Yeremia 48
48
Obulakusi khuMoabu
1KhukaMoabu.
Kano niko aka OMWAMI wamahe, Nyasaye waIsiraeli, aboola;
mbu Woowe khuNebo! Okhuba likwisiibwe likunda.
Kiriatsaimu liahambibwa tsisoni; liabukulwa;
olukoba lwahambibwa tsisoni, nilulikululwa.
2Ifuma yaMoabu yahweele;
eHeshiboni bakasiye tsiyemi tsimbii khulio;
bari Chende khulikhalache, liraba lihanga ta!
Nawe wesi, Madumeni, olaholelesibwa;
olukanga lulakhulondachilila.
3Hulile! TsimbungutsirulaeHoronaimu,
okhwonoonibwa nokhumululwa muno!
4Moabu yamululwa;
amalilo kahuliilishila kata okhuula eZoari.
5Okhuba hashisia shieLuhitsi batikulukhanga nibalila;
okhuba hashikholomokho shieHoronaimu bahuliile amalilo kobumululwi.
6Mwilushe! Mwihonokoshe!
Mube shinga isishili inabulimo mushitsiimi.
7Okhuba wesi olabukulwa,
shichila wayeesiichile tsingobatsio nende bienebio ebia wabiikha.
Naye Khemoshi alaarwa mushialoshie,
nabeesaaliisibe nabakhulundube bosi.
8Owonooninjia aleetsela buli taala;
kata libulaho litaala elileehonokokha;
libanda nalio lilasikha,
omuhololookhwe nikumululwa,
shinga OMWAMI olwa yaboolile.
9Heelesia Moabu tsimbaha,
apulushe, ahweho;
amataalake nako kalakwa amakunda,
aharali omundu oumenyamwo ta.
10Abe mushilaamo shiobubii oukhola emilimo ChiOMWAMI niyeetembeekha; khandi abe mushilaamo shiobubii owikalila olukangalwe oburaraatsia amatsayi ta.
11Moabu abeelenje niyeelambisia okhurula khubusooliilibwe;
yeekhaale khumatsesheke;
shiyatsukhungwa okhurula mundenjekho yilia okhuula muyilia,
kata shiyatsia mubwarwi ta;
kho eshiuyashie shishili butswa shirio;
okhuhunyakhwe shikhukalukhaane ta.
12Khulwako, lole, tsindaalo tsili okhwitsa, OMWAMI aboola, olwa ndalamurumila abachetululi, nabo balamuchetulula; balatsukha akomundenjekhotsie tsitong'e tsikhaya, nibaaraka tsisiongotsie ebitonye ebitonye. 13Naye Moabu alafwimbilwa Khemoshi omurwe, shinga abeinzu yaIsiraeli olwa bafwimbiilwe Beteli omurwe, elia beesiikanga.
14Muboolanga murie mbu Nifwe abalulu, abetsingufu mwihe?
15Omumululi waMoabu namataalake atikuluushe;
abasooliilibe abalobole bakholomooshe nibatsia mubwiri;
nilwo olwa Omuruchi aboola, owa eliiralie ni OMWAMI omwene mahe.
16Amasila kaMoabu kasitile ahambi,
obusandibwibwe bwanguha.
17Mumwikhuule, inywe mwesi abamufumbila,
nineenyu mwesi abamanya eliiralie.
Boole mbu Khane indabushi yamaani yifiniishe,
omutiichilo tsana omukaasu!
18Inywe abamenya eDiboni,
yishe murule muluyali Iweenywe,
nimwikhala ahahangalafu.
Okhuba omumululi waMoabu amutikulushiile;
alikuluule tsingoba tsieenywe.
19Inywe abamenya muAroeri,
yeme khunjila, muhenje;
reebe omusaatsa owilukha, nomukhasi owihonokokha,
mbu Kakhabeele karie?
20Moabu lihambiibwe tsisoni, okhuba lilikuluushe;
khupe tsimbungu nimulakaya;
boole haArinoni,
mbu Moabu likwisiibwe likunda.
21Eshiina shiulile khushialo shiomuhololookhwe mbu khuEloloni, nokhuYaza, nokhuMefaatsi; 22khuDiboni, nokhuNebo nokhuBetsi-dibilatsaimu, 23khuKiriatsaimu, nokhuBetsi gamuli, nokhuBetsi meoni; 24khuKeriotsi nokhuBozora, nokhumataala kosi keshialo shiaMoabu, akehale nakahambi. 25Olwika lwaMoabu lukhalaakwe, omukhonokwe nakwo kufiniishe; nilwo olwa OMWAMI aboola.
26Mumumeesie, okhuba yeekhulumamia nafukula OMWAMI; mana Moabu alakalakala mumasasike, naye yesi nanyokhoosibwa. 27Okhuba iwe shiwanyokhoosia Isiraeli? Yanyoolekhanga nali mubeebi, okhuchila noyuyilanga omurwe buli lwosi olwa wamuralakhwo?
28Inywe abamenya eMoabu,
leshe amataala, mumenye mumachina;
mube shinga lihuusi elikasia eshitsu shialio khundulo wetsinjengulukho.
29Khwahuliile akobwichinjimisii bwaMoabu,
mbu nomwichinjimisii muno;
akeisungaye, nokhwichinjimisiakhwe, nolukungulwe,
neinjinia yomwoyokwe.
30Ndamanya obutsaalishibwe, OMWAMI aboola;
okhwiyitsoomiakhwe nokhwabutswa;
okhukholakhwe nokhukhaya.
31Niko akachila nikhupila Moabu tsimbungu;
toto, ndalalakayila Moabu yosi;
ndikhuulila abeKiriheresi.
32Ekhulilila iwe, omutsabibu kwaSibima,
okhushila shinga olwa endilila Yazeri;
amasakako kabira khunyanza,
nikoola khuYazeri owonooninjia akwiliile ebiamobie ebiengu nebichese bietsinzabibu.
33Obusangaafu nokhwikhoya biyiniibwe mumikunda eminulu chieshialo shiaMoabu;
ndaakamiye idivai mubitiinyilo;
abulaho oulaswala nakhupa tsingalakala;
mbula, kafa tsingalakala shitsilaba tsingalakala tsiatoto ta.
34Heshiboni naEleale bakhupa tsimbungu; emioyo chiabwe chihuliilikha eYahazi, okhurula khuZoari okhuula khuHoronaimu naEgelatsi shelishiya; okhuba kata amatsi kaNimurimu kakwile eshitsiimi. 35Khandi, OMWAMI aboola, ndalaakamia muMoabu oyo oumalila emisango habundu aheechingu, nende oyo ousambila abanyasayebe amalesi kelibuuliesi. 36Niko akachila omwoyo kwanje nikulilila Moabu shinga amalele; omwoyo kwanje kulila shinga amalele khulwa abeKiriheresi; ne niko akachila emiandu echia banyoola nichisishile.
37Okhuba buli murwe kubechilwe, khandi buli shileefu shirio; amakhono kosi kalikhwo tsisalache, khandi tsingubo tsiamakunia tsili mushishienje. 38Khubilama bietsinzu tsieMoabu, nokhunjilatsie tsiosi, khulikhwo okhwikhuula hosi hosi; okhuba ndaarile Moabu shinga inyungu eyirachamisia ta, OMWAMI aboola. 39Makowe, alikuluulwe! Makowe, bakhupa tsimbungu! Makowe, Moabu akhupile amashemo khulwa tsisoni! Nolwa Moabu akwile eshiokhunyokhoosibwa nokhuriisia khubosi abamubotokhana.
40Okhuba kano niko aka OMWAMI aboola; mbu Lole, alapulukha shinga inditsu,
nabambula tsimbahatsie okhufukula Moabu.
41Amataala kalabukulwa,
tsingoba nitsihambwa.
Khunyanga eya emioyo chiabalulu baMoabu chilaba shinga omwoyo kwomukhasi oulumwa.
42Moabu alamululwa, aleshe okhuba oluyia,
okhuba yeekhulumamia nafukula OMWAMI.
43Oburii, nende obuko, nende eshikoye bili imbeliwo, iwe oumenya eMoabu!
Nilwo olwa OMWAMI aboola.
44Owilukha oburii alakwa mubuko;
ouniina narula mubuko alahambwa neshikoye;
okhuba ndalaleera khuye, ndalaleera khuMoabu, ako kosi mumuyika kwokhukuumwa khwabwe;
nilwo olwa OMWAMI aboola.
45Abo abeelukha beema mushiinikha shiaHeshiboni nibabula amaani pe;
okhuba omulilo kurulile muHeshiboni,
olumemu lurulile munzu ikhulundu yaShioni,
nilulia obweni bwaMoabu,
nemirwe chiabeindiri.
46Woowe khwiwe, Moabu!
Abandu baKhemoshi bafuba;
okhuba abaanabo bayilwa mumbambe,
nende abakhaanabo mububohwi.
47Nebutswa ndalakalusia tsikhabi tsiaMoabu mundaalo tsiolunyuma, OMWAMI aboola.
Eshiina shiaMoabu shiakama yaho.
Currently Selected:
Yeremia 48: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
