Abalawi 22
22
Obutakatifu bwebihaanwa biOMWAMI
1OMWAMI naboolela Musa ari 2Boolela Haruni nabaanabe mbu beekabukhasie khubindu ebitakatifu biabaana baIsiraeli ebia banzahulilanga, mbu baleshe okhwonoonia eliira lianje litakatifu; isie nisie OMWAMI. 3Obaboolele mbu Omundu yesi yesi owomulwibulo Iweenywe, munzibulo tsieenywe tsiosi, ousitila ebindu ebitakatifu ahambi, ebia abaana baIsiraeli baba nibamwahulila OMWAMI, ne nali nobukaali, omundu oyo asishibwe imbeli wanje; isie nisie OMWAMI. 4Omundu yesi owomulwibulo lwaHaruni ouba nali owobuchele, kata nali neshisununu, aleshe okhuliakhwo khubindu ebitakatifu, okhuula olwa aba nali omusiiye. Kata ouba natiilakhwo khushindu shiosi eshili eshiomusilo khulwa omufu, kata owiloorelela; 5kata omundu yesi outiilakhwo khushindu eshimoolanga khubiselasela, eshimura mwibilu, kata khumundu oumukwisia owobukaali, owobukaali bwosi obwa aba nali ninabwo; 6outiila khushiosi shiosi eshifwana shirio abe mwibilu okhuula olwa bwila, naraliakhwo khubindu ebitakatifu ta, habula naba niyeesinjile omubili mumatsi. 7Mana olwa eliuba liba liyeerile, kho aba omusiiye; nolunyumakhwo alie khubindu ebitakatifu, shichila nibio ebiliibwabie. 8Eshindu eshifwile eshiene, kata eshitonyatonyilwe netsisolo, araliakhwo, okhwiyoonoonia ninashio ta; isie nisie OMWAMI. 9Khulwako, balindenje aka embalachilisia, baleshe okhutuukhwa obwonooni khulwako, nibafwilamwo, nibaba nibakoonoonia; nisie OMWAMI oubaahula.
10Omundu omurende yesi aleshe okhuliakhwo khushindu eshitakatifu; omucheru womukuhani, kata omukholi owahandiikwa omushaara, aleshe okhuliakhwo khushindu eshitakatifu. 11Ne omukuhani naba nakula omundu amapeesa, abe omwandukwe, ye aliekhwo; kata abeebulwa munzuye nabo baliitsenje khubiliibwabie. 12Kata omukhaana womukuhani naba nateeshelanga omurende, aleshe okhulia khutsisadaka tsiebindu ebitakatifu ta. 13Nebutswa omukhaana womukuhani naba nali omulekhwa, kata owakabukhasibwa nomusaatsawe, narali nomwana ta, ne nakaluushe munzu wabwe, shinga olwa yali nashili omubuukha, kho aliitsenje khubiliibwa biasamwana; ne omurende yesi araliakhwo ta. 14Kata omundu naba niyeetsukhana nalia khushindu eshitakatifu, kho ashimeetekhwo eshitonye shiakharaano, naheelesia omukuhani eshindu eshitakatifu tsana. 15Abakuhani baleshe okhwonoonia ebindu ebitakatifu biabaana baIsiraeli, ebia bahaanila OMWAMI, 16nibachila nibeetuukha obumayaanu bwabwe neshiuku shiabwe, olwa balia ebindu biabwe ebitakatifu; okhuba nisie OMWAMI oubaahula.
17OMWAMI naboolela Musa ari 18Boolela Haruni nabaanabe nende abaana bosi baIsiraeli mbu Omundu yesi yesi oweinzu yaIsiraeli kata owokhubarende abali muIsiraeli, ouba naleera eshihaanwashie, kata nishiakhaba shiebiitsubo biabwe, kata khubia bahaana khulwa okhuchama, ebia baleerela OMWAMI khulwa omusango omusambe, 19nimwenya okhufuchiililwa, muleere eshisaatsa eshibula obulema, eshiokhung'ombe, kata eshiokhumakondi, kata eshiokhumbusi. 20Ne shiosi shiosi eshili nobulema, murashileera ta; shichila shishifuchiilikha khulweenywe ta. 21Nomundu yesi ouleerela OMWAMI omusango kwokhwishia, okhuusia eshiitsubo, kata khulwa eshihaanwa eshia ahaana khulwa okhuchama, eshiokhung'ombe kata eshiokhubiayo, shibe eshiIamba habwene mbu shifuchiililwe; shirabakhwo nobulema bwosi ta. 22Eshibofu, kata eshlfiniishe, kata eshiremilwekhwo, kata eshiraatsakhwo amaiila, kata eshiamahunde, kata obukuya, ebienebio murabileerela OMWAMI ta, kata okhubikholela OMWAMI eshihaanwa eshikholelwa omulilo khushimalilo ta. 23Ne ing'ombe kata likondi eshia eshiungo shindi shiakhaba nishiarambiha, kata nishiembiha, eshieneshio onyala okhushikhola eshihaanwa eshia ohaana khulwa okhuchama; ne khulwa eshiitsubo, shishifuchiilikha ta. 24Eshia eshimala shiashio shiakhupwa, kata okhutubulwa, kata okhufinikha, kata okhukhalakwa, murashileerela OMWAMI, kata okhushimala shibe omusango mushialo shieenywe ta. 25Kata murahaana ebifwana birio ebia oba nonyoolile mumukhono kwomusuku, bibe ebiliibwa biaNyasaye weenywe, ta, khulwa okhwonoonekha khwabio, bilimwo obulema; shibilafuchiililwa khulweenywe ta.
26OMWAMI naboolela Musa ari 27Olwa ing'ombe, kata likondi, kata imbusi, shiba nishiibuulwe, shibeho tsindaalo musaafu nende nyina; mana okhurula khunyanga yomunaane shinyala okhufuchiililwa shibe eshihaanwa eshikholelwa omulilo khuMWAMI. 28Ne kata nishiba itwasi kata linyafusi, murashiira eshiene nende omwana washio biombi khunyanga ndala ta. 29Khandi olwa mumalila OMWAMI omusango kwokhuupa orio, mukumale habwene mbu mufuchiililwe. 30Kuliibwe khunyanga yeneyo; muralekhakhwo kukone okhuula mukamba ta; isie nisie OMWAMI.
31Khulwako mulindenje amalako kanje nimukakhola. Isie nisie OMWAMI. 32Muroonoonia eliira lianje litakatifu ta; nebutswa ndalaahulungwa mubaana baIsiraeli. Nisie OMWAMI oumwahulanga, 33owamurusia mushibala shiaMisiri, mbu embe Nyasaye weenywe; isie nisie OMWAMI.
Currently Selected:
Abalawi 22: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
