TsiaYeremia 2
2
Amasila kaSayuni karula khuMWAMI
1Makowe, Omwami muburimabwe afuuniishe omukhaana waSayuni lifumbi!
Okhurula mwikulu asukuune hasi khwiloba ing'oono yaIsiraeli;
kata shiyeetsuliile eshieneshio eshia alambisiakhwo ebilenje,
khunyanga yoburimabwe ta.
2Omwami amilile milu ebimenyo biosi biaYakobo; harali tsimbabasi ta;
muburimabwe akwisiye tsingoba tsiosi tsiomukhaana waYuda;
akwisiye hasi mubufwolwi oburuchi bwene nabakhulundu babwo.
3Muburimabwe obululu akhalaache buli Iwika lwosi lwaIsiraeli;
abarusiyekhwo omukhonokwe musaatsa imbeli wabasuku;
ahambiye omulilo muYakobo okulaliitsanga biosi ebibotokhanaho.
4Afumbile obuyingobwe shinga omusuku;
aralisiye omukhonokwe musaatsa shinga omufukuli;
yeerile bosi abachamisia tsimoni tsieefwe;
mwiheema liomukhaana waSayuni,
asunduule obululubwe shinga omulilo.
5Omwami akwile shinga omusuku,
amilile Isiraeli milu;
amilile tsinzutsie tsikhulundu tsiosi,
nalikulula tsingobatsie.
Amwinjiyiliye omukhaana waYuda amasika netsinzikhuulu.
6Asambuule litililie, shinga eliomumukunda;
alikuluule likhung'aanilolie;
OMWAMI yaakamiye muSayuni tsinduukho tsiemilukha netsisabato,
khandi mubusinyishibwe obululu afwolile omuruchi nende omukuhani bosi.
7Omwami yeebalile eshimaliloshie shiemisango;
habunduwe ahatakatifu hamusinya;
ahaanile mumakhono kabasuku amasiisi ketsinzutsie tsikhulundu;
bakholile obuyoka munzu yOMWAMI shinga obwokhunyanga yeinduukho yomulukha.
8OMWAMI areelekhwo omwoyo okhulikulula olukoba lwomukhaana waSayuni;
akhwesilekhwo omukoye,
kata shiarusiyekhwo omukhono kuleshe okhulikulula ta;
achilile olwashi nolukoba nibiikhuula;
biotosheelelal halala.
9Ebilibwabie bihobooshe mwiloba;
yoonooniye emiyinjiilochie nachifunaka;
omuruchiwe nabakhulundube bali mubamahanga;
amalako kabulaho;
ne kata abanabiibe shibanyoola libisulo elirula khuMWAMI ta.
10Abakofu bomukhaana waSayuni beekhaale hasi nibaholeela tsi;
beepuuchile olufu khumirwe nibeeboha tsingubo tsiamakunia;
abakhaana baYerusalemu beenamiye emirwe chiabwe hasi.
11Tsimoni tsianje tsiiliime khulwa amasika;
amala kanje kakalakala khulwa obusaalili;
esunduule omwoyo kwanje hasi nimbeelelela okhwonoonekha khwomukhaana wabandu banje;
shichila abaana abahele nabashinuuna bahumbutsanila nibakwa munjila tsielitookho.
12Bareebanga banyina bari Imele neidivai bili heena?
Olwa bahumbutsanila shinga abafumirwa munjila tsielitookho,
olwa obulamu bwabwe busundulwa khubilifu biabanyinamwana.
13Nekhurumbulile shiina? Nekhufwananie nende shiina,
iwe omukhaana waYerusalemu?
Nekhuchelasie nende shiina, mbu ekhulemie omwoyo,
iwe omukhaana omushisila waSayuni?
Okhuba okhwonoonekhakhwo nokhukali shinga inyanza;
ali heena ounyala okhukhuhonia?
14Abanabiibo bakhuluutsiili amabisulo kobukhaya, akobukaatii;
shibabisuule obumayaanubwo,
mbu tsikhabitsio tsikalusibwe, ta;
nebutswa bakhuluutsiili amakhuwa amakhaya, akalakhushiamia.
15Abakhubirakhwo bosi bakhuupila tsikhofi;
banyokhoosia omukhaana waYerusalemu,
nibamuyuyila omurwe; bari
Lino nilio litookho tsana elia abandu balanga mbu
Obulamba bweing'oono, nende Eshiokhusangaalilwa mushialo shiosi, noho?
16Abasukubo bosi bakhuseya muno;
banyokhoosia nibaluma tsinzala;
baboola mbu Khumumilile;
leelo luno neinyanga eya khwalindiililanga;
khuchinyoolile; khuchiluutsi!
17OMWAMI akholile aketsiyemitsie tsiosi;
yoosiye likhuwalie elia yalaka khale;
alikuluule, aharali okhubeelelela ta;
achilile abasuku nibakhwikhoyela;
achinguule olwika lwabafukulibo.
18Haabila Omwami,
iwe omukhaana waSayuni!
Amasikako kaarilikha shinga omwalo eshiteere neshilo;
orahuluukhakhwo ta,
kata tsimonitsio okhulekha.
19Buukha, okhupe tsimbungu mushilo,
olwa bachaaka okhuba meeso khubulindi;
sundula omwoyokwo busundula shinga amatsi imbeli wetsimoni tsiOmwami.
Omukalishile amakhono khulwa obulamu bwabaanabo abahele abahumbutsana khulwa inzala khubuchaachilo bwabuli injila.
20OMWAMI, henga olole!
Nibeena aba okholeele orio?
Abakhasi bakhalia abo aba beebula,
abaana aba balela khumakulu, noho?
Abakuhani nabanabii bakheerelwa hahundu hatakatifu hOmwami?
21Ababuukha nabakofu bosi bakona hasi khunjila;
abakhaana banje nabasooliili banje bakwile khulwa olukanga;
obeerile khunyanga yoburimabwo;
obasinzile businza, norababeelelela ta.
22Olanjile amariisia kanje tsimbeka tsiosi shinga oulanga abandu khunyanga yomulukha;
abulaho owihonokooshe kata outong'ile khunyanga yoburima bwOMWAMI;
abo aba ndalela nimboola,
omusuku wanje abamalilaane.
Currently Selected:
TsiaYeremia 2: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
