Abalawi 11
11
Ebili-mwoyo ebiemisilo nende ebisiiyikhu
1OMWAMI naboolela Musa naHaruni ari 2Boolela abaana baIsiraeli mbu Bino nibio ebilimwoyo ebia mulaliitsanga musolo tsiosi etsili mushialo; 3mbu yosi eyikabukhana oluhakayu eya eshilenje shieeyara hakari, eyinyanyanga ikaamuula, mutsisolo tsiosi eyo niyo eya mulaliitsanga. 4Habula khutsinyanyanga ikaamuula kata khutsikabukhana oluhakayu, muleshenje okhulia khutsino; mbu ingamia, shichila yinyanyanga ikaamuula, ne shiyikabukhana oluhakayu ta, khwinywe neyomusilo; 5nelicheneli, shichila linyanyanga ikaamuula, ne shilikabukhana oluhakayu ta; khwinywe neliomusilo; 6neshituyu, shichila shinyanyanga ikaamuula, ne shishikabukhana oluhakayu ta; khwinywe neshiomusilo. 7Neimbiitsi, shichila yikabukhana oluhakayu, niyili neshilenje eshieeyara hakari, ne shiyinyanyanga ikaamuula ta; khwinywe neyomusilo. 8Muraliakwo hkhunyama yatsio, kata okhutiilakhwo khubirundu biatsio ta; khwinywe netsiomusilo.
9Khubiomumatsi biosi, ebia mulaliitsangakhwo mbiebino; mbu shiosi shiosi eshili nebibehe nende amasale, mumatsi kosi, munyanza tsiosi nomumialo, mubiliitsenje. 10Nebutswa biosi ebibula ebibehe namasale munyanza nomumialo, khubiosi ebiselasela mumatsi, nokhubili mwoyo biosi ebili mumatsi, ebio nebisinyo khwinywe; 11khandi bilabeetsanga khwinywe ebisinyo; muraliakhwo khunyama yabio ta; kata ebirundu biabio, bibe eshisinyo khwinywe. 12Eshindu shiosi shiosi eshibula ebibehe namasale khubiomumatsi, eshio neshisinyo khwinywe.
13Khandi bino nibio ebilabeetsanga ebisinyo khwinywe khumanyonyi; bileshe okhuliibungwa; nebisinyo; mbu inditsu, neshikhokorelo, nelihuutselo; 14neshikhupi, nolukakha, khumbia tsiabio shinga olwa tsili; 15buli likhokho, khumbia yalio shinga olwa lili; 16nelihuto, neimbukambuka, neinyanje, nelihungu, khumbia tsiabio shinga olwa tsili; 17nelikhuule, nanamulobi, neliyichichi, 18neifiitibili, neimware, neingosia; 19nelikuyi, nelinakha, khumbia tsiabio shinga olwa tsili, nelihutihuti, nelinyinya.
20Ebindu biosi ebimoolanga hasi, ebili netsimbaha nibichendela ebilenje bine, nebisinyo khwinywe. 21Nebutswa muliitsenje bino, ebiokhubindu ebiselasela ebili netsimbaha nibichendela ebilenje bine, ebili nebilenje ikulu wamalaaro kabio okhusiilila khushialo; 22khubio, ebia mulaliitsanga mbiebino; mbu isiche khumbia yayo, nobwonya khumbia yabwo, namahalang'ang'a khumbia yako, nebikuunyili khumbia yabio. 23Nebutswa ebiokhubiselasela ebili netsimbaha, ebili nebilenje bine nebisinyo khwinywe.
24Tsino nitsio etsilamukwisinjia okhuba nobukaali; omundu yesi outiilakhwo khushirundu shiatsio shiosi abe mwibilu okhuula olwa bwila; 25kata omundu yesi ouchingakhwo eshiokhushirundu shiatsio, yoosie tsingubotsie, naba mwibilu okhuula olwa bwila. 26Buli solo eyikabukhana oluhakayu, neya eshilenje eshirayeeyara hakari kata eyiranyanyanga ikaamula ta, neyomusilo khwinywe; buli mundu oubitiilakhwo abe mwibilu. 27Kata yosi yosi eyichendelanga amakhumbu, musolo tsiosi etsichendelanga ebilenje bine, neyomusilo khwinywe; omundu yesi outiilakhwo khushirundu shiatsio abe mwibilu okhuula olwa bwila. 28Kata ouchingakhwo eshirundu shiatsio yoosie tsingubotsie naba mwibilu okhuula olwa bwila; nebiomusilo khwinywe.
29Bino nibio ebili ebiomusilo khwinywe mubindu ebiselasela khushialo; mbu ifikho, nakhabuuto, nelihumbachila khumbia yalio; 30nelibaakala, neimbulu, nelibaakala elianalwanda, nelisiakale, nelikhaniafu. 31Ebio nibio ebili ebiomusilo khwinywe mubindu biosi ebimoolanga; omundu yesi oubitiilakhwo nibimalile okhufwa abe mwibilu okhuula olwa bwila. 32Ne eshindi shiosi eshiokhubio eshiba nishifwile nishiba nishikwa khushindu shiosi, eshindu tsana shikwe eshiomusilo; nishiba eshimanulwa shieshibaho, kata eshiifwalo, kata liseelo, kata likunia, kata eshimanulwa shiosi shiosi eshikholelungwa omulimo kwosi, shireebwe mumatsi nishiba eshiomusilo okhuula olwa bwila; mana shibe eshisiiye. 33Kata buli nyungu yelitoyi eya shilakwakhwo, eshindu shiosi eshiba nishilimwo shibe eshiomusilo, ne eyene yarwe. 34Ebiliibwa biosi ebiokhuliibwa ebibamwo amatsi, bibe ebiomusilo; kata ebiokhunywa biosi ebiokhunyweebwa ebiomusiongo eyili yirio, nabio bibe ebiomusilo khwinywe. 35Kata eshitonye shiosi shieshirundu shiabio nishiba nishikwa khushindu shiosi eshindu tsana shibe eshiomusilo; nishiba lichiiko kata amayika, shisasakwe ebitonye ebitonye; nebiomusilo, khandi bibe khwinywe ebiomusilo. 36Nebutswa isebele kata liyabo elilimwo amatsi amanji libe lisiiyikhu, habula akeenako akatiila khushirundu kabe akomusilo. 37Kata eshitonye shiosi shieshirundu shiabio nishiba nishikwa khumwo yokhumiitswa yosi eyili okhumiitswa yibe butswa isiiyikhu. 38Nebutswa imwo niyiba niyiiniikhwe mumatsi, mana eshitonye shiosi shieshirundu shiabio nishikwakhwo, yibe eyomusilo khwinywe.
39Ne isolo yosi eya mufuchiililwa okhuliitsanga niyiba niyifwa, outiila khushirundu shiayo abe mwibilu okhuula olwa bwila. 40Ne oulia khushirundu tsana yoosie tsingubo, naba mwibilu okhuula olwa bwila; kata ouchinga eshirundu tsana yesi yoosie tsingubo naba mwibilu okhuula olwa bwila.
41Buli shindu eshiselasela khushialo neshisinyo; shiraliibwakhwo ta. 42Eshindu shiosi eshimoolanga nende inda, kata shiosi eshichendelanga ebilenje bine, kata shiosi eshili nebilenje ebinji, khubiselasela biosi, ebio ebiselasela khushialo, ebienebio murabiliakhwo ta; okhuba nebisinyo. 43Mureekwisia abeene abebisinyo khulwa ebiselasela biosi biosi, kata okhwikwisia abobukaali khulwabio, mube mwibilu khulwabio ta. 44Shichila isie nisie OMWAMI Nyasaye weenywe; kho mwiyahule, mube abatakatifu; okhuba isie endi omutakatifu; kata mureeyoonoonia abeene khulwa ebindu ebiselasela bieimbia yosi, khubio ebimoolanga khushibala ta. 45Okhuba isie nisie OMWAMI owamutikulusia nimurusia mushialo shiaMisiri mbu embe Nyasaye weenywe; mubeetsenje abatakatifu, okhubaisie endi omutakatifu.
46Kano niko amalako khuketsisolo, nokhukamanyonyi, nokhukebili mwoyo biosi ebichendanga mumatsi, nende khukebiosi ebiselasela khushialo; 47okhwahukhasia ebiemisilo nebisiivikhu, nende okhwahukhasia ebili mwoyo ebiliibungwa nende ebili mwoyo ebiraliibwa ta.
Currently Selected:
Abalawi 11: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
