Yeremia 31
31
1OMWAMI aboola mbu Mundaalo tsienetsio ndalaba Nyasaye webilibwa biosi biaIsiraeli, nabio biliba abandu banje.
2Kano niko aka OMWAMI aboola;
mbu Abandu abeehonokokha mulukanga banyoola obukoosia mushitsiimi;
olwa Isiraeli yatsia okhukhaaba obuhuluushi.
3OMWAMI yamuloleshela okhurula ehale,
ari Ndakhuheela obuheeli oburahwaho ta;
niko akachila ndatsitsachisia obuheeli bwanje oburalilu khwiwe.
4Ndalakhuumbakha khandi; toto, oloombakhwa,
iwe Isiraeli omukhaana omushisila;
olasiahwa khandi nobukula tsisukutitsio,
norula notsia mumishino chia abo abeekhoya.
5Olaraaka khandi emikunda chiemitsabibu khubikulu bieSamaria;
abaraachi balaraaka, nibalia ebiamo biene.
6Okhuba yilabaho inyanga olwa abalindi balalanjisia mushialo shiebikulu shiaEfuraimu,
bari Buushe, khutikulushe khutsie eSayuni ewa OMWAMI Nyasaye weefwe.
7Okhuba kano niko aka OMWAMI aboola;
ari Yimbe nobusangaafu khulwa Yakobo;
khupe tsingalakala khulwa lihanga likhulundu;
khupe omulome, rumbule obwitsoomii,
boole mbu OMWAMI wahoniye abandube,
omusikalo kwaIsiraeli.
8Lole, ndalabaleera nimbarusia mushialo shienotsi,
nimbakhung'aasia okhurula khushihesi shieshialo,
nababofu nabetsindieku halala ninabo,
omukhasi ouli inda, noyo oulumwa okhwibula, bosi halala;
balakalukha hano, omukanda omukhongo.
9Baleetsa namalilo,
ne ndalabeemilila nimbalemia omwoyo;
ndalabachesia hemichela chiamatsi,
khunjila inunji ewa baranyala okhwisichirala ta;
okhuba nisie samwana Isiraeli;
Efuraimu niye omwana wanje omwikulanda.
10Hulile likhuwa liOMWAMI, inywe amahanga,
nimulirumbula munguku etsili ehale;
boole mbu Oyo owasalaasia Isiraeli alamukhung'aasia,
namulinda shinga omwayi olwa alinda ebiayobie.
11Okhuba OMWAMI wanunuule Yakobo;
wamurunjila namurusia mumukhono kwa oyo owamushila amaani.
12Baleetsa nibeembela khubutenje bwaSayuni,
nibaarililal halala enabulayi bwOMWAMI,
enamele,khandi enadivai, khandi enamafura,
khandi enabaana abomwituuli nabomubiayo;
obulamu bwabwe bulaba shinga omukunda omunyifu;
shibalabakhwo neshibeela khandi ta.
13Mana abakhaana baleekhoyela mumushino,
abasooliili nabakofu balatsatsahala;
okhuba ndalakalula eshibeela shiabwe okhwikhoya;
ndalabalemia omwoyo, nimbaheelesia obusangaafu mushilenje shieshibeela.
14Ndalachila emioyo chiabakuhani chinyalishe obunulu,
nabo abandu banje baleekura obulayi bwanje
nilwo olwa OMWAMI aboola.
15Kano niko aka OMWAMI aboola;
mbu Omwoyo kuhuliilikha muRama,
okhwikhuula, nokhulila okhululu;
Raheli nalililanga abaanabe;
akhaya okhulemibwa omwoyo khulwa abaanabe,
shichila babulaho.
16Kano niko aka OMWAMI aboola;
mbu Yikalila omwoyokwo khumalilo,
netsimonitsio khumasika;
okhuba emilimochio chilanyoola omurungo;
nilwo olwa OMWAMI aboola;
balakalukha nibarula mushialo shiabasuku.
17Shiliho eshiokhunaayilwa inziayo,
niIwo olwa OMWAMI aboola;
nabo abaanabo balakalukha mushialo shiabwe.
18Okhuhulila embuliile Efuraimu niyeehuunamila,
ari Wanguuma, nasi ninguumwa shinga eshimoosi eshishili okhunasibwa;
ungalusie, nasi ndalakalusibwa;
okhuba niwe OMWAMI Nyasaye wanje.
19Okhuba olwa ndashiukhana, ndamala nindikalukhasia;
ne olwa ndachesiyibwa, ndeekhupa lirango;
ndatiilwa tsisoni nifwimbwa omurwe,
okhuba ndeetuukha okhuseeywa khwolusooliili lwanje.
20Efuraimu niye omwana wanje omuheelwa noho?
Niye omwana omukoosi?
Okhuba kata olwa emufukula,
eshimwitsulilanga.
Omwoyo kwanje kumulilila;
shindalachweya okhumubeela tsimbabasi ta;
nilwo olwa OMWAMI aboola.
21Wisinjisilie ebimanyilo khunjila;
wibunjishile ebituuli;
omwoyokwo kuyililisie khumuhanda,
mbu injila tsana eya watsiilakhwo.
Kalukha, iwe omukhaana Isiraeli,
kalushila amataalako kano.
22Olabeeyabeeyanga okhuula liina,
iwe omukhaana omukalama?
Okhuba OMWAMI walonga eshindu eshiyia mushialo;
mbu omukhasi afumbila omusaatsa.
23Kano niko aka OMWAMI omwene mahe, Nyasaye walsiraeli, aboola; mbu Shikoono baliikhoonyela tsimboosi tsino mushialo shiaYuda nomumataala kalio, olwa ndilikalukhasia tsikhabi tsiabwe; mbu
OMWAMI akhuheelesie ikhabi,
iwe eshimenyo shiobulunjishi,
iwe eshikulu shiobutakatifu.
24Yuda namataala kashio kosi kalamenyamwo halala; mbu abalimi, nende abo abasamulanga nende ebiayo. 25Okhuba ndalanyalisia emioyo echiluyile, ne buli mwoyo okwotoshelela ndalakwitsusia.
26Habwenaho nisisimukha, nihenga; tsi ndoolo tsianje nitsimbeela etsiolukoosi.
Indakano imbia
27OMWAMI aboola mbu Lola, tsindaalo tsiitsanga olwa ndalaraaka inzu yaIsiraeli neinzu yaYuda, imwo yabandu neimwo yemiruko. 28Mana kalaba kario, mbu shinga olwa ndabahenga bulayi okhusiula nokhulikulula, okhukwisia nokhusisia, nokhusandia; nolwa ndalabahenga bulayi okhuumbakha nende okhuraaka; nilwo olwa OMWAMI aboola. 29Mundaalo tsilia shibalasunganga khandi mbu
Abasamwana baliile tsinzabibu tsiobwanya,
ameeno kabaana nikafwa, tawe.
30Nebutswa buli mundu alafwila khulwa obumayaanu bubwe omwene; mbu buli mundu ouliakhwo tsinzabibu tsiobwanya, ameenoke omwene kalafwa.
31OMWAMI naboola mbu Lola, tsindaalo tsiitsanga olwa ndalalakana nende inzu yaIsiraeli neinzu yaYuda indakano imbia. 32Shiyilaba shinga indakano yilia eya ndalakana nabakuuka babwe khunyanga eya ndabatiila omukhono okhubarusia mushialo shiaMisiri tane indakano yanje yeneyo bachionoonia, kata olwa ndali shinga omwami wabwe owabateeshia; nilwo olwa OMWAMI aboola. 33Ne yini niyo indakano eya ndalalakana nende inzu yaIsiraeli olunyuma lwetsindaalo etsio, OMWAMI aboola; mbu ndalara amalako kanje mukari mubo, kata mumioyo chiabwe ndalakaihandiikamwo; ndalaba Nyasaye wabwe, nabo balaba abandu banje. 34Kata shibaleechesinjia buli mundu owashie, kata buli mundu omwana wabwe, ari Omumanye OMWAMI, ta, shichila bosi balaba nibamanyile, okhurula khumutuutu okhuula khumukhongo, OMWAMI aboola; okhuba ndalabaleshela obumayaanu bwabwe, kata obwonooni bwabwe shindalabwitsulilakhwo khandi ta.
35Kano niko aka OMWAMI aboola,
oyo ouhaana eliuba, shibe eshiashilo mushiteere,
nende olwanzilo Iwomwesi nolwetsinyininyini okhuba ebiashilo mushilo,
ouyakula inyanza, amarunda kayo nikahoola;
OMWAMI omwene mahe nilio eliiralie.
36Obwanzi buno nibuba nibuhwaho imbeli wanje, OMWAMI aboola,
kho tsinzibulo tsiaIsiraeli natsio tsilaakama,
oburaba lihanga imbeli wanje inziayo ta.
37Kano niko aka OMWAMI aboola;
mbu Likulu elili ikulu niliakhanyala okhuchelwa,
kata omuse kweshialo musi bwene okhunoonelesibwa,
kho nasi ndakhasukuna tsinzibulo tsiosi tsiaIsiraeli khulwako kosi aka bakhola;
nilwo olwa OMWAMI aboola.
38OMWAMI aboola mbu Lola, tsindaalo tsiitsanga olwa litookho liloombashilwa OMWAMI okhurula khumunaara kwaHananeli okhuula khushilibwa eshili khukoona. 39Omukoye okwokhuchela kulatsiililila imbeli, okhuula khushikulu shiaGarebu, mana nikukotola kutsie eGoa. 40Libanda liosi liemilambo, nelielikoshe, nemikunda chiosi okhuula khumwalo kwaKidironi, okhuula khukoona yeshilibwa shietsifarasi enabukwe, lilaahulilwa OMWAMI; shililasiulwa kata okhukwisibwa khandi inziayo tawe.
Currently Selected:
Yeremia 31: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
