Yeremia 50
50
1Likhuwa elia OMWAMI yaboola khukaBabeli, khukeshialo shiabaKalidayo, mumunwa kwaYeremia omunabii, ndielino; mbu
2Rumbule mumahanga, nimukhupa omulome;
sinjisie ipendela, nimukhupa omulome;
murakabisa ta; ne muboole mbu Babeli abukuulwe;
omunyasaye wabwe Beli ahambiibwe tsisoni;
Merodakhu nayeo autubuushe;
ebifwanani ebia yeenamilanga bihambiibwe tsisoni;
ebiabutswabie bitubuushe.
3Okhuba okhurula enotsi lihanga liitsa okhumuseera, elilakwisia eshialoshie likunda, kata omundu yesi shialamenyamwo ta; abandu baleelukha nibahwaho nemiruko chiosi.
4Mundaalo etsio, nomushise eshio, OMWAMI aboola, abaana baIsiraeli baleetsa, bo halala nabaana baYuda, balatsia khunjila yabwe nibalila, nibakhaaba OMWAMI Nyasaye wabwe. 5Balareeba akeinjila yeSayuni nibachoomiyeyo tsimoni tsiabwe, bari Chende khuungane khuMwami neindakano eyirahwaho ta, elireebililwa inziayo ta.
6Abandu banje babeelenje amakondi akakora; abaayi babwe babashiamia nibababerusia mubikulu; barula khulukulu luno nibatsia khushilulu shilia; beebilila ikhonje yabwe. 7Bosi ababa-nyoola babaliitsanga; kata abasuku babwe baboola mbu Ifwe khubula eshikha, shichila bamwonoonela OMWAMI, eshimenyo shiatoto; niye OMWAMI, obunaayilo bwabakuuka babwe.
8Yilushe murule hakari weBabeli, rule mushialo shiabaKalidayo, mube shinga tsikhole etsiimilila ebiayo. 9Okhuba lole, ndalayakula omukhung'aano kwamahanga amakhongo keshialo shienotsi, nimbatikulusia nimbaleera okhuseera Babeli; nabo baleerenjekha imbeliwe; nokhurula yaho alabukulwa; ebisele biabwe bilaba shinga ebiomululu omusitsa, ourakalukha amakhono amakhaya ta. 10Kalidayo shilakwa eshiyaayo; abo bosi abashiyaaya baleekura, OMWAMI aboola.
11Kata olwa musangaala, ne kata olwa mwikhoya,
inywe abayaaya obulaame bwanje;
kata olwa mutsala shinga imoosi mubwayilo,
nimwana shinga tsifarasi tsisaatsa,
12nyineenywe alafwimbwa omurwe muno:
owamwibula alahambibwa tsisoni;
lole, alaba inyuma wabosi mumahanga;
mbu eshitsiimi, eshialo eshihangalafu, eshikhaya.
13Khulwa oburima bwOMWAMI, shialamenywamwo ta,
ne alaba butswa likunda;
buli mundu oubirila eBabeli alariisibwa,
nanyokhoosia khulwa amafumire kosi.
14Mwiyanze okhufumbila Babeli inywe mwesi abafumba obuyingo;
mumulase, oburatembelesia ebisele ta;
okhuba wayoonoonela OMWAMI.
15Chinje amakhu okhumufukula tsimbeka tsiosi;
amalile okhwiyama;
ebishingachibie biamaani bikwile;
tsingobatsie tsilikuluulwe.
Okhuba shino neshikwoli shiOMWAMI;
mumale eshikwoli khuye;
shinga olwa akholile, neenyu mumukholele murio.
16Khalache omuraachi arule eBabeli,
nende oyo oukholela injeso mwichesa;
khulwa okhuria olukanga lwa oyo oumiinanga balashiukhana buli mundu khubandube nibeelushila buli mundu mushialoshie.
17Isiraeli nelikondi eliokhukasalaanile, elia tsitalanyi tsiilusiye; olwambeli omuruchi waAshuru yamulia, nolunyumakhwo Nebukhadineza uno omuruchi waBabeli yamurabula amakumba. 18Khulwako kano niko aka OMWAMI omwene mahe, omuruchi waIsiraeli, aboola; mbu Lole, ndalakuuma omuruchi waBabeli nende eshialoshie, shinga olwa ndakuuma omuruchi waAshuru. 19Ne ndalakalusia Isiraeli mubwayilobwe, naye alaayilanga eKarameli neBashani; okhwenyakhwe khuleekusibwa khubikulu biaEfuraimu nomuGileadi. 20Mundaalo etsio, nomushise eshio, OMWAMI aboola, obumayaanu bwaIsiraeli bulakhaabwa, ne bulaba nibubulaho; kata nende ebionoono biaYuda, nibiranyoolekhakhwo ta; okhuba ndalabaleshela abo aba ndalalekha babe omusikalo.
21Tikulushe museere eshialo shiaMeratsaimu, mushiseere;
museere nende abamenyanga ePekodi;
mubeere nimubamalilanila elala,
nilwo olwa OMWAMI aboola;
nimubakholela kosi aka ekhulachile.
22Obuyoka bwelihe buli mushialo,
nobwobumululi obukhongo.
23Mako, ikhomako yeshialo shiosi yiremilwe niyitonywa!
Mako, Babeli likwile eliamariisia mumahanga!
24Ndakhurechela eshikoye,
nawe nohambwa, iwe Babeli,
ne noramanyile ta;
wanyoolekha, nohambwa,
shichila wamuyingania OMWAMI.
25OMWAMI yeekuule libiishilo liebimanulwabie bielihe,
narusiamwo ebimanulwa biobusinyishibwe.
Okhuba Omwami NYASAYE omwene mahe ali nomulimo mushialo shiabaKalidayo.
26Mwitse okhurula tsimbeka tsiosi, mumuseere;
mwikule ebiachibie;
mumubunjishe ebituuli ebituuli, shinga imele, nimumumululila elala;
aratong'akhwo eshitonye shiosi ta.
27Mwire tsisurusitsie tsiosi;
tsikholomoshe tsitsie okhusinzwa;
woowe khutsio, okhuba induukho yatsio yakhoola,
mbu inyanga yokhukuumwa khwatsio.
28Hulile! Oluyoka lwa abo abeelukha nibeehonokokha nibarula mushialo shiaBabeli, okhurumbula muSayuni akeshikwoli shiOMWAMI Nyasaye weefwe, mbu eshikwoli khulwa ihekaluye.
29Lanje abalasi bobuyingo okhuseera Babeli, abo bosi abafumba obuyingo; mukhome ikambi okhumufumbila; omundu yesi owamwo aleshe okhwihonokokha; mumurunje ebikholebie shinga olwa bili; kosi aka yakholeele shinga olwa kali, mumukholele murio; okhuba yayeechinjimisiye nafukula OMWAMI, Omutakatifu waIsiraeli. 30Niko akachila abasooliilibe balakwa mumihanda, abasaatsa belihe bosi nibaholelesilibwa mukhufwa inyanga eyo, OMWAMI aboola.
31Lola, ekhufukula, iwe omwichinjimisii,
Omwami NYASAYE omwene mahe aboola;
okhuba induukhoyo yakhoola,
inyanga olwa enzitsa okhukhukuuma.
32Omwichinjimisii tsana aleesichirala nakwa,
kata abulaho oulamubuusia;
ndalahambia omulilo mumataalake,
nakwo kulalia biosi ebimufumbilakhwo.
33Kano niko aka OMWAMI omwene mahe aboola; mbu Abaana baIsiraeli nabaana baYuda bamiinungwa bosi halala; nabo bosi ababahamba babatiila butinyu; bakhaya okhubalekhuula. 34Omununuli wabwe nowamaani; OMWAMI omwene mahe nilio eliiralie alafunaanila elala amakhuwa kabwe, mbu aheeiesie eshialo obuhuluushi, nobukoyaani khubamenyanga eBabeli.
35Olukanga lube khubaKalidayo, OMWAMI aboola,
nokhubamenyanga eBabeli,
nokhubakhulundube, nokhubachesibe.
36Olukanga lube khubalakusibe,
mbu bakwe abasilu;
olukanga lube khubalulube,
mbu bafwe omwoyo;
37olukanga lube khutsifarasi tsiabwe nokhumakaari kabwe,
nokhubarende abatsokaane hakariwe,
mbu bakwe shinga abakhasi;
olukanga lube khumabiikhoke,
mbu mana kayaaywe.
38Eshimiyu shibe khumatsike,
mbu mana kakhame.
Okhuba neshialo shiebifwanani ebibaatse;
bakwa shiabamalalu khulwebio ebia beenamilanga.
39Niko akachila tsisolo etsiomushitsiimi nende amabwe kalamenyayo, amahuto nako nikamenyamwo; ne shishilaba nende abandu abamenyamwo khandi inziayo ta; kata shishilamenyangwamwo ebisoni nebisoni ta. 40Shinga olwa kali olwa Nyasaye yakwisia Sodomu naGomora, namataala akarondokhana ninabo, OMWAMI aboola, nindio omundu yesi shialamenyayo, kata omwana womundu okhuchenihamwo ta.
41Lole, oluyia lwabandu beetsanga nibarula enotsi;
lihanga likhongo nabaruchi abanji bayakukha okhurula khushihesi shieshialo.
42Batiila obuyingo nelifumo;
nabaraasi, ababula tsimbabasi;
amakhu kabwe kahoola shinga inyanza;
bachendelanga khutsifarasi;
beeyanzile shinga omundu outsia mwihe okhukhuyinga, iwe omukhaana waBabeli.
43Omuruchi waBabeli ahuliile akeifuma yabwe,
amakhonoke nikatubukha;
obusaalili bumuhambile,
neinumwa, shinga eyomukhasi oulumwa okhwibula.
44Lole, atikulukha shinga italanyi eyirula mubitsakha bieYorodani khushimenyo eshirahwaho ta; okhuba ndalabeelusia meetsukhana bamurulekhwo; ne owa ndalalobola niye owa ndaleemekha khuye; okhuba ali heena oufwanana ninasi? Ali heena oundaka isie inyanga? Ali heena omwayi owakheema imbeli wanje? 45Khulwako, hulile obuchesiyii bwOMWAMI, obwa yakasiye khuBabeli, nende tsiyemitsie etsia yakasiye khushialo shiabaKalidayo, mbu Kata abatuutu abomubiayo balaknweswa nibarusibwayo; toto mwene, kata eshimenyo shiabwe shilariisibwa khulwabo. 46Khubuyoka obwikhola olwa Babeli abukulwa eshialo shirenga; tsimbungu tsihuliilikha mumahanga.
Currently Selected:
Yeremia 50: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
