Yeremia 32
32
Yeremia yakula omukunda eAnatsotsi
1Likhuwa elieetsela Yeremia okhurula khuMWAMI mumuyika kwekhumi kwaZedekia omuruchi waYuda, ne nikwo omuyika kwekhumi namunaane kwaNebukhadineza. 2Mundaalo etsio lihe liomuruchi waBabeli liali niliikaliile Yerusalemu; naye Yeremia omunabii yali niyeekalilwa mulwanyi lwabalindi, olwali munzu yomuruchi waYuda. 3Okhuba Zedekia omuruchi waYuda yali niyamwikaliile, naboola mbu Nishiina eshichila norumbulanga amakhuwa noboola mbu Kano niko aka OMWAMI aboola; mbu Lola, ndalahaana litookho lino mumukhono kwomuruchi waBabeli, naye alalibukula; 4mbu Zedekia omuruchi waYuda shialeehonokokha mumakhono kabaKalidayo ta; ne shialachweya okhuhaanwa mumukhono kwomuruchi waBabeli, nokhusungana ninaye omunwa khumunwa, nokhulolana ninaye tsimoni khumoni, tawe; 5naye alayila Zedekia eBabeli, na alabayo okhuula olwa ndalamukoonya, OMWAMI aboola; mbu kata nimuseerana nabaKalidayo, shimulanyala ta?
6Naye Yeremia nakalusia mbu Likhuwa liOMWAMI lianzitsila; liri 7Lola, Hanameli waShalumu so alakhwitsila nasunga ari Okule omukunda kwanje okuli eAnatsotsi; okhuba obununuli nobubwo, mbu okukule. 8Mana Hanameli omwana weefwe niyeetsa, nindi mulwanyi lwabalindi, likhuwa liOMWAMI shinga olwa libeele; niyasunjila mbu Chama okule omukunda kwanje okuli eAnatsotsi, mushialo shiaBenyamini; okhuba obulaame nobubwo, khandi obununuIi nobubwo; wikulile omwene. Kho nimanya mbu lino nelikhuwa liOMWAMI.
9Kho ndakula omukunda okwo okwali eAnatsotsi nende Hanameli omwana weefwe, nimuchelela amapeesa, mbu tsishekeli ekhumi namusaafu tsieifeetsa. 10Mana nira iseeyi khubarwa yobukusii, ninzikala neshibalikho, nilanga abaloli, nimuchelela amapeesa khuratili. 11Mana nimbukula ibarwa yobukusii, eyeneyo eyeekalwa neshibalikho, eyiinoosia amakhuwa kosi kobukusii, nende ikopi yindi eyirayeekalwa ta; 12nihaana ibarwa tsana yobukusii mumukhono kwaBarukhu waNeria waMaseya, Hanameli omwana weefwe naliho, nabaloli beene abara iseeyi khubarwa yobukusii bosi nibaliho, imbeli wabaYahudi bosi abeekhala mulwanyi lwabalindi. 13Nimulachilisia Barukhu imbeli wabwe, mbu 14Kano niko aka OMWAMI omwene mahe, Nyasaye waIsiraeli, aboola; mbu Bukula tsibarwa tsino, mbu ibarwa yobukusii, eyeneyo eyeekalwa neshibalikho, nende ibarwa yino eyirayeekalwa ta, otsibiishe munyungu, mbu tsimenye. 15Okhuba kano niko aka OMWAMI omwene mahe, Nyasaye waIsiraeli, aboola; mbu tsinzu, nemikunda, nemikunda chiemitsabibu, bilakusibungwa khandi mushialo shino.
16Ne olwa ndali nimuheelesiye Barukhu waNeria ibarwa tsana yobukusii, ndamusaaya OMWAMI, mbu 17E OMWAMI Nyasaye! Lola, niwe owalonga likulu nende eshialo khulwa obunyalibwo obunji nomukhonokwo okunyiililwe. Libulaho litinyu liosi elikhukhaya, 18iwe oulolosinjia obuheeli oburalilu khubandu ebikhumila, ne norunga obumayaanu bwabasamwana khubaana babwe munyuma wabwe; iwe omukhongo, Nyasaye wamaani, owa eliiralio niOMWAMI omwene mahe. 19Oli omukhongo mutsiyemitsio, nowamaani mubikholebio; tsimonitsio tsili khunjila tsiosi tsiabaana babandu, nokalusilinjia buli mundu akakhoyeele tsinjilatsie, nakakhoyeele ebiamo biebikholebie. 20Walolosia ebilolelo nebiamakana mushibala shiaMisiri okhuula khunyanga yino, kata muIsiraeli kata mubandu bosi; niwikholela eliira shinga olwa lili kata bulaano. 21Warusia abandubo Isiraeli mushibala shiaMisiri nende ebilolelo, nebiamakana, nomukhono kwamaani, nomukhono okunyiililwe, nende oburisii obukhongo, 22nobaheelesia eshialo shino eshia weetsubila abakuuka babwe mbu wakhabaheelesia, eshialo eshiyembangamwo amabeele nende obuushi, 23nabo nibeenjilamwo nibahilia. Nebutswa shibahulila omwoyokwo, kata shibachendela mumeebaaloko ta, kata okhukhola likhuwa liosi liosi khukeenako kosi aka wabalaka okhukholanga; ne niko akachilile nobakhupia khushibii shino shiosi. 24Lola, ebituuli ebia abeekalili babunjikha biulile khwitookho, okhulibukula, litookho limalile okhuhaanwa mumakhono kabaKalidayo abaliseeranga, khulwa olukanga neinzala noluumbe. Aka waboola kamalile nikeekhola; nawe, lola, oluutsi. 25Khandi, OMWAMI Nyasaye, wamboolela mbu Kula omukunda amapeesa, nolanga abaloli; ne khane litookho limalile okhuhaanwa mumakhono kabaKalidayo.
26Mana likhuwa liOMWAMI nilimwitsila Yeremia, liri 27Lola, isie nisie OMWAMI, Nyasaye wabandu bosi; liliho likhuwa liosi litinyu eliakhakhaya? 28Ne niko akachila kano niko aka OMWAMI aboola; mbu Lola, ndalahaana litookho lino mumakhono kabaKalidayo, nomumukhono kwaNebukhadineza omuruchi waBabeli, naye alalibukula. 29Ne abaKalidayo abaseera litookho lino baleetsa nibahambia litookho omulilo, nibalisamba, nende tsinzu tsana etsia basambilanga amalesi kelibuuliesi khubilama biatsio khuBaali, nibatsushilayo emisango chiokhutsushila khubanyasaye bandi, okhusinyisia. 30Okhuba abaana baIsiraeli nabaana baYuda bakholelanga akali amabii konyene mumoni tsianje, okhurula khubwana bwabwe; okhuba abaana baIsiraeli basinyisinjia butswa nebikhole biamakhono kabwe, OMWAMI aboola. 31Okhuba litookho lino liambeelanga eliokhusinyisia nokhubuusia obululu bwanje okhurula khunyanga olwa baliumbakha okhuula olwa leero; ndakhachirusie mumoni tsianje, 32khulwa obubii bwosi bwabaana baIsiraeli nobwabaana baYuda, obwa bakholanga okhusinyisia, bo abeene, nabaruchi babwe, nabakhulundu babwe, nabakuhani babwe, nabanabii babwe, nabandu baYuda, nende abamenyanga muYerusalemu. 33Shibashiukhasiliye mumoni ta, habula ikhoono; ne kata okva ndabeechesinjia, nimbeechesia khale nilumilila okhubeechesia, khane shibarechile amarwi okhuhulila obwibaali ta. 34Nebutswa barenjekha ebisinyo biabwe munzu eyikulishilwa khuliira lianje, okhuchionoonia. 35Khandi niboombakha habundu aheechingu haBaali hosi, ahali mwibanda liomwana waHinomu, okhubisilia Molekhu abaana babwe abasiani nabakhaana mumulilo; ne ako shindabalakakhwo, kata shikeenjila mumapaaro kanje ta, mbu bakhakhola likhuwa elo lieshisinyo, nibachila Yuda niyoonoona.
36Khulwako, kano niko aka OMWAMI, Nyasaye waIsiraeli, aboola khukelitookho lino, elia muboolangakhwo mbu Liahaanilwe mumukhono kwomuruchi waBabeli, khulwa olukanga, nokhulwa inzala, nokhulwa oluumbe; 37mbu Lola, ndalabakhung'aasia okhurula mubialo biosi ewa ndabeelusilia muburima bwanje nomubululu bwanje nomukhusinyikha khwanje okhunji; ndalabakalusia hano, nimbamenyiaho shisale; 38ne balaba abandu banje, nasi ndalaba Nyasaye wabwe. 39Ndalabaheelesia omwoyo mulala nende injila ndala, mbu bariitsenje obushia nobushia; khulwa amalayi akalaba khubo nokhubaana babwe inyuma wabwe. 40Ndalalakana ninabo indakano eyirakhwaho ta, mbu shindalashiukhana nimbalekha, oburabakholela amalayi ta; ne ndalachila emioyo chiabwe nichiria; mbu mana baleshe okhurulakhwo. 41Okhwikhoya ndaleekhoyanga okhubakholela amalayi; khandi toto mwene ndalabaraaka mushialo shino, nomwoyo kwanie kwosi nende roho yanje Yosi.
42Okhuba kano niko aka OMWAMI aboola; mbu Shinga olwa ndaleereele abandu bano amabii kano amakhongo kosi, nolwa ndalabaleerela amalayi ako kosi aka ndabasuubisia. 43Emikunda chilakulungwa mushialo shino eshia musungangakhwo mbu Nelikunda, aharali abandu kata emiruko ta; shiahaanwa mumakhono kabaKalidayo. 44Abandu balakulanga emikunda amapeesa, nibara iseeyi khubarwa tsiobukusii, nibabalikhakhwo eshibalikho, nibalanga abaloli, mushialo shiaBenyamini, nomumbali tsieYerusalemu, nomumataala kaYuda, nomumataala keshialo shiebikulu, nomumataala keShefela, nomumataala kaNegebu; okhuba ndalakalusia tsikhabi tsiabwe; nilwo olwa OMWAMI aboola.
Currently Selected:
Yeremia 32: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
