Yeremia 36
36
Eshitabu eshikanye shiasambwa
1Mumuyika kwakhane kwaYehoyakimu waYosia, omuruchi waYuda, likhuwa lino lieetsela Yeremia okhurula khuMWAMI; mbu 2Bukula eshitabu eshikanye, ohandiichemwo amakhuwa kosi aka ndakhusunjila akokhufukula Isiraeli, nakokhufukula Yuda, nakokhurukula amahanga kosi, okhurula khunyanga olwa ndakhusunjila, okhurula khundaalo tsiaYosia, okhuula olwa leelo. 3Haundi kakhaba mbu abeinzu yaYuda balahulila akamabii kosi nka ereelekhwo omwoyo okhubakholela; mbu bakalushe buli mundu okhurula khunjilaye imbii, nasi nimbaleshela obumayaanu bwabwe nobwonooni bwabwe.
4Mana Yeremia nalanga Barukhu waNeria; naye Barukhu nahnndiika nmakhuwa kosi akarula mumunwa kwaYeremia, mbu amakhuwa kosi aka OMWAMI yali niyamusunjila, mushitabu eshikanye. 5Yeremia namulaka Barukhu ari Isie ndeekalilwa; shinyala okhutsia munzu yOMWAMI ta. 6Kho iwe otsie, osoome amakhuwa kOMWAMI akomushitabu eshikanye eshia ohandiichilemwo akarula mumunwa kwanje, mumarwi kabandu, munzu yOMWAMI khunyanga eyokhuhonjelakhwo inzala, khandi okasoome mumarwi kabaYuda bosi abarulanga mumataala kabwe. 7Haundi balaleera amasaayo kabwe imbeli w, nibakalukha buli mundu okhurula khunjilaye imbii; okhuba oburima nobululu obwa OMWAMI yarumbuule khubandu bano nobunji. 8Kho Barukhu waNeria yakhola ako kosi aka Yeremia omunabii yamulaka, nasooma mushitabu tsana amakhuwa kOMWAMI munzu yOMWAMI.
9Ne mumuyika kwakharaano kwaYehoyakimu waYosia, omuruchi waYuda, mumwesi kwashienda, abandu bosi abali muYerusalemu, nabandu bosi abarula mumataala kaYuda nibeetsa eYerusalemu, bakhupa omulome kweinyanga yokhuhonga inzala imbeli wOMWAMI. 10Mana Barukhu nasooma mushitabu tsana amakhuwa kaYeremia, munzu YOMWAMI, mushisika shiaGemaria waShafani omuhandiichi, mulwanyi Iwemukulu, habwinjililo bwEshilibwa Eshiyia shieinzu yOMWAMI, mumarwi kabandu bosi.
11Ne olwa Mikaya waGemaria waShafani yali nahuliile mushitabu tsana amakhuwa kosi kOMWAMI, 12yakholomokha natsia enanzu yomuruchi, mushisika shiomuhandiichi; ne mbabo, abakhulundu bosi bali nibeekhaaleyo, mbu Elishama omuhandiichi, naDelaya waShemaya, naElinatsani waAkhibori, naGemaria waShafani, naZedekia waHanania, nende abakhulundu bosi. 13Mana Mikaya nabarumbulila amakhuwa kosi aka yali nahuliile olwa Barukhu yali nasoomeele eshitabu mumarwi kabandu. 14Kho abakhulundu bosi nibaruma Yehudi waNetsania waShelemia waKushi khuBarukhu; bari Bukula mumukhonokwo eshitabu eshikanye shieneshio eshia osoomelenje mumarwi kabandu, witse. Kho Barukhu waNeria nabukula eshitabu eshikanye tsana mumukhono, natsia ewa bali. 15Nabo nibamusunjila mbu Bulaano yikhala, okasoome khuhulile. Kho Barukhu nakasooma, nibahulila. 16Ne olwa bali nibahuliile amakhuwa ako kosi, baria, nibashiukhana nibahengana, nibasunjila Barukhu mbu Khatimba khumuboolele omuruchi ako kosi. 17Nibamureeba Barukhu bari Khuboolele bulaano, wahandiichile orie amakhuwa ako kosi? 18Barukhu nabakalusia mbu Yeremia yarumbulila amakhuwa ako kosi nomunwa, nasi ningahandiika nobwino mushitabu. 19Mana abakhulundu nibamusunjila Barukhu mbu Tsia wibise, iwe nende Yeremia yesi; omundu yesi aramanya ewa muli ta.
20Mana nibeenjila mulwanyi, ewomuruchi; ne bali nibabiishile eshitabu eshikanye tsana mushisika shiaElishama omuhandiichi; nibaboolela omuruchi amakhuwa ako kosi. 21Kho omuruchi yaruma Yehudi okhwenda eshitabu eshikanye tsana; naye nashirusia mushisika shiaElishama omuhandiichi; Yehudi nashisoomela omuruchi nabakhulundu bosi abali nibasinjiile ahambi nomuruchi. 22Ne kwali omwesi kwashienda; naye omuruchi yali niyeekhaale munzu eyetsindaalo tsiomunyiri; ne omulilo kwali nikwakha mwichiiko imbeliwe. 23Ne buli olwa Yehudi yali nasoomile tsimbapulo tsitaru tsine, omuruchi yakhalakanga nolwembe, nasukuna mumulilo okwomwichiiko, okhuula olwa eshitabu shiosi shiali nishihweeleele mumulilo okwali mwichiiko. 24Ne shibariakhwo ta, kata okhurandula ebiifwalo biabwe, omuruchi mwene kata abasumbabe bosi abahulila ako kosi. 25Ne Elinatsani naDelaya naGemaria bali nibamukayile omuruchi mbu aleshe okhusamba eshitabu tsana; ne yakhaya okhuhulila. 26Mana omuruchi nalaka Yerameeli omwana womuruchi naSeraya waAzirieli naShelamia waAbudeeli okhuhamba Barukhu omuhandiichi naYeremia omunabii; habula OMWAMI yababisa.
27Mana likhuwa liOMWAMI nilimwitsila Yeremia olwa omuruchi yali nasambile eshitabu eshikanye tsana shiamakhuwa aka Barukhu yahandiika akarula mumunwa kwaYeremia; liri 28Bukula khandi eshitabu eshikanye shindi, ohandiichemwo amakhuwa kalia kosi, akabeele nikali mushitabu eshiambeli, eshia Yehoyakimu omuruchi waYuda asambile. 29Ne khumakhuwa kaYehoyakimu omuruchi waYuda, oboole mbu Kano niko aka OMWAMI aboola; mbu Osambile eshitabu eshikanye shino, nosunga ori Olwashiina nohandiichilemwo mbu Omuruchi waBabeli shialachweya okhwitsa okhumulula eshialo shino, nokhwakamiamwo abandu nemiruko biombi? 30Khulwako kano niko aka OMWAMI aboola khukaYehoyakimu omuruchi waYuda; mbu Shialabakhwo nomundu okhwikhala khushifumbi shiaDaudi ta; nakwo omulambokwe kulasukunwa elwanyi okhuliibwa nomubasu kweshiteere neisakitu yomushilo. 31Ndalamukuuma ye nabetsinzibulotsie nende abasumbabe khulwa obumayaanu bwabwe; ndalaleera khubo, nokhubamenyanga muYerusalemu, nokhubaYuda, obubii obwo bwosi obwa ndabarumbulila, ne nibarahulila ta.
32Mana Yeremia nabukula eshitabu shindi eshikanye, naheelesia Barukhu omuhandiichi, omwana waNeria; naye nahandiikamwo akarula mumunwa kwaYeremia, mbu amakhuwa kosi keshitabu eshia Yehoyakimu yali nasambile mumulilo; khandi amakhuwa kandi amanji akafwana kario kameetwakhwo.
Currently Selected:
Yeremia 36: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
