Yeremia 52
52
Oburuchi bwaZedeha
(2 Abaru. 24.18-20; 2 Akets. 36.16)
1Zedekia yali owemiyika amakhumi kabili namulala olwa yachaaka okhuruka; naruchila eYerusalemu emiyika ekhumi namulala; ne eliira lianyina liali Hamutali waYeremia oweLibina. 2Ne yakhola akali amabii mumoni tsiOMWAMI, kosi aka Yehoyakimu yakhola shinga olwa kali. 3Okhuba khulwa oburima bwOMWAMI, amakhuwa kamala keekhole muYerusalemu nende Yuda mbu yabasukuna barule imbeliwe.
Okhukwa khwaYerusalemu
(2 Abaru. 24.20—25.7; Yer. 39.1-7)
Ne Zedekia yakholela omuruchi waBabeli induli. 4Mana mumuyika kwashienda kwoburuchibwe, mumwesi kwekhumi khunyanga yekhumi eyomumwesi okwo, Nebukhadineza omuruchi waBabeli niyeetsa halala nelihelie liosi okhuseera Yerusalemu, nibakhupa ikambi yabwe imbeli walio; nibaswala ebituuli okhulifumbila. 5Kho litookho lieekalilwa lirio okhuula khumuyika kwekhumi nalulala kwomuruchi Zedekia. 6Khunyanga yashienda eyomumwesi kwakhane inzala yali ikhongo muno mwitookho; kata shishialiho eshiokhulia shiosi khulwa abeshialo ta. 7Mana eshibanga shieekulwa mwitookho, nabo abandu belihe bosi nibeelukha, nibarula mwitookho mushilo, nibalonda mushilibwa. Eshiali hakari wetsingoba tsibili, ahambi nolwanyi lwomuruchi; ne abaKalidayo bali nibafumbiile litookho; nibalonda khunjila yaAraba. 8Nebutswa lihe liabaKalidayo lialondachila omuruchi Zedekia, nibamunyoola khumihololookhwe chieYeriko; lihelie liosi nilisalaasibwa nilimulekha. 9Mana nibamuhamba omuruchi, nibamuyila ewa omuruchi waBabeli yali eRibila, mushialo shiaHamatsi; naye namukhalachila eshiina. 10Omuruchi waBabeli niyeera abaana baZedekia, omwene nalola; niyeerela nende abakhulundu bosi baYuda eRibila. 11Namufutula Zedekia tsimoni; omuruchi waBabeli namuboha nebitiili, namuyila eBabeli, namura mucheela okhuula khunyanga yokhufwakhwe.
AbaYuda bayilwa mubuhambe
(2 Abaru. 25.8-21; 2 Akets. 36.17-21; Yer. 39.8-10)
12Mana mumwesi kwakharaano, khunyanga yekhumi mumwesi, mumuyika kwekhumi nashienda kwomuruchi Nebukhadineza, omuruchi waBabeli, Nebuzaradani omwimilisi wabasikari abalindi, owakhalabanilanga omuruchi waBabeli, niyoola eYerusalemu; 13nasamba inzu yOMWAMI, nende inzu yomuruchi; kata tsinzu tsiosi tsieYerusalemu, tsiosi etsiali tsikhongo, yatsisamba nomulilo. 14Nabo bosi abelihe liabaKalidayo aba omwimilisi wabasikari abalindi yali ninabo, balikulula olukoba lwosi lwaYerusalemu tsimbeka tsiosi. 15Mana Nebuzaradani omwimilisi wabasikari abalindi yahamba abokhubashila obumanani mushialo, nomusikalo kwabandu abali nibatong'ile mwitookho, nende abo abahunzukha nibeelushila ewomuruchi waBabeli, halala nende abomukanda abatong'a, nabayila mumbohe. 16Habula Nebuzaradani omwimilisi wabasikari abalindi tsana yalekha abandi abokhubashila obumanani mushialo, okhulinda emitsabibu nokhulima emikunda.
17Ne tsisiilo tsana tsiomukasa etsiali nitsili munzu yOMWAMI, nende obwala, neinyanza yomukasa, ebiali nibili munzu yOMWAMI, abaKalidayo babisasaaka ebitonye ebitonye, nibayila omukasa kwabio kwosi eBabeli. 18Kata nende tsinyungu, nemiikho, namahana akokhusimilia omulilo, nebikaye, nebichiiko, nebimanulwa biosi biomukasa ebia beekhoonyelanga mubukhalabani, babiyila biosi. 19Nebikombe, netsindaabo tsiomulilo, nebikaye, netsinyungu, nebichibi bietsitaha, nemiendo, norubakuli; buli shindu eshiali shieitsahaabu, yabukula khulwa itsahaabu yashio; ne buli shindu eshiali shieifeetsa, yabukula khulwa ifeetsa yashio; omwimilisi wabasikari abalindi yabiyila biosi. 20Nabio tsisiilo etsio tsibili, neinyanza ndala, netsing'ombe tsiomukasa ekhumi natsibili etsiali hasi weinyanza tsana, nobwala, ebia omuruchi Sulemani yakholela inzu yOMWAMI, obusiro bwomukasa kebimanulwa ebio biosi shibwachelekha ta. 21Natsio tsisiilo oburambi bwabuli siilo bwali amakhono ekhumi namunaane; nomukoye kwamakhono ekhumi nakabili kwahela okhubotokhana ndala; obukhomefu bwayo bwahela tsinzala tsine; ne mukari mwayo mwal i omukhaya. 22Ne yalikhwo ingofia yomukasa; noburambi bweingofia bwali amakhono karaano; ingofia niyilikhwo eming'oono chietsikhanda namakomamanga tsimbeka tsiosi, chiosi nichili echiomukasa; nayo isiilo yakhabili niyili nende ebifwana birio, namakomamanga. 23Kaliho amakomamanga amakhumi shienda nakasasaba elubeka eyi nende eyi; amakomamanga kosi akali khuming'oono chietsikhanda tsimbeka tsiosi kali eshikhumi.
24Omwimilisi wabasikari abalindi yabukula Seraya omukuhani omukhulundu nende Zefania omukuhani wakhabili, nende abalindi bomuliango bataru; 25mana okhurula mwitookho yabukula omukali omulate undi owali nasinjililanga abandu belihe, nende abandu musaafu beshiina shiomuruchi abanyoolwa nibali mwitookho; nende omuhandiichi womuseesia welihe owakhung'aasinjia abeshialo; nende abandi amakhumi kasasaba abokhubandu beshialo abanyoolwa nibali mwitookho. 26Nebuzaradani omwimilisi wabasikari abalindi nabahamba, nabayila ewomuruchi waBabeli eRibila. 27Naye omuruchi waBabeli nababukula, nabeerela eRibila mushialo shiaHamatsi. Nilwo olwa Yuda yaatisibwa mushialoshie nayilwa mubuhambe.
28Buno nibwo obunji bwabandu aba Nebukhadineza yaara nabayila; mbu mumuyika kwomusaafu abaYahudi ebikhumila bitaru amakhumi kabili nabataru; 29mumuyika kwekhumi namunaane kwaNebukhadineza, yaara abandu ebikhumi munaane amakhumi kataru nababili nabarusia eYerusalemu; 30mumuyika kwamakhumi kabili nakhataru kwaNebukhadineza, Nebuzaradani omwimilisi wabasikari abalindi yaara abokhubaYahudi abandu ebikhumi musaafu amakhumi kane nabaraano, nabayila; abandu abo bosi nibaba ebikhumila bine nende ebikhumi bisasaba.
Yehoyakhiniyalekhuulwa naheebwa oluyali muBabeli
(2 Abaru. 25.27-30)
31Mana mumuyika kwamakhumi kataru namusaafu kwobwarwi bwaYehoyakhini omuruchi waYuda, mumwesi kwekhumi nakhabili, nikuli amakhumi kabili nakharaano, Ewili-merodakhi omuruchi waBabeli mumuyika okwambeli kwoburuchibwe, yaboholola Yehoyakhini omuruchi waYuda, namurusia mumbohe; 32namusunjila akeshisa, nara eshifumbishie emukulu webifumbi biabaruchi aba yali ninabo eBabeli. 33Kho Yehoyakhini nakalukhasia tsingubotsie tsiobubohe; ne naliitsanga khumeesa yomuruchi tsindaalo tsiosi tsiobulamubwe. 34Ne khulwa omukabokwe, yakabilungwa buli nyanga nomuruchi waBabeli omukabo nalebe buli nyanga okhuula khunyanga yokhufwakhwe, tsindaalo tsiosi tsiobulamubwe.
Currently Selected:
Yeremia 52: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
