Yeremia 27
27
Eliechesio liebisekeyi
1Khukhuchaaka khwokhuruka khwaZedekia waYosia, omuruchi waYuda, likhuwa lino liamwitsila Yeremia okhurula khuMWAMI; mbu 2Kano niko aka OMWAMI yamboolela; mbu Wikholele ebitorofu nebisekeyi, nobira khwikosilio. 3Mana obakbupile omulome omuruchi waEdomu, nomuruchi waMoabu, nomuruchi wabaana baAmoni, nomuruchi waTiro, nomuruchi waSidoni, mumunwa kwabarume abeetsile eYerusalemu ewaZedekia omuruchi waYuda. 4Obalachilisie amakhuwa kano, okhuboolela abaami babwe, mbu Kano niko aka OMWAMI omwene mahe, Nyasaye waIsiraeli, aboola; mbu Mulaboolela abaami beenywe muri 5Nisie owalonga eshialo nobunyali bwanje obukhongo nomukhono kwanje okunyiililwe; ndalonga eshialo, nende abandu netsisolo etsili khushio; ne eshihaanila oyo owa endola nakhoyeele. 6Ne bulaano ndamuheelesiye omusumba wanje Nebukhadineza, omuruchi waBabeli, ebialo bino biosi mumukhonokwe, kata nende ebili mwoyo ebiomushitsiimi ndamuheelesiye mbu bimukhalabanile. 7Amahanga nako kosi kalamukhalabanila ye, nomwanawe, nomwitsukhuluwe, okhuula olwa induukho yeshialo shishie yilaba niyulile; mana amahanga amanji nabaruchi abakhongo balamukhola omusumba.
8Nebutswa lihanga liosi kata aboburuchi bwosi abakhaya okhukholela Nebukhadineza tsana, omuruchi waBabeli, abakhaya okhwinjisia amakosi kabwe mwikokolo liomuruchi waBabeli, kho OMWAMI aboola ari Ndalakuuma lihanga elo nolukanga nende inzala nende oluumbe, okhuula olwa ndalaba nimbasishiye nomukhonokwe. 9Nebutswa inywe, murahulilanga abanabii beenywe tawe, kata abafumu beenywe, kata abamalooro beenywe, kata abebitsoyelo beenywe, kata abalookooli beenywe, abamuboolelanga bari Murakholela omuruchi waBabeli ta. 10Okhuba bamurumbulila akobubeeyi, okhumurusia mushialo shieenywe ehale muno; nasi ndalamwilusia, mana mulasikha. 11Nebutswa lihanga elifuchiilila okhwinjisia amakosi kabwe mwikokolo liomuruchi waBabeli, nibamukholela, elienelo ndalalekha lisikale mushialo shiabwe, OMWAMI aboola; balashilima, nibamenyamwo.
12Kho ndasunjila Zedekia omuruchi waYuda amakhuwa kano kosi; mbu Mwinjisie amakosi keenywe mwikokolo liomuruchi waBabeli, nimumukholela ye nende abandube, mube mwoyo. 13Nishiina eshichila nimwenya okhufwa, iwe nabandubo, khulwa olukanga, nokhulwa inzala, nokhulwa oluumbe, shinga OMWAMI olwa yaboolile khukelihanga elikhaya okhukholela omuruchi waBabeli? 14Murahulilanga amakhuwa kabanabii abasungananga nineenywe, bari Murakholela omuruchi waBabeli ta; okhuba bamurumbulilanga akobubeeyi. 15Okhuba isie shindabaruma ta, OMWAMI aboola; ne barumbulilanga akobubeeyi muliira lianje; mbu emwilusie, neenyu nimusikha, inywe nabanabii abo abamularumbulilanga amakhuwa.
16Khandi ndasunjila abakuhani nende abandu bano bosi, mbu Kano niko aka OMWAMI aboola; mbu Murahulilanga amakhuwa kabanabii beenywe abamurumbulilanga amakhuwa nibasunga bari Lole, ebimanulwa bieinzu yOMWAMI bili okhukalusibwa okhurula eBabeli, ta; okhuba bamurumbulila akobubeeyi. 17Murabahulila tawe; kholelenje omuruchi waBabeli, mube mwoyo; nishiina eshiakhachila litookho lino likwe likunda? 18Ne nibaba nibali abanabii, khandi nibaba nibali nende likhuwa liOMWAMI, kho basaaye OMWAMI omwene mahe mbu ebimanulwa ebio ebishitong'a munzu yOMWAMI, nomunzu yomuruchi waYuda, nende eYerusalemu, bileshe okhuyilwa eBabeli. 19Okhuba kano niko aka OMWAMI omwene mahe aboola khuketsisiilo, nende inyanza tsana yomukasa nende obwala, nende khubindi biosi ebiokhubimanulwa ebishitong'a mwitookho lino, 20ebia Nebukhadineza arabukula ta olwa yaara Yekonia waYehoyakimu omuruchi waYuda muYerusalemu namuyila eBabeli, halala nende abamakuru beYuda neYerusalemu bosi. 21Toto mwene, kano niko aka OMWAMI omwene mahe, Nyasaye waIsiraeli, aboola khukebimanulwa ebishitong'a munzu yOMWAMI, kata munzu yomuruchi waYuda, kata eYerusalemu; 22mbu bilayilwa eBabeli nibibayo ebweneyo okhuula khunyanga olwa ndalabakoonya, nilwo olwa OMWAMI aboola; mana ndalabatikulusia nimbakalusia habundu hano.
Currently Selected:
Yeremia 27: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
