Abalawi 19
19
Amalako khukobutakatifu nende obwatoto
1OMWAMI naboolela Musa ari 2Boolela omukhung'aano kwosi kwabaana baIsiraeli mbu Mube abatakatifu; shichila isie OMWAMI Nyasaye weenywe endi omutakatifu. 3Buli mundu khwinywe ariitsenje nyina nende samwana, khandi mulindenje tsisabato tsianje; isie nisie OMWAMI Nyasaye weenywe. 4Murashiukhanila ebiabutswa ebio ebiinamilungwa, kata okhwikholela abeene sbanyasaye abasalule ta. Isie nisie OMWAMI Nyasaye weenywe. 5Olwa muba nimumalila OMWAMI omusango kwokhwishia, mukumale mbu mufuchiililwe. 6Kuliibwe khunyanga tsana eya mukumalilakhwo, nende mukamba; ne eshitonye nishiba nishitong'a okhuula khunyanga yakhataru, shisambwe nomulilo. 7Nishiba nishiliibwakhwo khunyanga yakhataru, shiba eshisinyo; shikulafuchiililwa ta; 8habula buli mundu ouliakhwo yeetuushe obumayaanubwe; aba niyoonooniye eshindu eshitakatifu shiOMWAMI; omundu oyo asishibwe mubandube. 9Olwa oba nochesa lichesa lielilobalio, orachesela elala omukundakwo mutsikoona, kata okhukhung'aasia ebirulume ebiomwichesalio ebisikaaleyo ta. 10Oraruluma mumukundakwo kwemitsabibu, kata okhutoola ebiamo ebiakhaba nibibunguluushe mumukundakwo kwemitsabibu ta; obileshele abamanani nabarende; isie nisie OMWAMI Nyasayewo.
11Mureebangakhwo ta, kata okhukhola akobukaati, kata okhubeehelana ta. 12Kata mureetsuba akobukaatii muliira lianje ta, nimwonoonia murio eliira liaNyasayewo; isie nisie OMWAMI.
13Orasandia owashio, kata okhumwiba eshindu ta; omurungo kwomukholi owahandiikwa omushaara, oleshe okhutong'a ninakwo eshilo tulu okhuula mutsuli ta. 14Orafwola omundu oweekala amarwi, kata okhurakhwo eshiisichirasio imbeli womubofu ta, ne mbu oriitsenje Nyaseyewo; isie nisie OMWAMI.
15Murakholakhwo likhuwa elirali lilunji mubuyaasii ta; orakholela abamanani ebiela, kata okhwongolela omundu omukhongo ta; habula oyaasie owashio mubulunjishi. 16Orachendachendanga mubandubo nochiikhanga, kata okhusinjila okhufukula obulamu bwowashio ta; isie nisie OMWAMI.
17Orakiyanga omwana weenywe mumwoyo mukari ta; okhukondekha omukondeshele owashio, obureetuukha eshionoono khululwe ta. 18Oramalanga eshikwoli, kata okhubiishilanga abaana babandu beenywe likhobo ta, habula oheelenje owashio shinga olwa wiheela omwene. Isie nisie OMWAMI.
19Mulindenje aka ndamulachilisia. Orafuchiilila emirukochio chiibulane nende echieimbia yindi ta; oraraaka mumukundakwo imwo yetsimbia tsibili ta; kata orachingakhwo eshiifwalo eshiitsokaanilemwo tsingubo tsietsimbia tsibili ta.
20Omundu yesi oukona mubusanji nomukhasi ouli omukholi omukula, ne nakhweebungwa nomusaatsa, ne nashili okhununulwa kata okhulekhuulwakhwo ta, kho bayaasibwe; bareerwa ta, shichila omukhasi shiyali omulekhuule ta. 21Naye omusaatsa yeetse nomusangokwe kweshiuku ewOMWAMI, hamuliango weliheema liokhwakaana, mbu limiiku liomusango kweshiuku. 22Kho omukuhani amutise limiiku liomusango kweshiuku imbeli wOMWAMI, khulwa eshionoonoshie eshia yoonoonile; naye alaleshelwa eshionoonoshie eshie yoonoonile.
23Olwa mulaba nimwinjiile mushialo tsana, nimuba nimuraachile emisaala chietsimbia tsiosi khulwa ebiliibwa, mubasie ebiamo biachio mbu nebisinde; emiyika chitaru bibe birio shinga ebisinde khwinywe; shibiliibwa ta. 24Nebutswa mumuyika kwakhane, ebiamo biachio biosi bibe ebitakatifu, mbu ebiahaanwa ebiokhwitsoomilia OMWAMI. 25Mana mumuyika kwakharaano muliitsenje ebiamo biachio, mbu bimeete okhumwamila ebiamo ebinji; isie nisie OMWAMI Nyasaye weenywe.
26Muraliakhwo eshindu shiosi eshili namalasile; kata mureekhoonyela obulookooli, kata okhulakulanga ta. 27Mureebeka lituma khubweni, kata okhwonoonia ebileefu khukoona tsiabio ta. 28Mureesalaka tsisalache khulwa abafu, kata okhwisamba tsisambililo ta; isie nisie OMWAMI.
29Oroonoonia omwanawo omukhaana nomukhola omutamba ta; eshialo shileshe okhukwa mubutamba, kata eshialo okhwitsulamwo akoluswa ta. 30Mulindenje tsisabato tsianje, nimuheelesia habundu wanje ahatakatifu oluyali; isie nisie OMWAMI.
31Murashiukhanila abamayengo kata abebitsoyelo ta; murabakhaaba, mbu mube mwibilu khulwabwe ta; isie nisie OMWAMI Nyasaye weenywe.
32Obasinjililenje abetsimbutsi, noheelesia tsimoni tsiomukofu oluyali, nomuria Nyasayewoisie nisie OMWAMI.
33Noba nomenyakhwo nomundu omurende mushialo shieenywe, oramukholela libii liosi ta. 34Omurende owa mumenyakhwo ninaye alamubeela shinga abeebule abali mwinywe; omuheele shinga olwa wiheela omwene; okhuba mwalinji abarende mushibala shiaMisiri; isie nisie OMWAMI Nyasaye weenywe.
35Murakholanga likhuwa elirali lilunji mubayaasii ta, kata mukhuchela oburambi kata obusiro kata obwitsulu ta. 36Mubeetsenje neshiitenjelesiol eshili habwene, namachina keiratili akali habwene, na efa eyili habwene, na hini eyili habwene; isie nisie OMWAMI Nyasaye weenywe, owamurusia mushibala shiaMisiri. 37Mulindenje aka emulachilisia kosi, nakobukhalachi bwanje kosi, nimukakhola. Isie nisie OMWAMI.
Currently Selected:
Abalawi 19: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
