Abalawi 10
10
Eshionoono shiaNadabu naAbihu
1Nadabu naAbihu, abaana baHaruni, babukula shiomundu eshikayeshie, nibarakhwo omulilo, namalesi kelibuuliesikhwo, nibaleera omulilo kwalukano imbeli wOMWAMI, okwa arali nabalachilekhwo ta. 2Mana omulilo kwarula ewOMWAMI, nikubalia; nibafwilaho imbeli wOMWAMI. 3Mana Musa nasunjila Haruni mbu Kano niko aka yaboola, ari Ndalalolosia obutakatifu bwanje mubeenabo abali ninasi ahambikhandi imbeli wabandu bosi ndalaheebungwa oluyali. Naye Haruni naholeela tsi.
4Musa nalanga Mishaeli naElisafani, abaana baUzieli, ousamwana Haruni, nababoolela mbu Site ahambi, muchinje abaana beenywe mubarusie hambeli wahabundu ahatakatifu, mubayile elwanyi weikambi. 5Nabo nibasita ahambi, nibabachinga nibashiifwalile amakoti kabwe tsana, nibabarusia mukambi; shinga Musa olwa yali naboolile. 6Musa nababoolela Haruni naEleazari naItsamari abaanabe, ari Muraboholola liswi lieenywe, kata murarandula ebichingwa bieenywe ta; mbu muleshe okhufwa, khandi mbu oburima buleshe okhwitsa khumukhung'aano kwosi; habula abaana beenywe, nibo inzu yosi yaIsiraeli, beekhuule obuyii obwa OMWAMI ahambiye 7Kata murarulakhwo hamuliango weliheema liokhwakaana ta, muleshe okhufwa; okhuba amafura kOMWAMI akatsushiililwa kali khwinywe. Nibakhola bario, amakhuwl kaMusa shinga olwa kali.
Akakhoyeele abakuhani, okhukhola nokhuheebwa
8OMWAMI yaboolela Haruni ari 9Oranywakhwo idivai kata amalwa ta, kata iwe kata abaanabo, olwa mutsia okhwinjila mwiheema liokhwakaana, mbu muleshe okhufwa; libe elilachilisibwa tsindaalo tsiosi munzibulo tsieenywe tsiosi. 10Mukhoyile okhwahukhasinjia ebio ebili ebitakatifu nende ebirali ebitakatifu ta; kata ebili biomusilo nende ebili ebisiiyikhu; 11khandi mbu mwechesie abaana baIsiraeli kosi akalachilisibwa, aka OMWAMI yababoolela mumunwa kwaMusa.
12Mana Musa naboolela Haruni, nende Eleazari naItsamari abaanabe abali nibashisikaale, ari Bukulenje eshiomusango kweimele eshiba nishitong'ile khubihaanwa biOMWAMI ebikholilwe omulilo, nimushiliila hashimalilo, aharali amamela ta; okhuba neshitakatifu muno. 13Mushiliile habundu undi ahatakatifu, shichila nishio eshikhukhoyeele, neshikhoyeele abaanabo, khubihaanwa biOMWAMI ebikholelwa onmulilo; okhuba nolwa endachilwe endio. 14Nabio itakata eyokhuchelwa neshiatakho shieisadaka, mubiliile habundu hosi ahalafu; iwe, nabaanabo abasiani nabakhaana bosi; okhuba bihaanungwa nibikhukhoyeele, nibikhoyeele abaanabo abasiani, okhurula mumisango chiokhwishia chiabaana baIsiraeli. 15Eshiatakho shieisadaka neitakata eyokhuchelwa, beetse ninabio halala nebihaanwa ebikholelwa omulilo, ebiamasinya, mbu bichelwe imbeli w, bibe omusango okuchelwa; mana bibe ebibio, nebiabaanabo bosi, ebimukhoyeele tsindaalo tsiosi; shinga OMWAMI olwa yalaka.
16Ne Musa yeenya muno akeimbusi yomusango kwobwonooni; ne lola, yali niyisambilwe; mana nasinyishila Eleazari naItsamari, abaana baHaruni abali nibashisikaale, ari 17Mbushiina nimuraliiliile omusango kwobwonooni habundu ahatakatifu ta, olwa kuli omutakatifu muno, khandi mbu kumuheebwa mbu mwituushe obumayaanu bwomukhung'aano, okhubatisa imbeli wOMWAMI? 18Lole, amalasile kakwo shikaleerilwe mubundu mutakatifu mukari ta; mubeele nimukhoyile okhukuliila habundu ahatakatifu, shinga olwa ndalaka. 19Harimi namusunjila Musa ari Lola, leelo bamalile omusango kwabwe kwobwonooni nomusango kwabwe omusambe imbeli wOMWAMI; mana amakhuwa kano kangwiliile! Ne nimba nindakhaliile omusango kwobwonooni leelo, elo liakhamuchamisiye OMWAMI noho? 20Ne olwa Musa yahulila ario, yakafuchiilila.
Currently Selected:
Abalawi 10: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
