Yeremia 51
51
Obuyasii bwOMWAMI khuBabeli.
1Kano niko aka OMWAMI aboola; mbu
Lole, ndalayakula omwoyo kwomumululi okhuseera Babeli,
nokhubaseera abamenya ebuKalidayo.
2Ndalaruma abaseesi eBabeli,
nabo balamuseesa;
balalekha eshialoshie nishili eshikhaya kuru;
okhuba khunyanga yamasila balamuseera tsimbeka tsiosi.
3Omulasi wobuyingo aleshe okhufumba obuyingobwe,
kata okhuchinguukha niyeefwalile eshitsengwashie.
Murahonokosia abasooliilibe babe mwoyo ta;
tibilie elala amaheke kosi.
4Balakwitsanga nibeerilwe mushialo shiabaKalidayo,
nibafumiirwe mumihandachie.
5Okhuba Isiraeli naYuda shibeebalwa naNyasaye wabwe, OMWAMI wamahe, ta;
kata olwa eshialo shiabaKalidayo shiitsuulemwo ebikha ebifukula Omutakatifu waIsiraeli.
6Mwilushe murule hakari waBabeli,
mwihonokosie buli mundu obulamubwe;
mulaakamibwa mubukuumwibwe ta;
okhuba yino neinduukho yeshikwoli shiOMWAMI;
ye amurunga omurungo.
7Babeli yabeelenje eshikombe shieitsahaabu mumukhono kwOMWAMI eshiameesiye eshialo shiosi;
amahanga kanyweelekhwo khudivaiye;
ne niko akachila amahanga nikalalukha.
8Babeli akwile meetsukhana, niyaatikha;
mumukhupile tsimbungu!
Bukule amalesi khulwa okhusaalilakhwe;
haundi yakhahonibwa.
9Khwayeenyile okhuhonia Babeli,
ne shiyamala ahone ta;
mumuleshe, khutsie,
buli mundu mushialoshie;
okhuba eshiinashie shiulile khwikulu;
shichinguushile okhuula khumaleesi.
10OMWAMI walolosiye obulunjishi bweefwe;
chende khurumbulile muSayuni akebikhole biOMWAMI Nyasaye weefwe.
11Yiakale ebisele!
Shinje tsingaya!
OMWAMI wabuusiye emioyo chiabaruchi babaMedi, shichila tsiyemi etsia ali ninatsio khuBabeli nokhulimulula; shino nishio eshikwoli shiOMWAMI, mbu eshikwoli khulwa ihekaluYe.
12Sinjisie ipendela halukoba lwaBabeli;
meetakhwo abobulindi;
raho abalindi;
kasie akobukoneshi;
okhuba OMWAMI wakasiye nende okhukhola pe kosi aka yasunga khukabamenyanga eBabeli.
13Iwe oumenya hamatsi amanji,
oukutsa namabiishilo,
eshihesishio shiakhoola,
nishio eshichelo shiokhuyaayakhwo.
14OMWAMI omwene mahe yeetsuba khuye omwene,
ari Okhwitsusia ndalakhwitsusia abandu,
shinga tsisiche olwa tsiitsulanga;
abandu nabo balakhuupila tsingalakala.
15Ye niye owalonga eshialo nobunyalibwe;
niye owaraho eshialo nobuchesibwe,
ne nobumanyilisiibwe yabambula likulu.
16Olwa omwoyokwe kurumbukha okhuhoola khwamatsi khubeho mwikulu;
aniininjia olucheka okhurula khundulo weshialo;
ahenusia oluhenu khulwa ifula,
narusia omuyeka mumabiishiloke.
17Buli mundu akwile omusilu, nabula obumanyi;
buli mwiraanyi weitsahaabu ahambibwa tsisoni nebifwananibie ebibaatse;
okhuba ebifwananibie nebiobukaatii,
kata shibilimwo omuuya ta.
18Nebiabutswa, ebikhole ebiokhubalabala;
kata khunyanga yokhukuumwa khwabio bilasikha.
19Oyo ouli Omukabo kwaYakobo shiafwanana ninabio ta;
okhuba niye omulonji wabiosi;
Isiraeli nilwo oluyia Iwobulaamebwe;
OMWAMI omwene mahe nilio eliiralie.
20Niwe eshiruka shianje, nebimanulwa bielihe;
nindi ninawe esasaakanga amahanga;
nindi ninawe esasinjia obwami;
21nindi ninawe esasaakanga ifarasi nende ouchendelakhwo;
nindi ninawe esasaakanga likaari nende omuchesia walio;
22nindi ninawe esasaakanga abasaatsa nabakhasi;
nindi ninawe esasaakanga omusaakhulu nomubuukha;
nindi ninawe esasaakanga omusooliili nomukhaana;
23nindi ninawe esasaakanga omwayi nebiayobie;
nindi ninawe esasaakanga omulimi netsing'ombe etsiomwikokololie;
nindi ninawe esasaakanga abakafuna nende aboburuchi.
24Ndalakalusilia Babeli nende bosi abamenyanga ebuKalidayo obubii bwabwe bwosi obwa bakholela eSayuni mumonitsio, OMWAMI aboola.
25Lola, ekhufukula, iwe eshikulu eshionooninjia,
nilwo olwa OMWAMI aboola,
iwe owonooninjia eshialo shiosi;
ndalanyiila omukhono kwanje khwiwe,
nikhusindikha orule khunjengulukho,
nikhukwisia eshikulu eshiayia.
26Shibalabukula khwiwe lichina lieikoona,
kata lichina liomuse, ta;
ne olabeetsanga likunda inziayo;
nilwo olwa OMWAMI aboola.
27Sinjisie ipendela mushialo,
khupe olwika mumahanga,
recheshe amahanga okhumuseera,
lanje obwami bwaArarati naMini naAshekenazi, mbu bumuyinje;
raho omusinjilili okhumufukula;
tikulusie tsifarasi etsiingana tsisiche tsiamakhakasi.
28Recheshe amahanga okhumuseera,
mbu abaruchi babaMedi nabakafuna naboburuchi bayo bosi,
neshialo shiosi eshiobwami bwabwe.
29Eshialo shitechela nishisaalila okhuba tsiyemi tsiOMWAMI khuBabeli tsiralila,
mbu okhukwisia Babeli likunda,
aharali omundu oumenyamwo ta.
30Abalulu baBabeli baleshile okhulasana;
beekhaale mungoba;
amaani kabwe kahweele;
bakwile shinga abakhasi;
ebimenyobie bihambiibwe omulilo;
emiyinjiilochie chifiniishe.
31Omwilushi mulala yeelukha okhwakaana noundi,
nomurume mulala okhwakaana noundi,
okhumanyia omuruchi waBabeli mbu litookholie libukuulwe tsimbeka tsiosi,
32tsinyambukho natsio nitsibukulwa,
ebiiteetselo biosi nibisambwa nomulilo,
abaseeri beene, ikholo niyibarimukha.
33Okhuba kano niko aka OMWAMI omwene mahe, Nyasaye waIsiraeli, aboola;
mbu Omukhaana waBabeli yeengana olwanyi khushise eshia bahuulilakhwo imele;
shishili eshise eshituutu butswa,
induukho yelichesalie niyula.
34Nebukhadineza omuruchi waBabeli wandia;
wandubula;
wayakholile shinga inyungu ikhaya,
niyamila shinga okuyokha,
niyeetsusia indaye ebiliibwa bianje ebinulu;
wayanzukunzuule pe.
35Oumenya eSayuni asunje mbu
Akamahababa akakholelwa isie, nobusaalili bwanje bibe khuBabeli;
Yerusalemu naye asunje mbu Amabanga kanje kabe khubamenya ebuKalidayo.
36Khulwako, kano niko aka OMWAMI aboola,
mbu Lola, ndalafunaana amakhuwako,
nikhumalila eshikwoli;
ndalakhamia inyanzaye,
ninyumia isebeleye.
37Babeli lilakwa ebituuli biamalikulukho,
eshimenyo shiamabwe,
eshiamariisia, eshiokhunyokhoosibwa,
aharali omundu oumenyamwo ta.
38Balahoolela halala shinga tsitalanyi tsimbuukha;
balakhaasa shinga abaana betsitalanyi.
39Olwa balaba nibashiyiile munda, ndalabakasilia lisabo,
nimbameesia, mbu batsatsahale,
nibakona tsindoolo etsiraakama,
oburabuukha khandi ta, OMWAMI aboola.
40Ndalabeesia shinga amakondi akatsia okhusinzwa,
shinga amamiiku netsikhole.
41Mawe, Babeli libukuulwe!
elia eshialo shiosi shipaakanga lihambilwe!
Mawe, Babeli likwile eliamariisia mumahanga!
42Inyanza yiyembile khuBabeli;
afuuniikhwekhwo obunji bwamarunda kayo.
43Amataalake kakwile akamariisia,
eshialo eshihangalafu, eshikhaya kuru,
eshialo eshia omundu yesi aramenyamwo,
kata omwana womundu okhubirilayo ta.
44Ndalakuuma Beli muBabeli,
nimbinia mumunwakwe eshieneshio eshia abeele amile;
kata amahanga shikalamwarililakhwo halala khandi ta;
toto, olukoba lwaBabeli lukwile.
45Inywe abandu banje, rule hakariwe!
Mwihonie abeene, buli mundu, muburima obululu bwOMWAMI.
46Muleshe okhufwa omwoyo kata okhuria khulwa amakhuwa akalahuliilikhanga mushialo.
Okhuba omuyika kundi amakhuwa kaleetsa,
mana olunyumakhwo, omuyika kundi, amakhuwa,
nakamahababa mushialo,
omuruchi nafukula omuruchi washie.
47Khulwako, lole, tsindaalo tsiitsa olwa ndalakuuma ebifwanani ebibaatse biaBabeli,
eshialoshie shiosi nishifwimbwa omurwe;
nabo abeerwabe bosi balakwila hakariwe.
48Mana likulu neshialo nende biosi ebilimwo bileemba Babeli nokhwikhoya;
okhuba aboonooninjia balamwitsila okhurula enotsi,
nilwo olwa OMWAMI aboola.
49Babeli akhoyile okhukwa, khulwa abeerwa baIsiraeli,
shinga abeerwa mushialo shiosi olwa bakwa khulwa Babeli.
50Inywe abeehonokooshe khulukanga,
tsie; mureemayo ta;
mwitsulile OMWAMI nimuli ehale,
Yerusalemu nalio liitse mumapaaro keenywe.
51Khufwimbwa omurwe, shichila khuhuliile obukondeshi,
tsisoni tsikhufuuniishe mumoni;
okhuba abarende beenjiile habundu hatakatifu weinzu yOMWAMI.
52Khulwako, lole, tsindaalo tsiitsa, OMWAMI aboola,
olwa ndalakuuma ebifwananibie ebibaatse;
ne mushialoshie shiosi abafumirwa balabinda.
53Kata Babeli niyakhakulukha natsia mwikulu,
ne kata niyakhaswalila eshikulushie shiamaani olukoba,
aboonooninjia balarula khwisie okhumutsiila,
nilwo olwa OMWAMI aboola.
54Hulile! Oluyoka Iwetsimbungu lurula eBabeli,
nobuyoka bwobumululi obukhongo okhurula mushialo shiabaKalidayo.
55Okhuba OMWAMI amulula Babeli,
naholelesia omwoyokwe omukhongo;
amarunda kabwe kahoola shinga amatsi amanji;
oluyoka Iwomwoyo kwabwe luchinguukha.
56Okhuba owonooninjia amuulilekhwo,
yoolile khuBabeli;
abalulube bahambilwe,
obuyingo bwabwe bufiniishe;
okhuba OMWAMI niye Nyasaye wemirungo;
alakalusia habwene.
57Ndalameesia abakhulundube nabachesibe,
nabakafunabe, naboburuchi, nabalulu;
balakona tsindoolo etsiraakama,
oburabuukha khandi ta;
nilwo olwa Omuruchi aboola, owa eliiralie niOMWAMI omwene mahe.
58Kano niko aka OMWAMI omwene mahe aboola;
mbu Olukoba olubambalifu lwaBabeli lulalikululilwa elala;
ebilibwabie ebirambi bilasambwa nomulilo;
tsimbia tsiabandu tsinyakhana butswa,
amahanga nikeechoonyia khulwa omulilo.
59Likhuwa elia Yeremia omunabii yalaka Seraya waNeria waMaseya, olwa yatsia eBabeli halala nende Zedekia omuruchi waYuda mumuyika kwakhane kwoburuchibwe. Ne Seraya tsana yali omusinjilili khukebiliibwa. 60Yeremia yahandiika mushitabu amabii kosi akakhakwila Babeli, mbu amakhuwa kano kosi akahandiikwa khukaBabeli. 61Yeremia namusunjila Seraya mbu Olwa olaba niwoolile eBabeli, orachweya okhusooma amakhuwa kano kosi ta; 62nosunga mbu E OMWAMI, waboola khukahabundu hano mbu wakhahaakamia, mbu omundu yesi aleshe okhumenyaho, kata omundu kata omuruko ta, ne mbu habe likunda inziayo. 63Mana olwa olaba nomalile okhusooma eshitabu shino pe, oshibohekhwo lichina, oshisukune muEufurate hakari; 64noboola mbu Nindio Babeli aleeyinikha, ne shialabuukha khandi ta, khulwa eshibii eshia ndalamukhupiakhwo. Amakhuwa kaYeremia kaakaame yaho.
Currently Selected:
Yeremia 51: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
