Yeremia 43
43
Bahuya nibatsia eMisiri
1Ne olwa Yeremia yali namalile okhuboolela abandu abo bosi amakhuwa kosi kOMWAMI Nyasaye wabwe, aka OMWAMI Nyasaye wabwe yali namurumile ninako khubo, 2Azaria waHoshaya naYohanani waKarea nabeinjinia abo bosi nibaboolela Yeremia bari Obeehanga. OMWAMI Nyasaye weefwe yakhuruma liina okhuboola mbu Muratsia eMisiri okhumenyayo ta? 3Habula Barukhu waNeria niye oukhutsuubanga okhukhufukula, okhukhuhaana mumakhono kabaKalidayo, mbu bakhwire kata okhukhwara nibakhuyila eBabeli. 4Kho Yohanani waKarea nabaseesia bosi bamahe, nende abandu bosi, nibarahulila amakhuwa kOMWAMI, okhumenya mushialo shiaYuda, ta. 5Nebutswa Yohanani waKarea nabaseesia abo bosi nibabukula omusikalo kwosi kwaYuda, abo bosi abali nibakaluushe okhurula mumahanga kosi omwa beelusilibungwa, okhumenya mushialo shiaYuda; 6mbu abasaatsa, nabakhasi, nabaana, nabakhaana beinzu yomuruchi, kata nende buli mundu yesi owa Nebuzaradani omwimilisi wabasikari abalindi yali naleshile nende Gedalia waAhikamu waShafani, naYeremia omunabii, naBarukhu waNeria; 7nibatsia mushialo shiaMisiri; okhuba shihahulila amakhuwa kOMWAMI ta; niboola eTapanahesi.
8Mana likhuwa liOMWAMI nilimwitsila Yeremia eTapanahesi, liri 9Bukula mumukhono amachina amakali, okabise mwitoyi elialungwa khulwanyi oluli habwinjililo bweinzu yaFarao eTapanahesi, abandu baYuda nibalola; 10nobasunjila mbu Kano niko aka OMWAMI omwene mahe. Nyasaye waIsiraeli, aboola; mbu Lole, ndalarumana nimbukula Nebukhadeneza omuruchi waBabeli, omusumba wanje; naye alarenjekha eshifumbishie shiobwami khumachina kano aka embisili; naye alialakhwo eshifuunikhoshie shioluyali. 11Aleetsa nakhupa eshialo shiaMisiri; abali khulwa oluumbe, alahaana khuluumbe; abali khulwa obuhambe, khubuhambe; abali khulwa olukanga, khulukanga. 12Alahambia omulilo munzu tsiosi tsiabanyasaye baMisiri; alatsisamba, nabayila mumbohe; alalabia eshialo shiaMisiri, shinga omwayi olwa atoola tsindamunguboye; ne alarulayo mumulembe. 13Khandi alasasaaka amachina amasongookhu keBetsishemeshi, mushialo shiaMisiri, nasamba tsinzu tsieminyasaye chiaMisiri nomulilo.
Currently Selected:
Yeremia 43: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
