Yeremia 42
42
Amakhuwa kaNyasaye khuYohanani mumunzua kwa Yeremia
1Mana abaseesia bamahe bosi, naYohanani waKarea, naAzaria waHoshaya, nabandu bosi, okhurula khumutuutu okhuula khumukhongo, nibeetsela Yeremia omunabii, 2nibamusunjila bari Chama mbu okhusaaya khweefwe khufuchiililwe imbeliwo, okhusaayile ewOMWAMI Nyasayewo, mbu ifwe fwesi abomusikalo kuno; okhuba khutong'ile abatuutu butswa abomubanji, shinga olwa okhulola netsimonitsio; 3mbu OMWAMI Nyasayewo akhumanyie injila eya khukhoyile okhuchendakhwo, nende aka khukhoyile okhukhola. 4Naye Yeremia omunabii nabakalusia mbu Emuhuliile; lole, ndalamusaayila ewOMWAMI Nyasaye weenywe, shinga olwa musunjile; ne liosi liosi elia OMWAMI alangalusiamwo ndalamuboolela; shindalamubisakhwo likhuwa liosi ta. 5Nabo nibamusunjila Yeremia bari OMWAMI abe omuloli weefwe owatoto omwisiikwa, nikhuba nikhurakhola ako kosi aka OMWAMI Nyasayewo alakhuruma ninako khwifwe ta. 6Kata nikali amalayi, kata nikali amabii, khulahulila amakhuwa kOMWAMI Nyasaye weefwe, owa khukhurumakhwo; mbu mana khukaase, olwa khulahulilanga amakhuwa kOMWAMI Nyasaye weefwe.
7Ne olunyuma lwetsindaalo ekhumi likhuwa liOMWAMI nilimwitsila Yeremia. 8Kho yalanga Yohanani waKarea nabaseesia bamahe bosi aba yali ninabo, nende abandu bosi okhurula khumutuutu okhuula khumukhongo. 9Nabasunjila mbu Kano niko aka OMWAMI, Nyasaye waIsiraeli, aboola, owa mwarumakhwo okhura amasaayo keenywe imbeliwe; 10mbu Nimuba nimulatong'a nimushimenya mushialo shino, kho ndalamuumbakha nindamulikulula ta; ndalamuraaka nindamusiula ta; okhuba ndikalukhasiye khububii obwa ndamukholela. 11Muramuria omuruchi waBabeli, oyo owa muriitsanga, ta; OMWAMI aboola mbu Muramuria ta; okhuba endi nineenywe okhumuhonia nokhumureesia mumukhonokwe. 12Ne ndalamubeela tsimbabasi, mbu ye amubeele tsimbabasi, namukalusia mushialo shieenywe. 13Nebutswa nimuba nimusunga mbu Shikhulamenya mushialo shino ta; nimurahulila amakhuwa kOMWAMI Nyasaye weenywe tawe, 14muri Tawe; ne khulatsia eMisiri; ebweneyo shikhulalolakhwo obusoolo kata okhuhulila amayoosi kolwika, kata okhulumwa inzala yebiokhulia ta; ebweneyo newa khulamenya; 15kho mana muhulile likhuwa liOMWAMI, inywe omusikali kwaYuda; mbu Kano niko aka OMWAMI omwene mahe, Nyasaye waIsiraeli, aboola; mbu Nimuba nimuchoomilia elala tsimoni tsieenywe okhwiniila muMisiri, nimutsia okhumenyamwo, 16kho olukanga olwa muriitsanga lulamunyoolelesia ebweneyo mushialo shiaMisiri, nayo inzala eyimuriisinjia yilamurakhwo olutsobi ebweneyo muMisiri; khandi ebweneyo newa mulafwila. 17Nilwo olwa kalaba khubandu bosi abachoomia tsimoni tsiabwe okhutsia eMisiri okhumenyayo; balafwa khulwa olukanga, nokhulwa inzala, nokhulwa oluumbe; alabulaho oundi yesi khubo oulatong'a kata okhwihonokokha mushibii eshia ndalabakhupiakhwo ta.
18Okhuba kano niko aka OMWAMI omwene mahe, Nyasaye waIsiraeli, aboola; mbu Shinga oburima bwanje nobululu bwanje olwa bwasundulwa khubamenyanga eYerusalemu, nindio obululu bwanje bulasundulwa khwinywe burio, olwa muleenjila muMisiri; ne mulaba eshilaka munwa, abokhung'ang'aalilwa, nokhunyekwa, nokhuseywa; kata shimulalolakhwo eshialo shino khandi ta. 19OMWAMI waboolile khukeenywe, inywe omusikalo kwaYuda, mbu Muratsia eMisiri ta. Mumanye tieeli mbu emusiomeele inyanga yino. 20Okhuba mwashiama nimukosia obulamu bweenywe, shichila mwaruma ewOMWAMI Nyasaye weenywe, nimusunga mbu Mukhusaayile ewOMWAMI Nyasaye weefwe; mana kosi aka OMWAMI Nyasaye weefwe alaboola, okhuboolele, neefu khulakakhola. 21Nasi inyanga yino emurumbuliile kosi; nebutswa shimwahuliile amakhuwa kOMWAMI Nyasaye weenywe mwikbuwa liosi liosi elia yaruma okhumuboolela ta. 22Kho bulaano mumanye tieeli mbu mulafwa khulwa olukanga, nokhulwa inzala, nokhulwa oluumbe, habundu tsana aha mwenya okhutsia okhumenya.
Currently Selected:
Yeremia 42: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
