Abalawi 15
15
Akokhuraatsa okhubii okhurula mumubili
1OMWAMI naboolela Musa naHaruni ari 2Boolela abaana baIsiraeli mbu Omusaatsa yesi naba nali neshisununu eshirulanga mumubilikwe, khulwa eshisununushie abe mwibilu. 3Nobukaalibwe mushisununushie buba buri nanwa; mbu omubilikwe nikuba nikuraatsa neshisununushie, kata omubilikwe nikukhaliishe mushisununushie, kho nobukaalibwe. 4Buli shitali eshia omundu oyo ouli neshisununu aba nakonilekhwo shibe shiomusilo; kata nende buli shindu eshia aba niyeekhaalekhwo nashio shibe shiomusilo; 5kata omundu yesi ouba natiilakhwo khushitalishie, yoosie tsingubotsie, niyeesinga mumatsi, naba mwibilu okhuula olwa bwila. 6Kata ouba niyeekhala khushindu shiosi eshia oyo ouli neshisununu yeekhaalekhwo, yoosie tsingubotsie, yeesinje mumatsi, naba mwibilu okhuula olwa bwila. 7Kata ouba natiilakhwo khumubili kwa oyo ouli neshisununu, yoosie tsingubotsie, yeesinje mumatsi, naba mwibilu okhuula olwa bwila. 8Kata oyo ouli neshisununu naba namufuutsakhwo omundu ouli omusiiyikhu, kho yoosie tsingubotsie, yeesinje mumatsi, naba mwibilu okhuula olwa bwila. 9Kata eshiokhwikhalakhwo khufarasi eshia oyo ouli neshisununu aba nachendeelekhwo, shibe shiomusilo. 10Kata omundu yesi outiilakhwo khushindu shiosi shiosi eshibeele hasiwe, abe mwibilu okhuula olwa bwila; kata ouchinga ebindu ebio, yoosie tsingubotsie, niyeesinga mumatsi, naba mwibilu okhuula olwa bwila. 11Kata omundu yesi owa oyo ouli neshisununu aba natiilakhwo, ne nalasaabile amakhono mumatsi ta, yoosie tsingubotsie, niyeesinga mumatsi, naba mwibilu okhuula olwa bwila. 12Kata inyungu yosi eya oyo ouli neshisununu aba natiilakhwo, yarwe; neshimanulwa shiosi shieshibaho nashio shiosibwe mumatsi.
13Ne oyo ouli neshisununu olwa aba nasiiywa eshisununushie, yeebasilie omwene tsindaalo musaafu khulwa okhusiiywakhwe, niyoosia tsingubotsie, niyeesinga omubili mumatsi komuchea akabiranga, naba omusiiye. 14Mana khunyanga yomunaane abukule amahuusi kabili kata emisosole chiamakuuku chibili, yeetse imbeli w hamuliango weliheema liokhwakaana, naheelesie omukuhani; 15naye omukuhani abimale, shilala shibe omusango kwobwonooni, neshindi omusango omusambe; kho omukuhani amutise imbeli w khulwa eshisununushie.
16Ne omusaatsa yesi naba niyeeloorelela, yeesinje omubilikwe mumatsi, naba mwibihl okhuula olwa bwila. 17Kata buli ngubo kata buli liseelo elilikhwo ameenyali tsana, shiosibwe mumatsi nishiba omusilo okhuula olwa bwila. 18Nomusaatsa yesi owiloorelela nibali nomukhasi mubukono bulala, beesinje bombi mumatsi, nibaba mwibilu okhuula olwa bwila.
19Kata omukhasi naba narula mumubilikwe amatsayi, nikali akokhutsia mumwesi, abe mubukaalibwe tsindaalo musaafu; nomundu yesi oumutiilakhwo abe mwibilu okhuula olwa bwila. 20Kata buli shindu eshia aba nakonilekhwo nali nobukaalibwe, shibe shiomusilo; kata nende buli shindu eshia aba niyeekhaalekhwo, nashio shibe shiomusilo. 21Kata omundu yesi ouba natiilakhwo khushitalishie, yoosie tsingubotsie, niyeesinga mumatsi, naba mwibilu okhuula olwa bwila. 22Kata omundu yesi ouba natiilakhwo khushindu shiosi eshia aba niyeekhaalekhwo, yoosie tsingubotsie, niyeesinga mumatsi, naba mwibilu okhuula olwa bwila. 23Kata nikaba khushitali, kata khushindu shiosi eshia aba niyeekhaalekhwo, olwa ashitiilakhwo alaba mwibilu okhuula olwa bwila. 24Kata omusaatsa yesi naba nakona ninaye, obukaalibwe nibuba khuye, abe mwibilu tsindaalo musaafu; kata buli shitali eshia akonakhwo shikwe eshiomusilo.
25Kata omukhasi naba niyeerulutsa tsindaalo tsinyinji etsirali tsindaalo tsiene tsiobukaalibwe ta, kata niyeerulutsa tsindaalo etsibira etsiobukaalibwe; tsindaalo tsiosi tsiokhwirulutsakhwe, abe mwibilu, shinga olwa abeetsanga mundaalo tsiobukaalibwe; aba mwibilu. 26Buli shitali eshia aba nakonakhwo mundaalo tsiokhwirulutsakhwe, shibe khuye shinga eshitali shiobukaalibwe; kata buli shindu eshia aba niyeekhalakhwo, shikwa shiomusilo, shinga omusilo kwobukaalibwe. 27Kata omundu yesi ouba natiilakhwo khubindu tsana abe mwibilu; yoosie tsingubotsie, niyeesinga mumatsi, naba mwibilu okhuula olwa bwila. 28Ne naba nasiiywa okhwirulutsakhwe, yeebasilie omwene tsindaalo musaafu, nolunyumakhwo alaba omusiiye. 29Mana khunyanga yomunaane abukule amahuusi kabili kata emisosole chiamakuuku chibili, yeetse ninabio ewomukuhani, hamuliango weliheema liokhwakaana. 30Naye omukuhani amale shilala shibe omusango kwobwonooni, neshindi shibe omusango omusambe; kho omukuhani amutise imbeli w khulwa okhwirulutsakhwe khwobukaali.
31Nolwa mulaahukhasinjia abaana baIsiraeli khubukaali bwabwe; baleshe okhufwila mubukaali bwabwe, niboonooniye eshimenyo shianje eshili hakari wabwe.
32Kano niko amalako khuka oyo ouli neshisununu, nende khuka oyo owiloorelela, naba ario nobukaali; 33khandi khuka oyo oulwala khulwa obukaalibwe; mbu khukomundu ourula eshindu mumubili, kata omusaatsa kata omukhasi, kata khukomusaatsa oukona nomukhasi ouli mwibilu.
Currently Selected:
Abalawi 15: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
