Yeremia 40
40
Yeremia nabomusikalo, nende Gedalia
1Likhuwa elieetsela Yeremia okhurula khuMWAMI olwa Nebuzaradani omwimilisi wabasikari abalindi yali namalile okhumulekhuula arule eRama; ne yali niyamuyilayo nabohwa neminyololo halala nabaarwa bosi beYerusalemu naYuda abaarwa nibayilwa eBabeli. 2Omwimilisi wabasikari abalindi yabukula Yeremia, namusunjila mbu OMWAMI Nyasayewo yarumbula akobubii khushialo shino; 3khandi OMWAMI yabuleera, nakhola shinga olwa yaboola; shichila mwamwonoonela OMWAMI, nimurahulila amakhuwake ta, niko akachila amakhuwa kano nikamukwila. 4Ne bulaano, lola, ekhulekhuula inyanga yino, orule muminyololo echili khumakhonoko. Noba noluutsi mbu nobulayi khutsie ninawe eBabeli, kho witse, nasi ndalakhulinda bulayi; nebutswa noba noluutsi mbu nobubii okhutsia ninasi eBabeli, kho oleshei lola, eshialo shiosi shili imbeliwo; aha oluutsi nihali ahalayi okhutsia, ahakhoyeele, kho otsieyo. 5Ne noba norakalukhayo ta, kho okalushe otsie ewaGedalia waAhikamu waShafani, owa omuruchi waBabeli yayemeeshe abe kafuna wamataala kaYuda, omenye ewuwe mubandu abo; kata otsie hosi hosi aha oluutsi nahakhoyeele okhutsiayo. Mana omwimilisi wabasikari abalindi namukabila omukabo kwebiliibwa, namuheelesia eshihaanwa, namulekhuula. 6Kho Yeremia natsia ewaGedalia waAhikamu eMizipa, namenya ewuwe mubandu abali nibashisikaale mushialo eshio.
7Abaseesia bosi bamahe akali nikachendanga mushialo eshio ebulafu, halala nabandu babwe, olwa bahulila shinga olwa omuruchi waBabeli yali namwemeeshe Gedalia waAhikamu abe kafuna mushialo eshio, nahaanile mumukhonokwe abandu abasaatsa nabakhasi nende abaana, kata nende abokhubamanani abomushialo, khubeenabo abaraarwa okhuyilwa eBabeli ta, 8kho batsia ewaGedalia eMizipa; mbabano, mbu Ishimaeli waNetsania, naYohanani naYonatsani abaana baKarea, naSeraya waTanahumetsi, nabaana baEfai omuNetofatsi, naYezania womuMaaka, abo nende abandu babwe. 9Naye Gedalia waAhikamu waShafani nabeetsubila, niyeetsubila abandu babwe, ari Murariitsanga okhusiobela abaKalidayo ta; menye mushialo nimukholela omuruchi waBabeli, mana akeenywe kalakaasa. 10Nasi khulwanje, lole, ndalamenyanga eMizipa, okhumusinjililanga imbeli wabaKalidayo abalakhwitsilanga; neenyu, mukhung'aasie idivai nebiamo ebiengu namafura, mubibiishe munyungu tsieenywe, nimumenya mumataala keenywe aka mubukuule. 11Khandi abaYahudi bosi abali eMoabu, nomubaana baAmoni, nomuEdomu kata nende abali mubialo bindi biosi, olwa bahuiila shinga omuruchi waBabeli olwa yali naleshile omusikalo muYuda, khandi shinga olwa yali niyeemeeshe khubo Gedalia waAhikamu waShafani, 12abaYahudi abo bosi bakalukha okhurula habundu hosi ewa bali nibeelusilibwa, niboola mushialo shiaYuda, ewaGedalia eMizipa, nibakhung'aasia idivai nebiamo ebiengu tsana ebinji muno.
Obukhobani bwaIshimaeli okhwira Gedalia
13Haho Yohanani waKarea nabaseesia bosi bamahe akali nikachendanga mushialo eshio ebulafu nabo niboola ewaGedalia eMizipa, 14nibamusunjila mbu Omanyile mbu Baalisi omuruchi wabaana baAmoni urumile Ishimaeli waNetsania okhukhwira? Nebutswa Gedalia waAhikamu shiyasuubila akabwe ta. 15Mana Yohanani waKarea nasunjila Gedalia eMizipa mabiswi, ari Chama enzie emwire Ishimaeli waNetsania; ne omundu yesi shialamanyakhwo ta. Nishiina eshiakhachila ye akhwire, mana abaYahudi bosi abakhung'aanilanga ewa oli nibasalaasibwa, omusikalo kwaYuda nikusikha? 16Nebutswa Gedalia waAhikamu yasunjila Yohanani waKarea mbu Orakhola orio tawe; omuchiikhanga Ishimaeli.
Currently Selected:
Yeremia 40: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
