Yeremia 9
9
1Shiakhuha omurwe kwanje kwaba amatsi,
netsimoni tsianje eshinoko shiamasika,
mbu endililenje abeerwa bomukhaana wabandu banje eshiteere neshilo!
2Shiakhuha ndaba neshimenyo shiabachendi mushitsiimi
mbu endeshe abandu banie nimbarulakhwo!
Okhuba bosi nabaheyi, nomukanda kwabandu abakaatii.
3Bafumba olulimi shinga obuyingo;
obubatsa bukufuhaale mushibala, obwatoto ta.
Okhuba barula khububii bundi okhuula khubundi;
nasi, shibayamanya ta;
nilwo olwa OMWAMI aboola.
4Mwirecheshe buli mundu khukomumenyaniwe;
murasuubilila omwana weenywe yesi yesi ta;
okhuba buli mwana weenywe alabukulila elala obwikhalo bwoundi,
khandi buli mumenyani achendanga nachiikha.
5Bakaatinjia buli mundu omumenyaniwe,
kata shibaboola akobwatoto ta; beechesiye tsinimi tsiabwe okhubeeha;
nibachoonyelamwo, nibakhaywa okhwikalukhasia.
6Obubii bulonda khububii bundi,
nobukaatii khubukaati, nibaloba okhumanya;
nilwo olwa OMWAMI aboola.
7Khulwako, kano niko aka OMWAMI omwene mahe aboola;
mbu Lola, ndalabatsienula, nimbateema;
lili heena elindi elia ndakhakhola,
khulwa abandu banje?
8Olulimi lwabwe neshisele eshiobufwisii;
luboolanga akobukaatii;
nende omunwakwe buli mundu asunjilanga owashie akobukaatii,
ne mumwoyokwe amukoneshelanga.
9OMWAMI aboola mbu Shindalabakuuma khulwa amakhuwa ako?
Shindalamala eshikwoli khwihanga elifwana lirio?
10Lilile ebikulu amasika, nimubikhupila tsimbungu;
mwikhuule olwikhuulu khulwa obwayilo obwomushitsiimi,
shichila bimuluulwe pe, kata abulaho oubiramwo;
kata omwoyo kwetsing'ombe shikuhulilwa ta;
amanyonyi akomwikulu netsisolo biombi biiluushe nibihwaho.
11Ndalakwisia Yerusalemu eshituuli,
eshimenyo shiamabwe;
ndalakwisia amataala kaYuda amakunda aharali abamenyamwo ta.
Basiomelwa mbu obumululwi nende obwarwi bunyala okhubeetsela
12Ali heena omundu omuchesi ounyala okhuhulila kano? Kata oyo owa omunwa kwOMWAMI kubooleele, mbu akarumbule? Nishiina eshichila eshialo shino nishionoonibwa nishimululwa shinga eshitsiimi, kata abulaho oubiramwo? 13OMWAMI aboola mbu Okhuba balekha amalako kanje aka ndara imbeli wabwe, nibarahulila omwoyo kwanje, kata okhuchendamwo ta, 14nebutswa bachendile mubutinyu bwemioyo chiabwe, nibalonda khumiBaali, shinga abakuuka babwe olwa babeechesia; 15niko akachila kano niko aka OMWAMI omwene mahe, Nyasaye waIsiraeli, aboola; mbu Lola, ndalaheelesia abandu bano indululusia okhulia nimbaheelesia amatsi kobufila okhunywa. 16Khandi ndalabasalaasia mumahanga aka baramanyana ninako ta, kata abeene kata abakuuka babwekhandi ndalaruma olukanga okhubalonda okhuula olwa emba nimbamaliile elala.
17Kano niko aka OMWAMI omwene mahe aboola;
mbu Yililisie, nimulanga abakhasi abeekhuuli mbu beetse;
mummanile abakhasi abali abasitsa mbu beetse;
18beetse bwangu, bakhwikhuulile tsinzikhuulu,
mbu amasika karoonye mumoni tsieefwe,
ebisiche bieefwe nibitsukha amatsi butsukha.
19Okhuba omwoyo kwetsinzikhuulu kuhuliilikha okhurula eSayuni,
mbu Mako khwonooniibwe!
Khuhambiibwe tsisoni muno okhuba khuleshile eshialo tsana;
okhuba balikuluule ebimenyo bieefwe.
20E inywe abakhasi, hulile likhuwa liOMWAMI;
amarwi keenywe kafuchiilile likhuwa liomunwakwe;
mwechesie abakhaana beenywe okhuupa tsimbungu,
buli mundu yeechesie owashie olwikhuulu.
21Okhuba oluumbe luniiniile mumatirisha keefwe;
Iwinjiile munzu tsieefwe tsikhulundu okhukhalaka abaana elwanyi,
nabasooliili khubikuuri.
22Sunga mbu Kano niko aka OMWAMI aboola;
mbu Emilambo chiabandu chilakwa shinga imbolela khumikunda ebulafu,
kata shinga ebinywa inyuma womuchesi,
ne abulaho ouchikhung'aasia.
Oluyali Iwomundu nikhwo okhumumanya Nyasaye
23Kano niko aka OMWAMI aboola; mbu Omundu omuchesi aleshe okhwiyitsialila amachesike, omundu wetsingufu naye aleshe okhwiyitsialila tsingufutsie, kata omuyinda okhwiyitsialila obuyindabwe ta; 24nebutswa owiyitsiala yeeyitsialile kano, mbu ahulilanga eshisina niyamanya isie, shinga olwa endi OMWAMI oukholanga akeshisa, nakobukhalachi bwahabwene, nakobulunjishi mushialo; okhuba mu ako nimwo omwa esangaalilanga; nilwo olwa OMWAMI aboola.
25OMWAMI aboola mbu Lola, tsindaalo tsili okhwitsa olwa ndalabakuuma abashebe bosi abali butswa mubusinde; 26mbu Misiri, naYuda, naEdomu, nabaana baAmoni, naMoabu, nabosi abeebekanga lituma, abamenya mushitsiimi; okhuba amahanga ako kosi nabasinde, ne bosi abeinzu yaIsiraeli nabasinde mumwoyo.
Currently Selected:
Yeremia 9: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
