Abalawi 20
20
Akobukuumwi bwabakhayi
1OMWAMI naboolela Musa ari 2Khandi, oboolele abaana balsiraeli mbu Omundu yesi yesi owomubaana baIsiraeli, kata owomubarende abamenyakhwo muIsiraeli, ouhaanila Molekhu abekhulwibulolwe, yeerwe bwirwa; abandu beshialo shino bamulase namachina. 3Ndalamuumilia omundu oyo tsimoni, nimufukula, nimusishia mubandube; shichila uhaaniile Molekhu abolwibulolwe, nakwisia habundu wanje ahatakatifu okhuba homusilo, niyoonoonia eliira lianje litakatifu. 4Ne abandu beshialo shino nibaba nibamulangulila omundu oyo, olwa ahaanila Molekhu abolwibulolwe, nibaramwira ta, 5isie ndalamuumilia omundu tsana tsimoni nimufukula, nokhufukula abeinzuye, nimusishia mubandube, halala nende bosi abalondananga ninaye shinga abaheyi, okhuheyanga naMolekhu.
6Kata omundu oushiukhanila abamayengo nabebitsoyelo, okhubalonda shinga omuheyi, ndalamuumilia omundu oyo tsimoni nimufukula nimusishia mubandube. 7Kho mwiyahule abeene, mube abatakatifu; okhuba isie nisie OMWAMI Nyasaye weenywe. 8Mulindenje aka emulachilisia nimukakhola; nisie OMWAMI OUmwahula. 9Okhuba buli mundu oufwola samwana kata nyina yeerwe bwirwa; afwolile samwana kata nyina; amabangake kabe khuye omwene.
10Omundu naba naheya nomukhasi wabeene, mbu ouheya nomukhasi wowashie, abaheyi abo bombi, omusaatsa nomukhasi, beerwe bwirwa; amabanga kabwe kabe khubo abeene. 11Kata omundu oukona nomukhasi wasamwana aba nafuunuule eshihechenye shiasamwana; abo bombi beerwe bwirwa; amabanga kabwe kabe khubo abeene. 12Kata omundu naba nakona nanyakhufialanyene, omukhasi womwanawe, abo bombi beerwe bwirwa; bakholile akoluswa; amabanga kabwe kabe khubo abeene. 13Kata omundu naba nakona nomusaatsa shinga oukona nomukhasi, bombi bakholile eshisinyo; okhwirwa beerwe; amabanga kabwe kabe khubo abeene. 14Kata omundu naba nateeshia omukhasi khandi nende nyina, noluswa; basambwe nomulilo, ye nende bo bosi, mbu oluswa luleshe okhuba mwinywe. 15Kata omundu naba nakona nomuruko, okhwirwa yeerwe; khandi mwire omuruko tsana. 16Kata omukhasi naba nasitila omuruko ahambi, nakona ninakwo, omwire omukhasi tsana khandi nende omuruko; okhwirwa yeerwe, ninakwo kwosi; amabangake kabe khuye, namalasile kakwo khukwo.
17Omundu naba naleera omukhaana wabwe, omwana wasamwana kata omwana wanyina, nalola eshihechenyeshie, naye nalola eshihechenye shishie, kho nelikhuwa lietsisoni; basishibwe mumoni tsiabaana babandu babwe; afuunuule eshihechenye shiomukhaana wabwe; yeetuushe obumayaanubwe. 18Kata omundu naba nakona nomukhasi ouli mubulwalebwe, nafuunula eshihechenyeshie, kho aba nafuunuule eshinokoshie, naye yesi afuunuule eshinoko shiamatsayike; abo bombi basishibwe mubandu babwe. 19Orafuunula eshihechenye shiomukhaana wabwe mawo kata eshianyakhusenjewo ta; okhuba okhwo nikhwo okhufuunula eshihechenye shiomuluyia weenywe; beetuushe obumayaanu bwabwe. 20Kata omundu naba nakona nomukhasi wousamwanawe, aba nafuunuule eshihechenye shiousamwanawe; beetuushe obumayaanu bwabwe; balafwa nibabula omwana. 21Kata omundu naba nabukula omukhasi womusiani wabwe, nobukaali; aba nafuunuule eshihechenye shiomusiani wabwe; balabula omwana.
22Khulwako, mulindenje aka ndalachilisia kosi, nakobukhalachi bwanje bwosi, nimukakhola; mbu eshialo eshia emuyila okhume nyamwo shileshe okhumusala busala. 23Murachenda mubiima bielihanga elia nzilusia imbeli weenywe ta; okhuba bakholanga amakhuwa ako kosi; niko akachila nibasinya. 24Ne ndamusunjila mbu mulalaamilwa eshialo shiabwe, nasi ndalashimuheelesia shibe eshieenywe, eshialo eshiitsuulemwo amabeele nobuushi. Isie nisie OMWAMI Nyasaye weenywe, owamwahukhasia netsimbia tsiabandu. 25Kho mwahukhasinjia tsisolo tsisiiye nende etsiomusilo, khandi amanyonyi amasiiye nende akomusilo; mureekwisia abeshisinyo khulwa isolo, kata linyonyi, kata ebindu biosi ebiselasela khwiloba, ebia ndamwahukhasia ninabio shichila nemisilo, ta. 26Mube abatakatifu banje; okhuba isie OMWAMI endi omutakatifu, ne ndamwahukhasia mutsimbia tsiabandu mbu mube abanje. 27Omusaatsa yesi kata omukhasi ouli owamayengo kata owebitsoyelo, yeerwe bwirwa; alaswe namachina; amabanga kabwe kabe khubo abeene.
Currently Selected:
Abalawi 20: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
