Yeremia 37
37
Yeremia yayilwa mumbohe
1Zedekia waYosia, owa Nebukhadineza omuruchi waBabeli yeemekha okhuba omuruchi mushialo shiaYuda, yarukayo, mushilenje shiaKonia waYehoyakimu. 2Ne kata ye, kata abasumbabe, kata abandu beshialo, shibahulilanga amakhuwa kOMWAMI aka yaboolanga nomunabii Yeremia ta.
3Omuruchi Zedekia yaruma Yehukali waShelemia naZefania waMaaseeya omukuhani khumunabii Yeremia, okhusunga mbu Bulaano okhusaayile ewOMWAMI Nyasaye weefwe. 4Ne Yeremia yali nasamulanga niyeenjila mubandu; shichila yali narashiabohwa mucheela ta. 5Ne lihe liaFarao liali nilirulile muMisiri; ne olwa abaKalidayo abali nibeekaliile Yerusalemu bahulila amakhuwa ako, basambula ikambi yabwe nibarula eYerusalemu.
6Mana likhuwa liOMWAMI nilimwitsila Yeremia, liri 7Kano niko aka OMWAMI, Nyasaye waIsiraeli, aboola; mbu Kano niko aka olaboolela omuruchi waYuda, owakhuruma khwisie okhureebakhwo; mbu Lola, lihe liaFarao, elimlile mbu likhuhabine, lilakalukha eMisiri mushialo shiabwe. 8Nabo abaKalidayo baleetsa khandi nibaseera litookho iino, nibalibukula, nibalisamba nomulilo. 9Kano niko aka OMWAMI aboola; mbu Mureekaatinjia abeene mbu AbaKalidayo balakhurulakhwo, ta; okhuba snibalamurulakhwo tawe. 10Okhuba kata nimwakharootsile lihe liosi pe liabaKalidayo elimuseeranga, nibakhatong'ile abafumirwa bonyene khubo, khane bakhabuukha buli mundu mwiheemalie nibasamba litookho lino nomulilo.
11Ne olwa lih liabaKalidayo liali nilisambuule ikambi yabwe nibarulile eYerusaiemu khulwa okhuria lihe liaFarao, 12Yeremia yarula eYerusalemu nabuusia oluchendo okhutsia mushialo shiaBenyamini, okhulia omukabokwe ebweneyo mubandube. 13Ne olwa yali nali hashilibwa shiaBenyamini, omundu omuhenji yali naliyo, owa eliiralie liali Iriya waShelemia waHanania; naye namutiila Yeremia omunabii, nasunga mbu Oswekhanga notsia khubaKalidayo. 14Yeremia nakalusia mbu Nobubeeyi; shiswekha ninzia khubaKalidayo ta; nebutswa Iriya yakhaya okhumuhulila; namutiila Yeremia, namuyila ewabakhulundu. 15Nabo abakhulundu nibamutiililwa Yeremia oburima, nibamukhupa nibamuboha munzu yaYonatsani omuhandiichi; okhuba balinibachikholile icheela.
Zedekia nasungana nende Yeremia
16Olwa Yeremia yali niyayililwe munzu yeimbohe, mukhasika khomubwina, niyamenyileyo tsindaalo tsinyinji, 17omuruchi Zedekia yaruma abandu okhumwenda; omuruchi nasungana ninaye mabiswi munzuye, namureeba mbu Liliho likhuwa liosi elirula khuMWAMI? Yeremia nakalusia mbu Liliho. Nameeta nasunga mbu Witsa okhuhaanwa mumukhono kwomuruchi waBabeli. 18Khandi Yeremia nasunjila omuruchi Zedekia ari Ndakhwonoonela shiina, kata okhwonoonela abasumbabo, kata lihanga lino, akachila nimumboha mucheela? 19Bulaano bali heena abanabiibo abakhurumbulila muliira liOMWAMI mbu Omuruchi waBabeli shialakhuseera kata okhuseera eshialo shmo ta? 20Ne bulaano, chama umbulile, omwami wanje omuruchi; chama okhusaaya khwanje khuule imbeliwo, mbu orangalusia munzu yaYonatsani omuhandiichi, endeshe okhufwilayo ta. 21Mana Zedekia omuruchi nalaka, nibamwinjisia Yeremia mulwanyi lwabalindi, nibamukabila buli nyanga omukaate mulala okhurula khunjila yabateeshi bemikaate, okhuula olwa emikaate chiosi chiali nichihweele mwitookho. Yeremia namenya ario mulwanyi lwabalindi.
Currently Selected:
Yeremia 37: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
