Abalawi 18
18
Bakaanibwa oburakholakhwo akeshifwabwi ta
1OMWAMI naboolela Musa ari 2Boolela abaana baIsiraeli mbu Isie nisie OMWAMI Nyasaye weenywe. 3Murakholanga ebikhole ebia bakholanga mushibala shiaMisiri, omwa mwamenyanga, ta; kata ebikhole ebia bakholanga mushibala shiaKanaani, ewa emuyilanga, murabikholakhwo ta; kata murachenda muka balachilisinjia tawe. 4Mukholenje akobukhalachi bwanje, nimulinda aka ndalachilisia, mbu muchendenje muko; isie nisie OMWAMI Nyasaye weenywe. 5Kho mulindenje aka ndalachilisia, nakobukhalachi bwanje; akeenako, omundu yesi oukakhola alaba mwoyo khulwako; nisie OMWAMI.
6Omundu yesi khwinyue aleshe okhusita ahambi khumundu ouli ahambi ninaye muluyia lwabwe, okhufuunula eshihechenyeshie ta. Isie nisie OMWAMI. 7Eshihechenye shiaso, nishio eshihechenye shiamawo, orashifuunula ta; niye mawo; orafuunula eshihechenyeshie ta. 8Eshihechenye shiomukhasi waso, orashifuunula ta; nishio eshihechenye shiaso. 9Eshihechenye shiomukhaana weenywe, omukhaana waso kata omukhaana wamawo, kata niyeebulilwa hango kata niyeebulilwa haundi, eshihechenye shishie orashifuunula ta. 10Eshihechenye shiomukhaana womusianiwo kata eshiomukhaana womukhaanawo, orashifuunula ta; okhuba eshihechenye shiabwe nishio eshishio omwene. 11Eshihechenye shiomukhaana womukhasi waso, owa so yeebula, neniye omukhaana weenywe, orashifuunula ta. 12Orafuunula eshihechenye shiomukhaana wabwe so ta; okhuba ninyakhusenjewo. 13Orafuunula eshihechenye shiomukhaana wabwe mawo ta; okhuba yesi nimawo. 14Orafuunula eshihechenye shiomusiani wabwe so, eshisina mbu okhusitila omukhasiwe ahambi, taokhuba nimawo. 15Orafuunula eshihechenye shianyakhufialawo ta; niye omukhasi womusianiwo; orafuunula eshihechenyeshie ta. 16Orafuunula eshihechenye shiomukhasi womusiani weenywe ta; nishio eshihechenye shiomusiani weenywe. 17Orafuunula eshihechenye shiomukhasi khandi nende omukhaanawe ta; kata orabukula omukhaana womusianiwe, kata omukhaana womukhaanawe, okhufuunula eshihechenyeshie ta; nabobwikho bwahambi; noluswa. 18Oraleera omukhasi ewa omukhaana wabwe ali, abe muhalikhwanyene namunyasia, okhufuunula eshihechenyeshie, olwa oundi oyo ashili mwoyo ta.
19Orasitila omukhasi ahambi okhufuunula eshihechenyeshie olwa aba nashili mwibilu khulwa obukaalibwe ta. 20Orakona nomukhasi wowashio khulwa obuheyi, okhwira mwibilu khululwe ta. 21Orahaana omundu owomulwibulolwo okhubisibwa khuMolekhu mumulilo, niwonoonia orio eliira liaNyasayewo ta; isie nisie OMWAMI. 22Orakona nomundu omusaatsa shinga oukona nomukhasi ta; neshisinyo. 23Kata orakona nomuruko kwosi, okhwira mwibilu khulwakwo ta; kata omukhasi yesi arasinjila imbeli womuruko, okhukona ninakwo ta; noluswa.
24Oreera mwibilu khulwa likhuwa liosi eliokhukano ta; okhuba khulwako kosi amahanga aka ndeelusia imbeli weenywe koonoonekha; 25eshialo nashio shioonoonibwa, ne niko akachilanga nishikuuma khulwa obumayaanu bwashio, eshialo nashio nishisala abamenyangamwo busala. 26Khulwako iny ve mulindenje aka ndalachilisia nakobukhalachi bwanje, nimurakholakhwo ebisinyo bino ta; kata omwibule kata omurende oumenya mwinywe tawe; 2728mbu eshialo shileshe okhumusala mwesi, olwa mwakhaba nimushionoonia, shinga olwa shiasala lihanga lilia eliamuranjilila; okhuba ebisinyo bino, abandu beshialo abamuranjilila babikholile biosi, eshialo nashio nishioonoonibwa. 29Okhuba omundu yesi oukhola likhuwa liosi eliokhubisinyo ebio, abandu ababikholanga balasishibwa mubandu babwe. 30Khulwako, mulindenje aka emulachilisia, mbu muleshenje okhukhola ebiima ebio bieshisinyo, ebiakholungwa imbeli weenywe, khandi mbu muleshe okhwira mwibilu khulwabio; isie nisie OMWAMI Nyasaye weenywe.
Currently Selected:
Abalawi 18: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
