Yeremia 38
38
Yeremia yahonibwa mubwina obwa yabohelwamwo.
1Haho Shefatia waMatani naGedalia waPashihuri naYukali waShelamia naPashihuri waMalikhiya bahulila amakhuwa aka Yeremia yasunjila abandu bosi, mbu 2Kano niko aka OMWAMI aboola; mbu Owikhala mwitookho lino alafwa khulwa olukanga, kata inzala, kata oluumbe; ne ourulamwo natsia khubaKalidayo alaba mwoyo, ne obulamubwe bulaba eshiyaayoshie, ne alaba mwoyo. 3Kano niko aka OMWAMI aboola, mbu Litookho lino shililachweya okhuhaanwa mumakhono kelihe liomuruchi waBabeli ta; naye alalibukula. 4Mana abakhulundu tsana nibasunjila omuruchi bari Chama omundu uno yeerwe; okhuba atendeyia butswa amakhono kabaseeri abashitong'a mwitookho, namakhono kabandu bosi, nababoolela amakhuwa akafwana kario; okhuba omundu uno shiakhaabila abandu bano akomulembe ta, habula amabii. 5Zedekia omuruchi naboola mbu Ngwoyo, ali mumakhono keenywe; omuruchi shianyala okhumukaya ta. 6Kho nibabukula Yeremia, nibamusukuna mubwina bwaMalikhiya omwana womuruchi, mulwanyi lwabalindi, nibamwisia Yeremia nemikoye. Ne mubwina bwenomwo amatsi kali nikabulamwo, habula amatoyi konyene; 'Yeremia nahobokha mumatoyi tsana.
7Ne olwa Ebedi-melekhu, omuEtiopia, omusumba omulate owomunzu yomuruchi, yahulila shinga olwa bali nibamureele Yeremia mubwina (ne khushise eshio omuruchi yali niyeekhaale hashilibwa shiaBenyamini), 8Ebedi-melekhu yarula munzu yomuruchi, nasunjila omuruchi ari 9Omwami wanje omuruchi, abandu bano bakholile obubii mukosi aka bamukholeele Yeremia omunabii, owa basukuune mubwina; alafwilamwo khulwa inzala; okhuba ebiokhulia biahweele mw tookho. 10Mana o nuruchi namulaka Ebedi-melekhu omuEtiopia mbu Bukula hano abandu bataru, otsie ninabo, omukhwese Yeremia omunabii, omurusie mubwina narashiafwa ta. 11Kho Ebedimelekhu nabukula abandu ario natsia ninabo enanzu yomuruchi, mulkabati eyomwibiishilo, nabukulamwo tsingubo tsindi etsiakofula, nebitambaya ebiarandukha, nabiisia nemikoye mubwina ewa Yeremia yali. 12Ebedimelekhu omuEtiopia nabiila Yeremia ari Bukula tsingubo tsino etsiakofula nebitambaya ebiarandukha, obire mukwaha okhufuunikha emikoye. Yeremia nakhola ario. 13Mana nibamukhwesa Yeremia nemikoye, nibamurusia mubwina tsana; Yeremia namenya mulwanyi lwabalindi.
Zedekia yasaba obuchesiyii ewa Yeremia
14Mana Zedekia omuruchi narumana niyenda Yeremia omunabii, namuleera ewa yali mubwinjililo bwakhataru bweinzu yOMWAMI; omuruchi nasunjila Yeremia mbu Enzitsa okhukhureeba likhuwa; no orambisakhwo likhuwa liosi ta. 15Yeremia nasunjila Zedekia mbu Nimba nikhuboolela, shiolachila ninzirwa? Kata nimba nikhuchesiyia, shiolambulilakhwo ta. 16Kho Zedekia omuruchi namwitsubila Yeremia mabiswi, ari Shinga OMWAMI olwa abeetsangaho mwoyo, owalonga emioyo chieefwe, shindalakhwira kata shindalakhuhaana mumakhono kabandu abo abayiima obulamubwo ta.
17Mana Yeremia namusunjila Zedekia mbu Kano niko aka OMWAMI, Nyasaye omwene mahe, Nyasaye waIsiraeli, aboola; mbu Noba morula notsia khubakhulundu bomuruchi waBabeli, kho olaba mwoyo, litookho lino nalio shililasambwa nomulilo ta; iwe olaba mwoyo, nende abeinzuyo. 18Ne noba norarula okhutsia khubakhulundu bomuruchi waBabeli ta, kho litookho lino lilahaanwa mumakhono kabaKalidayo; nabo balalisamba nomulilo, kata shioleehonokokha mumakhono kabwe ta. 19Omuruchi Zedekia nakalusia Yeremia ari Eriitsanga abaYahudi abahunzuushe nibatsia khubaKalidayo; mbu bakhahaana mumakhono kabwe, nibakholela obubii. 20Yeremia namukalusia mbu Shiolahaanwa mumakhono kabwe ta. Chama ohulile amakhuwa kOMWAMI mukano aka ekhuboolela; mana akoko kalakaasa, nawe olaba mwoyo. 21Nebutswa noba nokhaya okhurula, kho likhuwa elia OMWAMI yamanyiye ndielino; mbu 22Lola, abakhasi bosi abatong'ile munzu yomuruchi waYuda mbabo, nibarusibwa nibayilwa ewabakhulundu bomuruchi waBabeli, nibaboola mbu
Abeetsabo abasuubilwa bakhukaatiye, nibakhuhula;
bulaano ebilenjebio nibihandile mumatoyi,
bo beebera nibakhurulakhwo.
23Balarusia abakhasibo bosi nabaanabo bosi, nibabayila ewabaKalidayo; kata iwe shioleehonokokha mumakhono kabwe ta, ne olabukulwa nomukhono kwomuruchi waBabeli; ne litookho lino lilasambwa nomulilo.
24Mana Zedekia nasunjila Yeremia ari Omundu yesi aleshe okhumanya akamakhuwa kano ta; nebutswa wakhafwa. 25Abakhulundu tsana nibaba nibahulila shinga olwa khusungaane ninawe, nibakhwitsila nibakhubiila mbu Bulaano okhuboolele amakhuwa aka obooleele omuruchi, nende aka omuruchi akhubooleele; orakabisakhwo ta; nebutswa khulakhwira. 26Mana olabasunjila mbu Esaayile omuruchi mbu aleshe okhungalusia enanzu yaYonatsani okhufwilayo. 27Mana abakhuiundu abo bosi nibamwitsila Yeremia, nibamureeba; naye nabakalusia shinga omuruchi olwa yali namulachile. Kho nibalekha okhusungana ninaye, shichila imbakha eyo shiyali niyihuliilwekhwo ta. 28Kho Yeremia namenya mulwanyi lwabalindi okhuula khunyanga olwa Yerusalemu liabukulwa.
Currently Selected:
Yeremia 38: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
