Yeremia 29
29
Ibarwa ya Yeremia khubaarwa
1Kano niko amakhuwa keibarwa eya Yeremia omunabii yahandiika eYerusalemu, nayilila abomusikalo kwabakofu abomubwarwi, nabakuhani, nabanabii, nende abandu bosi, aba Nebukhadineza yali niyaara muYerusalemu nabayila eBabeli. 2Kano keekhola olunyumakhwo, olwa Yekonia omuruchi yali narulile eYerusalemu, nende nyinamuruchi, nabasumba abalate, nabakhulundu beYuda naYerusalemu, nabandu abasitsa, nabeeraanyi bosi. 3Yachikoobela mumukhono kwaElasa waShafani, naGemaria waHilikia, owa Zedekia omuruchi waYuda yaruma eBabeli, khuNebukhadineza omuruchi waBabeli. Eyene yaboola yiri; 4mbu Kano niko aka OMWAMI omwene mahe, Nyasaye waIsiraeli, asunjila bosi abomubwarwi, aba ndaatisia eYerusalemu nimbayila eBabeli; 5mbu Muumbashe tsinzu nimumenyamwo; raache emikunda nimulia khumele yachio; 6teeshie abakhasi, nimwibula abaana abasiani nabakhaana; khweesie abasiani beenywe abakhasi, nimubakha abakhaana beenywe khubasaatsa, mbu beebule abaana abasiani nabakhaana; mwinjiheyo, oburatiitiha ta. 7Khaabilenje litookho elo omulembe, elia emuusiyeyo mubwarwi, nimusaaya OMWAMI khulwalio; okhuba mumulembe kwalio neenyu mulaba nomulembe. 8Okhuba kano niko aka OMWAMI omwene mahe, Nyasaye waIsiraeli, aboola; mbu Murafuchiilila abanabii abali hakari weenywe kata abafumu bamukaatie, kata murahulila amalooro aka baloora ta. 9Shichila bamurumbulila akobubeeyi muliira lianje; shindi isie owabaruma ta; nilwo olwa OMWAMI aboola.
10Okhuba kano niko aka OMWAMI aboola; mbu Olwa emiyika amakhumi musaafu chiliba nichihweele khulwa Babeli, ndilimukoonya, ninzusia likhuwa lianje lilayi khwinywe, nimukalusia hano. 11Okhuba emanyile tsiyemi etsia emukasiliye, nilwo olwa OMWAMI aboola; mbu tsiyemi tsiomulembe, netsiobubii ta; okhumuheelesia eshiokhunaayila inziayo. 12Mulahaabila, nimwitsa okhusaaya, nasi ndalamurechela amarwi. 13Mulakhaaba, nimunyoola, olwa mulakhaaba nomwoyo kwosi. 14Nasi ndalamunyooleshela, nilwo olwa OMWAMI aboola; ndalakalusia tsikhabi tsieenywe, nimukhung'aasia okhurula mumahanga kosi, nokhurula habundu hosi ewa ndamwilusilia; nilwo olwa OMWAMI aboola; ne ndalamukalusia habundu tsana ewa ndamurusia nimuyila mubwarwi.
15Ne shichila inywe muboolanga mbu OMWAMI wakhubuusiliye abanabii eBabeli, 16khO OMWAMI aboola ari nanwa khukomuruchi owikhaale khushifumbi shiaDaudi nokhukabandu bosi abamenya mwitookho lino, nibo abaana beenywe abaratsia nineenywe mubwarwi ta; 17mbu kano niko aka OMWAMI omwene mahe aboola; mbu Lola, embarumila olukanga, neinzala, noluumbe, nimbakhola babe shinga amakhuyu akokhusinya, akaranyala okhwilia ta, shichila kabiiyila elala. 18Ndalabalondachilila nolukanga, neinzala, noluumbe, nimbakhola babe eshiriisio mubwami bwosi bweshialo, babe eshilaka munwa, abamariisia, abokhunyokhoosibwa, nelinyeko, mumahanga kosi ewa ndabeelusilia; 19shichila shibahulila amakhuwa kanje, OMWAMI aboola, aka ndabarumila nabasumba banje abanabii, nimbaruma khale nilumilila okhubaruma; nebutswa mwakhaya okhuhulilai nilwo olwa OMWAMI aboola. 20Kho hulile likhuwa liOMWAMI, inywe mwesi abobwarwi, aba ndarusia eYerusalemu nimbayila eBabeli. 21Kano niko aka OMWAMI omwene mahe, Nyasaye waIsiraeli, aboola khukaAhabu waKolaya, nokhukaZedekia waMaaseya, abamurumbulilanga akobubeeyi muliira lianje; mbu Lole, ndalabahaana mumukhono kwaNebukhadineza omuruchi waBabeli; naye alabeera imbeli wetsimoni tsieenywe. 22Khulwabo eshilaka munwa shino shilaboolungwa nabaare bosi baYuda abali eBabeli; mbu OMWAMI akhukhole shinga Zedekia, kata shinga Ahabu, aba omuruchi waBabeli yasika khumulilo. 23Shichila bakholile akarakhoyeele ta muIsiraeli, nibaheya nabakhasi babeene, nibaboola amakhuwa kobubeeyi muliira lianje, aka ndarabalaka ta; ne isie nisie oumanyile, khandi nisie omuloli; nilwo olwa OMWAMI aboola.
24Khandi oboolele Shemaya omuNehelamu ori 25Kano niko aka OMWAMI omwene mahe, Nyasaye waIsiraeli, aboola; mbu Wayila tsibarwa muliira lilio omwene khubosi abali eYerusalemu, nende khuZefania waMaaseya omukuhani, nokhubakuhani bosi, etsiboola mbu 26OMWAMI wakhwemeeshe obe omukuhani mushilenje shiaYehoyada omukuhani, mbu mube abakali abasinjilila inzu yOMWAMI; mbu buli owamalalu owikhola omunabii, omwinjisie mumakokolo nomubitiili biomwikosi. 27Kho bulaano nishiina eshichilile noramukondeshela Yeremia oweAnatsotsi, oweekhola omunabii khwinywe, ta? 28Okhuba yakhuupila omunwa eBabeli, mbu Obwarwi bweenywe bulaba obwoluhoono; muumbashe tsinzu nimumenyamwo; muraache emikunda nimulia khumele yachio.
29Kho Zephania omukuhani yasooma ibarwa eyo mumarwi kaYeremia omunabii. 30Mana likhuwa liOMWAMI nilimwitsila Yeremia, liri 31Obakhupile omunwa bosi abali abobwarwi, noboola mbu Kano niko aka OMWAMI asunga khukaShemaya omuNehelamu; mbu Okhuba Shemaya yamurumbulila muliira lianje, nasi nindamurumile ta, khandi namusuubisia akobubeeyi; 32khulwako kano niko aka OMWAMI aboola; mbu Lole, ndalakuuma Shemaya omuNehelamu nende abolwibulolwe; shialabakhwo nomundu oumenya mubandu bano, okhulola amalayi aka enzitsa okhukholela abandu banje ta; nilwo olwa OMWAMI aboola; shichila aboolile akeinduli khuMWAMI.
Currently Selected:
Yeremia 29: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
