Abalawi 21
21
Obutakatifu bwabakuhani
1OMWAMI naboolela Musa mbu Boolela abakuhani abaana baHaruni mbu Omundu yesi khwinywe areera mwibilu khulwa omufu owomubandu babwe ta, 2habula khulwa omuluyia owomunzu wabwe, mbu nyina, kata samwana, kata omwanawe omusiani kata omukhaana, kata omusiani wabwe; 3kata omukhaana wabwe yesi ouli omushisila owomunzu yabwe, nashili okhutsia khumusaatsa ta, anyala okhwira mwibilu khululwe. 4Areera mwibilu, shinga omusaatsa owateeshia hakari wabandu, okhwiyoonoonia, ta. 5Bareekhweyula shinga ebiole khumirwe, kata okhubeka eshileefu khundulo, kata okhwisalakakhwo tsisalache ta. 6Babe abatakatifu baNyasaye wabwe, nibaroonoonia eliira liaNyasaye wabwe ta; okhuba nibo abaleeranga ebihaanwa biOMWAMI ebikholelwa omulilo, nibio ebiliibwa biaNyasaye wabwe; niko akachila babe abatakatifu. 7Baraleera omukhasi yesi ouli omutamba, kata owoonoonibwa, kata baraleera omukhasi owakabukhasibwa nomusaatsawe ta; okhuba omukuhani nomutakatifu waNyasayewe. 8Kho omwahule; okhuba niye ouleeranga ebiliibwa biaNyasayewo; akhubeelenje omutakatifu; okhuba isie OMWAMI oumwahula endi omutakatifu. 9Kata omukhaana womukuhani yesi naba niyeeyoonoonia khulwa okhukwa omutamba, aba niyoonooniye samwana; asambwe nomulilo.
10Oyo ouli omukuhani omukhulundu mubaana babwe, owa amafura akokhutsushiililwa katsushiililwa khumurwekwe, owaabulwa okhwifwala ebiifwalo tsana, araboholola liswi kata okhurandula tsingubotsie ta; 11kata areenjila ewa omulambo kuli, kata okhwira mwibilu khulwa samwana kata khulwa nyina, 12kata araruIakhwo habundu ahatakatifu, kata okhwonoonia habundu ahatakatifu haNyasayewe ta; okhuba obwahuli bwamafura kokhutsushiililwa kaNyasaye we buli khuye; isie nisie OMWAMI. 13Aleere omukhasi omubula. 14Araleerakhwo omukhasi omulekhwa, kata owakabukhasibwa nomusaatsawe, kata omukhasi owoonoonibwa, omutamba, ta; habula omukhaana omushisila owomubandu babwe niye owa alateeshia, 15mbu aleshe okhwonoonia olwibulolwe mubandu babwe; okhuba nisie OMWAMI oumwahula.
16OMWAMI naboolela Musa ari 17Boolela Haruni mbu Omundu yesi yesi owomulwibulolwo, munzibulo tsiabwe tsiosi, ouba nali nobulema bwosi, arasita ahambi okhuleera ebiliibwa biaNyasayewe ta. 18Okhuba omundu yesi yesi ouli nobulema aleshe okhusita ahambi; mbu omubofu, kata oweindieku, kata oweimbala imbii mumoni, kata owa eshilenje shilala shiarambiha, kata omukhono kurio, 19kata owafinikha eshilenje kata owafinikha omukhono, 20kata oweshikufu, kata omukhuunyu, kata oweisongo, kata owamakakha, kata owamafwimbe, kata owatubulwa eshimala. 21Omundu yesi owomulwibulo lwaHaruni omukuhani ouli nobulema aleshe okhusita ahambi okhuleera ebihaanwa biOMWAMI ebikholelwa omulilo ta; olwa ali nobulema, arasita ahambi okhuleera ebiliibwa biaNyasayewe ta. 22Okhulia aliitsenje khubiliibwa biaNyasayewe, kata ebili ebitakatifu muno, kata ebili ebitakatifu, biombi. 23Habula mbu aleshenje okhwinjila okhuula khungubo ishinga, kata okhusitila eshimalilo ahambi, shichila ali nobulema; mbu aleshe okhwonoonia habundu wanje ahatakatifu; okhuba nisie OMWAMI oubiahula. 24Nilwo olwa Musa yaboolela Haruni, nende abaanabe, nabaana baIsiraeli bosi.
Currently Selected:
Abalawi 21: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
