Yeremia 10
10
Omunyasaye vobukaatii, nende Nyasaye owatoto
1Hulile likhuwa elia OMWAMI amuboolela, inywe abeinzu yaIsiraeli; 2kano niko aka OMWAMI aboola; mbu
Mureeka injila yamahanga,
kata murafwa omwoyo khubilolelo ebiomwikulu
shichila abamahanga bafwile omwoyo khulwabio, tawe.
3Okhuba ebifwanani ebibaatse bietsimbia tsiabandu nebikhaya butswa;
mbu omusaala okwomumutsuru kuremwa,
nikubaatswa nolube nomukhono kwomubaatsi.
4Bakung'oona neifeetsa neitsahaabu;
bakutiila nemisumari neinyundo mbu kuleshe okhusikukha.
5Ebifwanani biabwe ebibaatse ebio bifwana shinga omuhomo kwokhuriisia amanyonyi mumukunda kwamahondo;
mbu shibiboola ta;
bikhoyile okhuchingwa shichila shibichenda ta.
Murabiriitsanga ta;
okhuba shibinyala okhukhola obubii,
kata bibula obunyali okhukhola obulayi tawe.
6Abulaho oufwanana ninawe, E OMWAMI;
oli omukhongo, khandi obunyali bweliiralio nobukhongo.
7E Omuruchi wamahanga, ali heena ourakhuria ta?
Okhuba nikhwo okhukhukhoyeele.
Shichila mubachesi bosi abomumahanga,
nomubialo biosi bioburuchi bwako,
abulaho oufwanana ninawe.
8Ne bali abasilu khandi ebiyingwa;
obuchesiyii bwebindu ebio biabutswa nobweshinamusaala!
9Ifeetsa eyeeraanywa shinga amabaati amanyelele yirusibwa eTarashishi,
neitsahaabu okhurula eUfazi bili emilimo chiomukholi omusitsa,
nechiamakhono komwiraanyi weitsahaabu;
tsingubo tsiabio netsieibuluu neisambarau;
biosi nemilimo chiabandu abasitsa.
10Ne OMWAMI niye Nyasaye owatoto;
niye Nyasaye oubeetsangaho mwoyo, nomuruchi ourahwaho ta;
khuburimabwe eshialo shirenga;
amahanga shikanyala okhwifwila obusinyishibwe ta.
11Kano niko aka mulababoolela; mbu Abanyasaye abo abaralonga likulu neshialo ta, chilasikha okhurula mushialo shiosi eshili hasi welikulu.
12Ye niye owalonga eshialo nobunyalibwe;
niye owaraho eshialo nobuchesibwe;
ne nobumanyilisiibwe yabambula likulu.
13Olwa arumbukha, okhuhoola khwamatsi khubeho mwikulu;
aniininjia olucheka okhurula khundulo weshialo;
ahenusia oluhenu khulwa ifula,
narusia omuyeka mumabiishiloke.
14Buli mundu akwile omusilu, nabula obumanyi;
buli mwiraanyi weitsahaabu ahambibwe tsisoni nebifwananibie ebibaatsie;
okhuba amakondoke nakobukaatii;
kata shibilimwo omuuya ta.
15Nebiabutswa, ebikhole ebiokhubalabala;
kata khunyanga yokhukuumwa khwabio bilasikha
. 16Oyo ouli Omukabo kwaYakobo shiafwanana ninabio ta;
okhuba niye omulonji wabiosiIsiraeli nilwo oluyia Iwobulaamebwe;
OMWAMI omwene mahe nilio eliiralie.
Yuda okhukwisibwa likunda
17Khung'aasia omwandukwo okuli hasi,
iwe oumenyanga mubwikalilwi.
18Okhuba kano niko aka OMWAMI aboola;
mbu Lole, ekhuyunga abamenya mushialo mundaalo tsino;
ne ndalabakhupia khushibii, mbu bashilole.
19Woowe, obusaalili bwanje!
Lifumire lianje nelibii muno.
Ne esunjile mbu Toto mwene, kano namatinyu;
ne ekhoyile okhukeefwila.
20Liheema lianje lioonooneeshe,
emikoye chianje chiosi chikhaliishe;
abaana banje bosi barulilekhwo, babulaho;
abulaho oubambula liheema lianje khandi,
kata okhurechekha tsingubo tsinzelesia, ta.
21Okhuba abaayi nabasilu;
shibareebanga ewOMWAMI ta;
niko akachila akabwe shikakaasile ta,
ebiayo biabwe nabio nibisalaasibwa.
22Hulile, amakhuwa ngako!
Mbu bwitsanga, obukoyaani oburula mushialo shienotsi,
okhukwisia amataala kaYuda amakunda eshimenyo shiamabwe.
23E OMWAMI, emanyile mbu injila yomundu shiyinyoolekha muye omwene;
omundu ouchenda shiali nobunyali okhulunjisia injendaye ta.
24E OMWAMI, unguumekhwo, habula neshichelo;
muburimabwo ta, oleshe okhumalilana;
25Sundula obululubwo khumahanga akarakhumanya,
nokhumbia tsiabandu abarahaabila khuliiralio ta;
okhuba baliile Yakobo;
toto, bamuliile nibamumalilana,
nibakwisia eshimenyoshie likunda.
Currently Selected:
Yeremia 10: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
