Yeremia 49
49
Obulakusi khubaAmoni
1Khukabaana baAmoni; kano niko aka OMWAMI aboola; mbu
Isiraeli abula abaana noho?
Shialikhwo nende owobulaame?
Kho Milikomu aliile obulaame bwaGadi mbushiina,
abandube nibamenya mumataala kayo?
2Khulwako, lola, OMWAMI aboola, tsindaalo tsili okhwitsa olwa ndalachila oluhur gu Iwelihe niluhuliilikha okhuseera Raba eliabaana baAmoni;
nalio lilakwa likunds, eshituuli butswa,
nako amataala akali abakhaanabe kalasambwa nomulilo.
Mana Isiraeli alalia obulaame bwa abo abalia obubwe;
nilwo olwa OMWAMI aboola.
3Khupa tsimbungu, iwe Heshiboni, okhuba Ai lionooniibwe!
Lakaye, inywe abakhaana baRaba!
Mwibohe tsingubo tsiamakunia;
mwikhuule nimwilukha, nimwisalaache tsisalaache,
okhuba Malikamu ali okhwarwa mushialo,
halala nabeesaaliisiibe nabakhulundube bosi.
4Nishiina eshichila niwiyitsialila amabandako,
libanda elifututukhamwo amatsi,
iwe omukhaana omukalama?
Iwe oweesiika ebia wabiikha,
nosunga mbu Niwina oulanzitsila?
5Lola, ndalaleera oburii khwiwe,
Omwami aboola, OMWAMI omwene mahe,
oburula khubosi abakhufumbila;
muleelusibwamwo, buli mundu eshilunji ewa tsimonitsie tsichoomile;
kata shialabaho oukhung'aasia abo abeelukha ta.
6Nebutswa olunyumakhwo ndalakalusia tsikhabi tsiabaana baAmoni, nilwo olwa OMWAMI aboola.
Obulakusi khuEdomu
7KhukaEdomu; kano niko aka OMWAMI omwene mahe aboola; mbu
Obuchesi bwahwa muTemani?
Obuchesiyii bwasikha mubarechelefu?
Obuchesi bwabwe bwakhama noho?
8Mwilushe, shiukhane, mumenye hasi bwene,
inywe abamenya eDedani;
shichila ndalaleera amasila kaEsau khuye khunyanga olwa ndalamukoonya.
9Abanochi betsinzabibu nibaba nibakhakhwitsila shibakhalekha tsinzabibu tsindi tsirulume?
Ne nibakhaba abeebi mushilo,
shibakhonoonia ebihela okhubeekusia?
10Nasi emunaabuule Esau pe;
efunuule habunduwe hamabiswi,
kata shialanyala okhwibisa ta;
olwibulolwe lusishile, nabaana babwe,
kata nende abamenyanibe; kata ye omwene shialiho ta.
11Lekha abaanabo ababisandu;
ndalabalinda babe mwoyo;
abakhasibo abalekhwa bandisiiche.
12Okhuba kano niko aka OMWAMI aboola; mbu Lola, abo abarakwanile okhunywa khushikombe eshio ta, okhuula balanywa; nawe wakhachweya okhukuumwa noho? Shiolachweya okhukuumwa ta; okhunywa olanywa. 13Okhuba ndeetsuba khwisie omwene OMWAMI aboola, mbu Bozora lilakwa eliamariisia, nokhuseywa, eshindu eshikhaya, eshilaka munwa; amataala kalio kosi kalaba amakhaya inziayo.
14Embuliile omulome okhurula khuMWAMI;
omurume arumilwe mumahanga okhusunga mbu Mwikhung'aasie, mwitse okhuliseera;
buushe khulwa lihe!
15Okhuba lola, ndalakhukhola omutuutu mumahanga,
oulekwa mubandu.
16Okhuriisia okhwa oriisinjia abandu khukhukaatiye,
nobwichinjimisii bwomwoyokwo,
iwe oumenya mumbangatsi etsiomunyanda,
ouhanda khubutenje bweshikulu;
kata niwakhoombakha eshitsushio hekulu shinga inditsu ndalakhwisia okhurulayo;
nilwo olwa OMWAMI aboola.
17Edomu naye alaba owamariisia; buli mundu oubira alariisibwa, nanyokhoosia khulwa amanyasioke. 18Shinga olwa kali olwa Sodomu naGomora namataala akali ahambi ninako kakwisibwa, OMWAMI aboola, omundu yesi shialamenyayo kata omwana womundu okhuchenihamwo ta. 19Lola, atikulukha shinga italanyi eyirula mubitsakha bieYorodani khushimenyo eshirahwaho ta, nindio ndalamwilusia meetsukhana, amurulekhwo; ne owa ndalalobola niye owa ndaleemekha khuye; okhuba ali heena oufwanana ninasi? Ali heena oundaka isie inyanga? Ali heena omwayi owakheema imbeli wanje? 20Khulwako, hulile obuchesiyii bwOMWAMI, obwa yakasiye khuEdomu, nende tsiyemitsie etsia yakasiye khubamenyanga eTemani; mbu Kata abatuutu abomubiayo balakhweswa nibarusibwayo, toto mwene, kata obwayilo bwabwe bulariisibwa khulwabo. 21Khubuyoka bwokhukwa khwabwe eshialo shilarenga; oluyoka Iwetsimbungu tsiabwe lulahuliilishila haNyanza Inzakhanyu. 22Lola, alakulukha napulukha shinga inditsu, nabambula tsimbahatsie okhufukula Bozora; khunyanga eyo emioyo chiabalulu baEdomu chilaba shinga omwoyo kwomukhasi oulumwa.
Obulakusi khuDamasiko
23KhukaDamasiko.
Hamatsi naAripadi bafwimbwa omurwe,
okhuba bahuliile amakhuwa amabii;
batechelanga muno khulwa oburii, shinga okhurunda khweinyanza,
oburahootselekha ta.
24Damasiko atubuushe; ashiukhana niyeelukha;
indenga yimuhambile;
obusaalili namasila bimutiilile,
shinga ebiomukhasi oulumwa okhwibula.
25Makowe, litookho elifumunga lileshilwe,
litookho liobusangaafu!
26Niko akachila abasooliilibe balakwa numihanda,
abasaatsa belihe bosi nibamalilanwa khunyanga eyo,
OMWAMI omwene mahe aboola.
27Ndalahambia omulilo mulukoba lwaDamasiko,
nakwo kulalia tsinzu tsikhulundu tsiaBeni-hadadi.
28KhukaKedari, nende khukobwami bwosi bwaHazori, obwa Nebukhadineza omuruchi waBabeli yarootsa.
Kano niko aka OMWAMI aboola;
mbu Buushe, tikulushe mutsie eKedari!
Mumulule abandu bebukwe!
29Amaheema kabwe nebiayo biabwe bilabukulwa;
tsingubo tsiabwe tsinzelesia tsilabukulwa, nebimanulwa biabwe,
netsingamia tsiabwe tsiosi;
abandu balabalanjisia mbu Oburiisii buliho tsimbeka tsiosi!
30Mwilushe, mutsie ehale, mumenye hasi bwene,
inywe abamenya eHazori,
nilwo olwa OMWAMI aboola;
okhuba Nebukhadineza omuruchi waBabeli arecheshe amakhuwa okhumufukula;
akasiye tsiyemi okhumuyinga.
31Buushe, tikulushe mutsie okhuseera lihanga eliilambisiye,
elimenyanga nilirateeba likhuwa ta,
nilwo olwa OMWAMI aboola;
elibula ebilibwa kata emiyinjiilo,
nilimenya lionyene.
32Tsingamia tsiabwe tsilaba ebiyaayobie,
obunji bwemiruko chiabwe nichiba eshioluyiitsi;
ndalabasalaasia khumiyeka chiosi abo abeebekanga lituma;
ndalaleera amasila kabwe okhurula tsimbeka tsiabwe tsiosi,
nilwo olwa OMWAMI aboola.
33Hazori halakwa eshimenyo shiamabwe,
mbu likunda inziayo;
omundu yesi shialamenyayo,
kata omwana womundu okhuchenihamwo ta.
Obulakusi khuElamu
34Likhuwa liOMWAMI elieetsela Yeremia omunabii khukaElamu, khuchaaka khwoburuchi bwaZedekia omuruchi waYuda, ndielino; 35mbu Kano niko aka OMWAMI omwene mahe aboola; mbu Lola, ndalafunaka obuyingo bwaElamu, obwambeli bwamaani kabwe. 36Ne khuElamu ndalaleera emiyeka chiosi chine echirula khumbeka tsine tsielikulu, nimbasalaasia enemiyeka echio chiosi; kata shililabaho lihanga liosi elia abaare baElamu shibaleenjilamwo ta. 37Ndalachila abaElamu nibafwa omwoyo imbeli wabasuku babwe, neimbeli wa abo abayiima obulamu bwabwe; ndalabakhupia khushibii, mbu oburima bwanje obululu, OMWAMI aboola; ne ndalaruma olukanga okhubalondachilila, okhuula olwa ndalaba nimbatibiye. 38Khandi ndalarenjekha eshifumbi shianje shioburuchi muElamu, nimululilamwo omuruchi nende abakhulundu bosi; nilwo olwa OMWAMI aboola.
Obulakusi khuBabeli
39Nebutswa mundaalo tsiolunyuma ndalakalusia tsikhabi tsiaElamu; nilwo olwa OMWAMI aboola.
Currently Selected:
Yeremia 49: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
