TsiaYeremia 1
1
Amasila kaSayuni mumbole
1Mako, litookho liikhaale lionyene,
elialinji niliitsuulemwo abandu!
Mako, likwile shinga omukhasi omulekhwa,
owali omukhongo mumahanga;
oyo omukhaye mutsingongo akwile omukholi oulunyibwa!
2Alilanga bululu mushilo,
amasikake kali khundamatsie;
mubatiabe bosi abulamwo oumulemia omwoyo;
abeetsabe bosi bamukholeele akobukaatii,
nibakwa abasukube.
3Yuda yaarilwe khulwa obusandibwi
nende khulwa obusiobeli obutinyu;
bulaano amenya mubamahanga,
naranyoola obuhuluushi ta;
abamulondachilila bosi bamunyoolile nali hakari mumatinyu.
4Emihanda echitsia eSayuni chiikhuula shichila babulaho abeetsa munduukho yemilukha;
muluyialwe mwosi nomukhaya;
abakuhanibe beesia amahuumo;
abakhaanabe bakhupibwa khushibii,
naYe omwene nasaalila obululu.
5Abafukulibe nibaamiha khuye,
abasukube nibaba mubwale;
okhuba OMWAMI yamusandia khulwa obunji bwobukhayibwe;
abaanabe abatiiti batsiile mububohwi nibalondwa nabafukuli tsana.
6Okhurula khumukhaana waSayuni ing'oonoye yosi yimurulilekhwo;
abakhulundube bakwile shinga tsimbongo etsiranyoola obwayilo ta;
beelukha nibabula amaani imbeli wa oyo oubalondachilila.
7Yerusalemu yeetsulilanga tsindaalo tsiobusandi namasilake nebiolukoosi biosi ebia yalinji ninabio okhurula khale.
Olwa abandube bakwa mumukhono kwomufukuli,
kata nabulaho owamuhabina,
abafukuli abo bamulola nibanyokhoosia okhukwakhwe.
8Yerusalemu yoonoona muno,
ne khulwako yakwile shinga owobukaali;
bosi abamuheelesinjia oluyali, bamuleka,
shichila baluutsi eshihechenyeshie;
naye omwene yeesia amahuumo,
nashiukhasia omurwe okhuhenga elubeka.
9Obukaalibwe bwali mungubotsie;
shiyeetsulilanga obumaliilishibwe ta;
khulwako akwile okhukwa khwamakana;
abulaho oumulemia omwoyo.
E OMWAMI, olole okhusandibwa khwanje,
okhuba omusuku yakhupila amakhu.
10Omufukuli abambuule amakhonoke khubindubie biosi ebiolukoosi;
kata aluutsi abamahanga nibeenjiile habunduwe hatakatifu,
abo aba wakaania mbu bareenjila mumukhung'aanokwo ta.
11Abandube bosi beesia amahuumo nibakhaaba ebiokhulia;
bakulaasia ebindu biabwe ebiolukoosi ebiliibwa okhubameeta amaani.
OMWAMI, henga olole;
okhuba ndafuba isie.
12Shimuteeba likhuwa ta, inywe mwesi ababira bubira?
Henje, mulole nibuba nibuliho obusaalili bwosi obwinga shinga obusaalili bwanje obwa ndasaaliisibwa,
obwa OMWAMI yasandilia khunyanga yoburimabwe obululu.
13Yaruma omulilo okhurula ikulu,
nakwisia nakwinjisia mumakumba kanje;
yabambuliile ebilenje bianje olurimba,
niyangalusia inyuma;
yachila nifwa omwoyo,
nimba omuteshele eshiteere tulu.
14Ebionoono bianje bimbooyilwekhwo,
omukhonokwe nikubifundikha tatat'ta;
likokolo liabio nilireebwa mwikosi lianje;
yaakamiye amaani kanje;
Omwami yambaanile mumakhono ka abo aba ekhayilwe okhusimbiila imbeli wabwe.
15Omwami afwolile abalulu banje bosi hakari wanje;
akhung'aasiye omukhung'aano okhufukula,
okhutubula abasooliili banje;
Omwami aseenile omukhaana omushisila waYuda shinga ouseena eshitiinyilo shieidivai.
16Endilila amakhuwa ako,
imoni yanje, imoni yanje yiroonya amasika;
okhuba omulemia womwoyo oukhoyile okhumeeta amaani ali ehale ninasi.
Abaana banje bakwile ababisandu,
shichila omusuku wahulile.
17Sayuni akalikha amakhono;
abulaho oumulemia omwoyo.
OMWAMI yalaka khukaYakobo mbu abamubotokhana babe abafukulibe;
Yerusalemu ali hakari wabwe shinga eshindu shiomusilo.
18OMWAMI akhola habwene;
okhuba ekholile obukhayi khwilakolie.
Chame mumbulile, inywe tsimbia tsiabandu;
lole obusaalili bwanje;
mbu abakhaana banje nabasooliili banje batsiile mububohe.
19Ndahaabila abatia banje,
ne bangaatia;
abakuhani banje nabakofu banje bafwila mwitookho,
olwa bakhaabanga ebiliibwa ebiakhabameeta amaani.
20Unenje, OMWAMI; okhuba endi mumatinyu;
amala kanje kakalakala khulwa obusaalili,
omwoyo kwanje kushiukhaanile mwisie,
okhuba ndakholile induli imbii;
ebulafu olukanga luleera okhufwilwa;
mungo mufwana shinga oluumbe.
21Bambuliile nimbinda;
abulaho ounemia omwoyo;
abasuku banje bosi bahuliile akamasila kanje,
nibatsatsahala shichila okholile orio.
Olaleera induukho eya wakhupakhwo omulome,
mana bo balaba shingana isie.
22Obubii bwabwe bwosi buule imbeliwo;
obakholele nabo shinga olwa wakholela isie khulwa obukhayi bwanje bwosi;
okhuba okhwisia amahuumo khwanje nokhunji;
omwoyo kwanje nomuteshele.
Currently Selected:
TsiaYeremia 1: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
