TsiaYeremia 3
3
Khulwa tsimbabasi tsiaNyasaye, banaayilanga obuhabinwi
1Nisie omundu tsana ouluutsi obusandibwi khulwa indabushi yoburimabwe;
2yanzimiliile niyanjesia mushiilima harali obulafu bwosi ta;
3toto mwene, ashiukhasilinjia omukhonokwe khase khase, eshiteere tulu.
4Ahwelesiye likhoba neinyama yomubili kwanje;
afunaache amakumba kanje.
5Yoombaashe eshiokhunzikalila,
niyafumbila obululu nobuchoonyi.
6Yamenyinjia handu hamali ti,
shinga abo abafwa khale.
7Yasirilekhwo olukaka, endeshe okhurulanga,
niyambohakhwo eminyololo emisiro;
8kata olwa ekhupa tsimbungu nimuhaabila yeekalanga amarwi khukhusaaya khwanje.
9Yeekaale emihanda chianje namachina amabaatse,
nashiamia tsinjila tsianje.
10Yambeelanga shinga itubu eyingoneshela;
shinga itaianyi eyili hamabiswi;
11yayashiamiye khunjila tsianje, niyarandula ebitonye ebitonye,
niyangwisia omubisandu.
12Yafumbile obuyingobwe, niyaraho embe eshia achoomiakhwo eshisele.
13Alasile ebisele bieimotiaye mutsifiko tsianje.
14Engwile owokhunyokhoosibwa nabandu bosi,
nende okhwimbwa eshiteere tulu.
15Yanzitsusiye obululu;
yanzikusiye indululusia.
16Yafunaache ameeno kanje nebiyalu,
niyafuunikhakhwo likoshe.
17Orusiye omwoyo kwanje ehale nomulembe;
kata ndibiliile pe akobwaale.
18Nimboola mbu Amaani kanje kahweele;
nende kosi aka ndalindiililanga okhurula khuMWAMI.
19Yitsulile obusandi bwanje nende amasila,
indululusia, neinduswe.
20Omwoyo kwanje kushibiitsulilanga,
nikwinamibwa hasi mwisie,
21Nebutswa lino nditsulilanga,
nimba nobunaayi;
22mbu Obuheeli oburalilu bwOMWAMI shibuhweetsanga,
kata eshisashie okhwakama ta.
23Bibeetsanga ebiyia mutsuli buli mutsuli;
obwisiikwabwo nobukhongo muno.
24Omwoyo kwanje kuboola mbu OMWAMI niye omukabo kwanje,
niko akachila ndalanaayilanoa muye.
25OMWAMI nomulayi khubeenabo abamulindiililanga,
khumwoyo okwo okumukhaaba.
26Nobulayi mbu omundu alindiilile obuhonia bwOMWAMI mubuholeelefu.
27Nobulayi mbu omundu abe mwikokolo nashili omubuukha.
28Yeekhale yenyene naholeelile,
olwa ali OMWAMI oumureele mulio;
29yeetuutuyia okhuula khwiloba;
haundi obunaayi bwakhaba nibushiliho.
30Amushiukhasilie oluseya oyo oumupaama;
okhwitsusibwa yeetsusibwe amaseyo.
31Okhuba Omwami shialamusukuna inziayo ta;
32shichila kata niyakhaleera eshibeela,
khane alamubeela eshisa,
obunji bwobuheelibwe oburalilu shinga olwa buli.
33Shichila shiasandinjia nachamile ta,
kata okhubeelesia abaana babandu.
34Okhutubulila hasi webilenjebie ababohe bosi beshialo;
35okhwima omundu akamukhoyeele imbeli wa Oyo Ouli Ikulu Muno;
36okhwima omundu akali habwene mushiinashie;
ako Omwami shiafuchiilila ta.
37Niwina ousunganga, mana kamala keekhole,
narali Omwami oulachile ta?
38Shikhuli okhurula mumunwa kwa Oyo Ouli Ikulu Muno
omwa murulanga amabii nende amalayi?
39Omundu ouli mwoyo abuutsuluula mbushiina,
omundu namundu, khulwa obukuumwi bwebionoonobie?
40Khurunilisie nikhuteema tsinjila tsieefwe,
nikhukalushila OMWAMI.
41Khumuchinguuliile emioyo chieefwe namakhono keefwe
Nyasaye ouli mwikulu.
42Khukhukhayile, nikhukhola induli;
nawe shiokhulesheele ta.
43Wifwimbile oburima, nokhulondachilila;
wirile, norabeelelela ta;
44wifwimbile lileesi,
okhusaaya khwosi khuleshe okhubira khuule ewa oli ta;
45okhukwisiye butswa amakhokoro namakokha hakari wetsimbia tsiabandu.
46Abasuku beefwe bosi bakhuseya muno.
47Oburii nende obuko bikhuulilekhwo,
indiri nobumululi.
48Tsimoni tsianje tsibisinjia amasika shinga omwalo
khulwa obumululwi bwomukhaana wabandu banje.
49Tsibisinjia nitsiralekha kata okhukhalikhakhwo ta,
50okhuula OMWAMI olwa alahenga hasi,
nokhulola, okhurula ewa ali mwikulu.
51Tsimoni tsianje tsinzuuna khulwa abakhaana bosi belitookho lianje.
52Bayiimile shinga linyonyi,
abali abasuku banje harali eshifune ta.
53Basukuna mubwina nishili mwoyo,
nibandasa amachina,
54amatsi nikamila okhuula khumurwe;
nimboola mbu Embweele.
55Ehaabiile eliiralio, e OMWAMI,
okhurula mubwina bwahasi muno.
56Ohuliile nimboola mbu Oreekala eshirwi khukhuhaaba khwanje ta.
57Usitiile ahambi inyanga eyo olwa ekhuhaabiile,
nosunga mbu Oraria ta.
58E Omwami, ufunaaniile eshiina shianje;
onunuule obulamu bwanje.
59E OMWAMI, oluutsi amabii aka ekholelungwa;
oyaasie eshiina shianje.
60Oluutsi eshikwoli shiabwe shiosi netsiyemi tsiabwe tsiosi khwisie.
61Ohuliile amanyeko kabwe, OMWAMI,
netsiyemi tsiabwe tsiosi khwisie;
62Eminwa chia abo abambuushila, netsinganakani tsiabwe,
bifukulanga eshiteere tulu.
63Ohenje okhwikhala khwabwe nokhubuukha khwabwe;
nisie owa beembanga.
64Olabarunga omurungo, OMWAMI,
okhuhela ebikhole biamakhono kabwe.
65Olabaheelesia obuumu bwomwoyo;
eshilaka munwa shishio shilaba khubo.
66Olabalondachilila noburima nobamalilana,
bahweho hasi welikulu liOMWAMI.
Currently Selected:
TsiaYeremia 3: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
