchelelakhwo eshinywa, mumale likondi lieshimwamwane elibula obulema, libe omusango omusambe khuMWAMI. 13Ne omusango kwalio kweimele kube ebitonye bibili bielikhumi bia efa yobusie obunyushe obutsokasiibwe amafura, eshihaanwa eshikholelwa omulilo khuMWAMI, khulwa eshiuya eshilayi; nomusango kwokhutsushilwa kwakwo kube idivai, eshitonye shiakhane shia hini. 14Muraliakhwo omukaate, kata imele inziiyile, kata ebitere ebibisi ta, okhuula khunyanga yeneyo, okhuula olwa muba nimuleerile eshihaanwa shiaNyasaye weenywe; nelikhuwa elilachilisibwa obushia nobushia munzibulo tsieenywe tsiosi, mubimenyo bieenywe biosi.
15Mana mubale okhurula khunyanga eyo eyilonda khusabato, okhurula khunyanga eya muleerilekhwo eshinywa shiomusango kwokhuchelwa, tsisabato tsibe musaafu tsinamba; 16kata okhuula khunyanga eyilonda khusabato yomusaafu, mubale tsindaalo amakhumi karaano; mana muleerele OMWAMI omusango kweimele imbia. 17Murusie mubimenyo bieenywe emikaate chibili chiokhuchelwa, echia ebitonye bibili bielikhumi bia efa; chibe echiobusie obunyushe; chifumbuukhwe namamela, chibe ebirongole khuMWAMI. 18Halala nemikaate echio muleere amakondi keshimwamwane musaafu akabula obulema, neihuunwa ndala, namamiiku kabili; bibe omusango omusambe khuMWAMI, halala nomusango kwabio kweimele nemisango chiabio chiokhutsushilwa, mbu eshihaanwa eshikholelwa omulilo, shieshiuya eshilayi khuMWAMI. 19Khandi mumale ikhole ndala yomusango kwobwonooni, namakondi keshimwamwane kabili komusango kwokhwishia. 20Naye omukuhani abichele halala nemikaate chiebirongole, bibe omusango kwokhuchelwa imbeli wOMWAMI, halala namakondi ako kabili; bilaba ebitakatifu biOMWAMI, khulwa omukuhani. 21Khandi mutangasie ebulafu khunyanga yeneyo mbu omukhung'aano omutakatifu kulabaho khulweenywe; murakholakhwo omulimo kwosi kwobukhalabani ta; nelikhuwa elilachilisibwa obushia nobushia, mubimenyo bieenywe biosi, munzibulo tsieenywe tsiosi.
22Olwa muba nimuchesa lichesa lieliloba lieenywe, orachesela elala omukundakwo mutsikoona, kata okhukhung'aasia ebirulume ebiomwichesalio ebisikaaleyo ta; obileshele ahamanani nabarende; isie nisie OMWAMI Nyasaye weenywe.
23OMWAMI naboolela Musa ari 24Boolela abaana baIsiraeli mbu Mumwesi kwomusaafu, khunyanga yambeli eyomumwesi, mulaba nomuhongo, eshiitsulilo eshilimwo okhuupa tsinzika, omukhung'aano omutakatifu. 25Murakholakhwo omulimo kwosi kwobukhalabani ta; ne muhaanile OMWAMI eshihaanwa eshikholelwa omulilo.
26OMWAMI naboolela Musa ari 27Khunyanga yekhumi eyomumwesi kuno kwomusaafu niyo inyanga yeshitiso. Kumubeele omukhung'aano omutakatifu; ne mwisandie abeene; khandi muhaanile OMWAMI eshihaanwa eshikholelwa omulilo. 28Murakholakhwo omulimo kwosi khunyanga eyo ta; okhuba niyo inyanga yeshitiso, okhumutisa imbeli wOMWAMI Nyasaye weenywe. 29Okhuba omundu yesi ourasandakhwo khunyanga eyo ta, asishibwe mubandube. 30Kata omundu yesi yesi oukhola omulimo kwosi khunyanga eyo, ndalaakamia omundu oyo mubandube. 31Murakholakhwo omulimo kwosi kwosi ta; nilio likhuwa elilachilisibwa obushia nobushia, munzibulo tsieenywe tsiosi, mubimenyo bieenywe biosi. 32Yimubeele isabato yomuhongo; ne mwisandie abeene; khunyanga yashienda eyomumwesi, khubwile, okhurula khubwile okhuula khubwile bundi, mukhole isabato yeenywe.
33OMWAMI naboolela Musa ari 34Boolela abaana baIsiraeli mbu Khunyanga yekhumi nakharaano eyomumwesi kuno kwomusaafu nilio lisabo liamatili khuMWAMI, eshise shietsindaalo musaafu. 35Khunyanga yambeli omukhung'aano kubeho; murakholakhwo omulimo kwosi kwobukhalabani ta. 36Tsindaalo musaafu muhaanilenje OMWAMI ebihaanwa ebikholelwa omulilo; mana khunyanga yomunaane mube nomukhung'aano omutakatifu, nimuhaanila OMWAMI eshihaanwa eshikholelwa omulilo; nikwo omukhung'aano kwoluyali; murakholakhwo omulimo kwosi kwobukhalabani ta.
37Tsino nitsio tsinduukho tsiamasabo kOMWAMI, etsia mulatangasinjia tsibe emikhung'aano emitakatifu, okhuhaanila OMWAMI ebihaanwa ebikholelwa omulilo, nemisango emisambe, nemisango chieimele, nemisango chindi, nemisango chiokhutsushilwa, buli mulala khunyanga yakwo; 38khandi tsiliho tsisabato tsiOMWAMI; biliho ebihaanwa bieenywe; biliho ebiitsubo bieenywe biosi; khandi biliho ebihaanwa bieenywe ebia muhaanila OMWAMI khulwa okhuchama.
39Khunyanga yekhumi nakharaano eyomumwesi kwomusaafu, olwa muba nimumalile okhukhung'aasia ebiamo biosi bieliloba, mukhole lisabo liOMWAMI tsindaalo musaafu. Khunyanga yambeli omuhongo kubeho, khandi khunyanga yomunaane omuhongo kubeho. 40Khunyanga yambeli mubukule ebiamo biemisaala emilayi, namasaafu kamashindu, netsisaka tsiemisaala echili namasaafu, netsimbaya etsiokhumuchela; mana mwikhoye imbeli wOMWAMI Nyasaye weenywe tsindaalo musaafu. 41Mulikhole libe lisabo khuMWAMI tsindaalo musaafu mumuyika; nilio likhuwa elilachilisibwa obushia nobushia munzibulo tsieenywe tsiosi; mulikhole mumwesi kwomusaafu. 42Mumenye mumatili tsindaalo musaafu; abeebule bosi baIsiraeli bamenye mumatili; 43mbu abetsinzibulo tsieenywe bamanye shinga olwa ndamenyia abaana baIsiraeli mumatili olwa ndabarusia mushibala shiaMisiri; isie nisie OMWAMI Nyasaye weenywe. 44Kho Musa natangasilia abaana baIsiraeli tsinduukho rsiamasabo kOMWAMI.
Currently Selected:
Abalawi 23: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
