Abalawi 14
14
1OMWAMI naboolela Musa ari 2Kano kabe amalako khukomundu wobuchele khunyanga yokhusiiywakhwe; mbu aleerwe ewa omukuhani ali; 3naye omukuhani arule mukambi; mana omukuhani ahenjelesie; ne oluumbe Iwobuchele niluba nilumalile okhuhona muwobuchele tsana, 4kho omukuhani abalache okhumubukulila omundu tsana ouli okhusiiywa, amanyonyi amasiiyikhu kabili akali mwoyo, nolusaala Iwomusiita, neingubo iranzayi, namabinu; 5mana omukuhani abalache okhwirila linyonyi elala khu ako kabili khulutaabo ikulu wamatsi komuchela akabiranga. 6Nalio linyonyi elishili mwoyo, alibukule, halala nolusaala tsana Iwomu-siita, neingubo iranzayi, namabinu, nabiina ebio nende linyonyi tsana elili mwoyo mumalasile kelinyonyi eliirilwe ikulu wamatsi komuchela akabiranga. 7Mana akamiitse khu oyo ouli okhusiiywa obuchelebwe okhuula musaafu, narumbula mbu nomusiiye, nalekhuula linyonyi elo elili mwoyo mumikunda ebulafu. 8Mana omundu oyo ouli okhusiiywa yoosie tsingubotsie, niyeebeka pe, niyeesinga mumatsi, kho abe omusiiye; ne olunyuma lwa ako yeenjile mukambi; nebutswa amenyenje elwanyi weliheemalie tsindaalo musaafu. 9Mana khunyanga yomusaafu, yeebeche liswi liosi, neshileefu, nebisiche, kata amaswake kosi pe, yeebeche; khandi yoosie tsingubotsie, niyeesinga omubilikwe mumatsi, naba omusiiye.
10Mana khunyanga yomunaane abukule amakondi keshimwamwane kabili akabula obulema, nelisibiini elala liomuyika mulala elibula obulema, nebitonye bitaru bielikhumi bia efa yobusie obunyushe obutsokasiibwe amafura khulwa omusango kweimele, namafura akahela ilogu' ndala. 11Naye omukuhani oumusiiya asinjisie omundu mwene ouli okhusiiywa, nebindu biosi, imbeli w, hamuliango weliheema liokhwakaana. 12Mana omukuhani abukule likondi elala khumakondi keshimwamwane tsana, nalileera libe omusango kweshiuku, namafura ako akahela ilogu ndala, nabichela imbeli w bibe omusango kwokhuchelwa. 13Kho yeere likondi lieshimwamwane habundu aha beerelanga omusango kwobwonooni nomusango omusambe, habundu ahatakatifu tsana; okhuba shinga omusango kwobwonooni olwa kuli okwomukuhani, nolwa omusango kweshiuku kuli kurio okukwe; nomutakatifu muno. 14Mana omukuhani abukule khumalasile akomusango kweshiuku, omukuhani nakara khubutsunzu bweshirwi shisaatsa shia oyo ouli okhusiiywa, khandi khulwala olukali Iwomukhonokwe musaatsa, khandi khushino eshikali shieshilenjeshie shisaatsa; 15mana omukuhani abukulekhwo khulogu eyo yamafura, nakatsukha mushikalo shiomukhono mukhasi, okukwe omwene; 16omukuhani niyeena olwalalwe lusaatsa mumafura akali mumukhonokwe mukhasi, namiitsakhwo amafura nolwala okhuula musaafu imbeli wOMWAMI. 17Mana amafura akashitong'a mumukhonokwe, akare khubutsunzu bweshirwi shisaatsa shia oyo ouli okhusiiywa, nokhulwala olukali Iwomukhonokwe musaatsa, nokhushino eshikali shieshilenjeshie shisaatsa, khumalasile kalia komusango kweshiuku. 18Namafura akashitong'a mumukhono kwomukuhani, akare khumurwe kwa oyo ouli okhusiiywa; omukuhani namutisa imbeli wOMWAMI. 19Kho omukuhani akhole omusango kwobwonooni, namutisa oyo ouli okhusiiywa khulwa obukaalibwe; mana olunyumakhwo yeere omusango kwokhusambwa; 20omukuhani namala omusango omusambe nomusango kweimele khushimalilo; omukuhani namutisa ario, mana alaba omusiiye.
21Ne naba nali omumanani ouranyala ebindu ebihela birio ta, kho abukule likondi elala lieshimwamwane liomusango kweshiuku eliokhuchelwa, okhumutisa, neshitonye shilala shieikhumi shia efa yobusie obunyushe obutsokasiibwe amafura khulwa omusango kweimele, neilogu ndala yamafura, 22namahuusi kabili, kata emisosole chibili chiamakuuku, shinga olwa anyala okhunyoola; shilala shibe shiomusango kwobwonooni, neshindi nashio shiomusango omusambe. 23Mana khunyanga yomunaane, yeetse ninabio ewomukuhani, hamuliango weliheema liokhwakaana, imbeli w, khulwa okhusiiywakhwe; 24naye omukuhani abukule likondi liomusango kweshiuku neilogu yamafura tsana, omukuhani abichele imbeli w, bibe omusango kwokhuchelwa. 25Mana yeere likondi tsana liomusango kweshiuku, omukuhani nabukula khumalasile akomusango kweshiuku, nakara khubutsunzu bweshirwi shisaatsa shia oyo ouli okhusiiywa, khandi khulwala olukali Iwomukhonokwe musaatsa, khandi khushino eshikali shieshilenjeshie shisaatsa, 26mana omukuhani atsushekhwo khumafura ako mushikalo shiomukhono mukhasi okukwe omwene; 27kho omukuhani amiitsekhwo nolwalalwe olusaatsa akokhumafura akali mumukhonokwe mukhasi imbeli w okhuula musaafu. 28Mana omukuhani arekhwo akokhumafura akali mumukhonokwe khubutsunzu bweshirwi shisaatsa shia oyo ouli okhusiiywa, khandi khulwala olukali Iwomukhonokwe musaatsa, khandi khushino eshikali shieshilenjeshie shisaatsa, habundu hosi aha amalasile komusango kweshiuku kareebwa; 29namafura akashitong'a mumukhono kwomukuhani akare khumurwe kwa oyo ouli okhusiiywa, okhumutisa imbeli wOMWAMI. 30Mana amale elala khumahuusi kata khumisosole chiamakuuku, shinga olwa anyalile okhunyoola, 31mbu elala liomusango kwobwonooni nelindi liomusango omusambe, halala nomusango kweimele; naye omukuhani amutise oyo ouli okhusiiywa imbeli wOMWAMI. 32Kano niko amalako khuka oyo owa oluumbe Iwobuchele buli muye, ne naranyala okhunyoola ebiene ebikhoyeele okhusii-ywakhwe ta.
33OMWAMI naboolela Musa naHaruni ari 34Olwa mulaba nimwinjiile mushialo shiaKanaani, eshia emuheelesia shibe eshieenywe, ne niramwo oluumbe Iwobuchele munzu yosi eyomushialo eshili eshieenywe, 35mana omwenenzu tsana niyeetsa naboolela omukuhani ari Isie enduutsi mbu fwana oluumbe lundi lulimwo munzu yanje; 36kho omukuhani alache mbu barusie ebindu biosi ebili munzu omwo, omukuhani mwene narashieenjila okhulola aholuumbe ta, mbu biosi ebili munzu bileshe okhukwisibwa bibe omusilo; nolunyumakhwo omukuhani yee-njile okhulola inzu. 37Kho ahenjelesie haluumbe; ne oluumbe niluba niluli mwisiisi lieinzu, shinga tsikhombekhwo, etsiobukondo bweisuutsa kata tsiranzayi, nitsilolekha shinga etsihobooshekhwo mwisiisi; 38kho omukuhani arule munzu, okhuula khumuliango weinzu, niyeekala inzu eyo tsindaalo musaafu. 39Mana khunya-nga yomusaafu omukuhani akalushe, ahenjelesie; ne haluumbe nihaba nihalandile khwisiisi lieinzu, 40omukuhani abalache mbu balikulule amachina aka oluumbe lulimwo, bakafuube habundu ahali homusilo, elwanyi welitaala. 41Khandi abalache okhuhalakara munzu mukari, aharondokhanaho; mana litoyi elia bahalakarakhwo balitsushe elwanyi welitaala, habundu ahali homusilo. 42Mana babukule amachina kandi, bakare mushilenje shiamachina kalia; naye abukule litoyi liyia, ahoome inzu tsana.
43Ne oluumbe niluba nilukalukha khandi nilurubukha munzu omwo olunyuma Iwokhurusiamwo amachina, nokhuhalakara inzu, nokhuchihooma, 44kho omukuhani yeenjile, ahenje; ne oluumbe niluba nilulandile munzu, nibwo obuchele obunyanya obuli munzu; nomusilo. 45Kho alikulule inzu, amachina kayo, nemisaala chiayo, nelitoyi liosi lieinzu tsana; mana abichinje, abirusie mwitaala, okhuula habundu ahali homusilo. 46Kata omundu yesi owinjila munzu omwo tsindaalo etsio tsiosi olwa yibeetsanga niyiikaale, abe mwibilu okhuula olwa bwila. 47Kata omundu yesi oukona munzu omwo, yoosie tsingubotsie; kata ouliila munzu omwo, yesi yoosie tsingubotsie.
48Nebutswa omukuhani naba niyeenjila, nahenjelesia, ne haluumbe niharalandile munzu omwo olunyuma Iwokhuhoomwa khweinzu ta; kho omukuhani arumbule mbu inzu tsana neisiiye, shichila oluumbe luhonile. 49Ne khulwa okhusiiya inzu abukule amanyonyi kabili, nolusaala Iwomusiita, neingubo iranzayi, namabinu; 50mana yeerele linyonyi elala khu ako khulutaabo, ikulu wamatsi komuchela akabiranga; 51mana abukule olusaala tsana Iwomusiita, namabinu, neingubo iranzayi, nelinyonyi elishili mwoyo, abiine mumalasile kelinyonyi eliirilwe, khandi mumatsi ako komuchela akabiranga, namiitsa khunzu okhuula musaafu. 52Kho asiiye inzu namalasile kelinyonyi khandi namatsi komuchela akabiranga, khandi nelinyonyi elili mwoyo, khandi nolusaala Iwomusiita, namabinu, neingubo iranzayi. 53Mana alekhuule linyonyi tsana elishili mwoyo, lirule mwitaala litsie mumikunda ebulafu; kho ario atise inzu; nayo yilaba isiiye.
54Kano niko amalako khukoluumbe Iwobuchele bwetsimbia tsiosi, kata nende elieliyaayasi; 55kata khukobuchele bweingubo, kata obweinzu; 56kata khukelifwimbe, kata likamba, kata eshitayi; 57okhumanyia olwa buba obwobukaali kata obusiiyikhu; amalako khukobuchele ngako.
Currently Selected:
Abalawi 14: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
